ဗညာပိုၚ်၊ အံက်တဝ်ဗာ ၂၈၊ ၂၀၂၀

ပ္ဍဲပေဲါရုဲမာဲ (၂၀၂၀) ဏံဝွံ ညးဍုၚ်ကွာန်တံ ညံၚ်ဂွံစုတ်မာဲ ကုအမာတ်မန် ညးမကဵုဖျုန် ထိၚ်ဒဝ်ပွဳပွူသဘာဝတံဂှ် ရန်တၟံလဝ်တုဲ ချဳဒရာၚ်ကၠုၚ်မံၚ်ရောၚ် ညးဆက်စၠောံပရိုၚ် ဂကောံသၟတ်မန်လညာတ်တၟိ မိပ္ကဴစမ္ပါ ဟီုရ။
“အခိၚ်ကာလအမာတ်တံ စှေ်စန်ဒက်မာဲဂှ်တှေ် ညံၚ်ညးတံ ဂွံဟီုပ္တိတ် စပ်ကဵုပရောပွဳပွူသဘာဝ ပ္ဍဲဒေသမန်ပိုဲဒှ်မံၚ်တဂှ် ဗီုလဵုညးတံကေတ်လျိုၚ် ဗီုလဵုညးတံကဵုသတိကဵု ညးဍုၚ်ကွာန်ဂှ် အဵုတဏံဂှ် ပိုဲတံဂွံသၠုၚ်ပတိုန်မာန်ကီု၊ ပေါဲရုဲမာဲဏံတှေ် ညးဍုၚ်ကွာန်တံ ညံၚ်ဂွံရုဲစှ် အမာတ်ကဵုလဝ်ဂတိပါၚ် ဟီုပ္တိတ်လဝ် စပ်ကဵုပွဳပွူသဘာဝဂှ်ကီု ရန်တၟံတုဲတှေ် ပိုဲတံကၠောန်ကၠုၚ်ရ” သာ်ဝွံ မိပ္ကဴစမ္ပါ ဂးရ။
ပ္ဍဲပရေၚ်ချဳဒရာၚ်ဏံဝွံ ဂကောံသၟတ်မန်လညာတ်တၟိတံ ပံၚ်တောဲအာကဵု ဇာနှိက်သၚ်သၟတ်မန်ကဵု ဂကောံသၟတ်ပွိုၚ်ဍုၚ် (၉) ပွိုၚ်ဍုၚ်တံ ပစူပတဴဗဳနာၚ် အကြာဒေသနာနာကီု၊ ဆဝ်မ္ၚုဟ်ကာတ်ဗာန်သတေတ်ကာ တုဲ ချဳဒရာၚ်ဒၟံၚ် ဒေသညးကဵုညးရရောၚ် ဂွံတီကေတ်ရ။
“ပ္ဍဲဗဳနာၚ်ဂှ်တှေ် ပိုဲတံနွံပၟိက် အမာတ်ကဵုဖျုန်ကဵုပွဳပွူသဘာဝတံ၊ ပ္ဍဲတွဵုရးပိုဲဂှ်တှေ် စပ်ကဵုမူဝါဒ ပရေၚ်ပွဳပွူသဘာဝတံဂှ် ချိုတ်တ်ပၠိုတ်တ်ဂှ် ဍေံဟွံမွဲပုဟ်၊ အာဂတနူဏံ အမာတ်တိုန်တၟိဂှ်တှေ် စပ်ကဵုကဏ္ဍဏံတုဲတှေ် ညံၚ်ဂွံချပ်ဇန် ဓမံက်ရုပ်ရဴမာန်” သာ်ဏံ မိပ္ကဴစမ္ပါ ဆက်ဟီုထ္ၜးရ။
ပရေၚ်ချဳဒရာၚ်ဂှ်ဝွံ ပွိုၚ်ဍုၚ်ပံၚ်၊ ပွိုၚ်ဍုၚ်ဖာအၚ်၊ ပွိုၚ်ဍုၚ်ကအ်ကြိက်၊ ပွိုၚ်ဍုၚ်မုဟ်ဍုၚ်၊ ပွိုၚ်ဍုၚ်မတ်မလီု၊ ပွိုၚ်ဍုၚ်လှာဒကှ်၊ ပွိုၚ်ဍုၚ်ဇြပ်ဗု၊ ပွိုၚ်ဍုၚ်ရေဝ်၊ ပွိုၚ်ဍုၚ်ကျာ်မြဟ် ဖအိုတ် (၉) ပွိုၚ်ဍုၚ် ပါလုပ်ဒၟံၚ်ရောၚ် ဂွံတီကေတ်ရ။