ညးမရာန်ကဝုတ်လဝ် ကွဳစက် ကဵုသၠုဲအဆံၚ် ဆံၚ် (အရစ်ကျ) တအ်ဂှ် ပ္ဍဲကဵု အခိၚ်ကာလကိုဝ်ဝေတ်ဏံ ဟိုတ်နူကဵု ပရေၚ်ပိုန်ဒြပ် ဒှ်အခက်အခုဲတုဲ သွက်ဂွံယှအ်ကဵု ပ္ကဴသြန်ဂှ် နွံပၟိက်ဒၟံၚ်ရောၚ် ညးရာန်လဝ်ကွဳစက်ကာလ္ၚဵုတအ် ဟီုရ။

ကွဳစက်ကာ ၚုဟ်(၂၆၅)ကိုဋ် မွဲမမ္ဂး ဒးစပၠောပ်ကဵု(၁၀၀)ကိုဋ်တုဲ သၠုဲသှ်ေဂှ်မ္ဂး နကဵုဗီုပြၚ်ကဵုသၠုဲအဆံၚ်ဆံၚ် ဒးကဵုအာမွဲဂိတု ပန်ကိုဋ်ပြၚ်ရောၚ် ညးရာန်ကဝုတ်လဝ်ကွဳစက်ကာ ပ္ဍဲဍုၚ်မတ်မလီု မိတေန်တေန်ကျာၚ် ဟီုရ။

“အဲဂှ် ချုက်လဝ်လိက်(၅) သၞာံ၊ လၟုဟ်ဂှ် ဂွံ(၂) သၞာံရ၊ ဂိတုတုဲကၠုၚ်တေံဂှ် ပၠောပ်သၠုဲလေဝ်ဟွံမာန်၊ ဂိတုဏံ ကွာတ်ထၜိုတ်ဂွံတှ်ေ ပၠောပ်မာန်ရ၊ ပ္ကဴသြန်ဂှ်လေဝ် ဒးကဵုဂၠိုၚ်ဒၟံၚ်တုဲ ယဝ်ရ ကဵုဟွံမာန်ပၠန်လေဝ် ဂွိၚ်ဖေက်ဍေံသီထောံကာ (ကွဳစက်) ဇကု၊ ဟဂှ်ရ ရဲမိက်ဂွံရာန်ကဝုတ်ဂှ်တှ်ေ အဲဟွံကဵုဇြဟတ်ပုဟ်” သာ်ဝွံ ညးဆက်ဟီုရ။

တုဲပၠန် ပ္ဍဲကဵုအခိၚ်ကာလ ကိုဝ်ဝေတ်ဏံဂှ် နူကဵုကမ္ပဏဳသွံရာန်ကဝုတ်ကဵုသၠုဲ အဆံၚ်ဆံၚ်တံ ဂွံယှအ်ကဵုဂှ် ဟွံမွဲတုဲ ၜက်အာနူတ္ၚဲပၠောပ်သၠုဲမ္ဂး ဒးထပ်ကဵုဒၟံၚ် ပ္ကဴသြန်ရောၚ် ညးရာန်ကဝုတ်လဝ်ကွဳလိုန်ဓါတ် မိလေန် ဟီုရ။

မိလေန်ဂှ် “ မိက်ဂွံကဵုယှအ်၊ တုဲပၠန်တ္ၚဲပၠောပ်သၠုဲဂှ် လဆောဝ်ၜက်ဒၟံၚ်တရဴလေဝ်နွံမံၚ်တှ်ေ မိက်ဂွံကဵုကၠိုဟ်ကေတ်လ္တူပိုဲညိ၊ ထပ်ကေတ် သြန်ပ္ကဴပၠန်ဂှ်ဟွံမိက်ကဵုဒှ်ပုဟ်” ဂးလဝ်သာ်ဝွံရ။

ပ္ဍဲကဵုဍုၚ်မတ်မလီု ဆေၚ်သွံကွဳစက်ကာကဵု ကွဳလိုန်ဓါတ်(Vigo world)ဂှ် အခိၚ်ကၠာ ယဲကပ်ဟွံဒှ်ဏီဂှ် ဂွံသွံဒၟံၚ် ကွဳလိုန်ဓါတ်(၅၀၀)ဖဍိုက်ပြၚ်တုဲ လၟုဟ်ဝွံ မွဲဂိတု (၂၀၀)ဖဍိုက်ပြၚ်ဂွံသွံဒၟံၚ်ရ။(Promotion)လေဝ် ဟွံမွဲဏီတုဲ မၞိဟ်ပၠောပ်သြန်ဟွံမာန်ဂှ် ဂၠိုၚ်တိုန်ဒၟံၚ်ရောၚ် ညးရပ်စရၚ် မာံအးကပါ ဟီုထ္ၜးလဝ်ရ။

ညးမိက်ဂွံရာန်ကဝုတ် ကွဳလိုန်ဓါတ်ကဵုသၠုဲ အဆံၚ်ဆံၚ်မ္ဂး ဒးဒှ်မၞိဟ်အယုက်အကြာ ၁၈ ကဵု ၆၀ တုဲ၊ ဒးဒှ်မၞိဟ် သြန်လုပ်နွံ လၟေၚ်ဂိတု၊ လိက်ထံက် ဂလာန်ပ္ဍဲကွာန်၊ လိက်စရၚ် သ္ၚိကၟိန်အိန်ထံၚ်၊ ကာတ်စၟတ်သမ္တီကောန်ဍုၚ်တံ ဒးထ္ၜးမာန်ဍိုက်ဍိုက်ပေၚ်ပေၚ်မာန်ရောၚ် ဂွံတီကေတ်လဝ်ရ။