သွက်ဂွံဒှ်ပရေၚ်စဵုဒၞာဲယဲကပ်ကဝ်ဝေဒ်မာန်ဂှ် ပံက်ကၠုၚ်လဝ်သၞေဟ်ကၚ်စၟဳစၟတ် ပါၚ်လုပ်ပွို်ၚ်ဍုၚ်ရေဝ် ပါၚ်ဂၠံၚ်သၞေဟ်ခြေၚ်ဂှ် ပ္ဍဲကဵုအခိၚ်ပေဲါရုဲမာဲဂှ် နူကဵုဂိတုနဝ်ဝေမ်ဗာ ၆ တေံ ကၟာတ်ထောံလဝ်တုဲ ညံၚ်ဂွံကလေၚ်ပံက်ကဵုမာန် ရေၚ်တၠုၚ်မံၚ်ဖိုဟ်ရောၚ် ဂွံတီကေတ်ရ။

“ပိုဲပံက်ကၠုၚ်လဝ် ပွိုၚ်မွဲဂိတုပါ်ပြၚ်တုဲ ပ္ဍဲဂိတုနဝ်ဝေမ်ဗာ (၆) ဂှ် ကၟာတ်လဝ်ရ။ ဒးအာလဝ်အခေါၚ်အလဵုအသဳ နဲစုၚ်တုဲမှ ဂွံပံက်လဝ်ဏံ၊ အလဵုအသဳတွဵုရးလေဝ် ပဲါနူကဵုလဝ်အခေါၚ်ပံက်တုဲ ပရေၚ်ထံက်ပၚ်မုလေဝ် ဟွံမွဲပုဟ်။ ပိုဲဂကောံမဟာဇန်ကဵု ညးအုပ်ဓုပ်ဒေသတံ ဒးဂစာန်ကၠုၚ်လဝ်ရ။ နူကဵုကၟာတ်ထောံတုဲဂှ် လၟုဟ်တှ်ေ ညံၚ်ဂွံကလေၚ်ပံက်ကဵုပၠန် ပိုဲဂစာန်မံၚ်ဖိုဟ်ရ။ နကဵုဂကောံမဟာဇန်တံ က္ဍိုက်ပ်တုဲ ပ္တိုန်လဝ်အခေါၚ် ပ္ဍဲကဵုဌာနအုပ်ဓုပ်ပွိုၚ်ဍုၚ်ဖိုဟ်ရ” သာ်ဝွံ ညးအုပ်ကာ ဂကောံပရေၚ်မၞိဟ်ဍုၚ်ရေဝ် (YSS) ဥုအံၚ်နာၚ်ဝေန် ဟီုရ။

နကဵုဌာနက္ဍိုက်ပ်ပရေၚ်အုပ်ဓုပ်ပွိုၚ်ဍုၚ်ရေဝ်လေဝ် ဆန္ဒမိက်ဂွံကလေၚ်ပံက်ဂှ် နွံမံၚ်ကီုလေဝ် ဆက်ပ္တိုန်ထ္ၜးကဵုအဆံၚ်ၚ်ပၠန်ရောၚ် ညးဆက်ဟီုရ။

မွဲသာ်ပၠန်ဂှ် ညးစဴကၠုၚ်နူကဵုဍုၚ်သၟာၚ် ဂၠံၚ်ဍာန်ဟွံလုပ်သၞောဝ်တံကီု ညးစဴနူကဵုဒေသ ယဲကၠောံထၞာန်ဂၠိုၚ်တံဂှ် သ္ကိုပ်အုပ်ဓုပ်ကွာန်တံ ညံၚ်ဂွံဆက်စၠောံကဵုဌာနပရေၚ်ထတ်ယုက်ဂှ် အုပ်ဓုပ်ပွိုၚ်ဍုၚ် ကဵုလဝ်စၞောန်ရောၚ် ဂွံတီကေတ်ရ။

“ဟွံပံက်ရပုဟ်ဂှ် ဍေံဟွံဟီုပတိတ်ဏီလေဝ် လညာတ်အဲတှ်ေ ဍေံဟွံပံက်ရပုဟ်။ မုဟိုတ်ရောတှ်ေ ဍေံကလေၚ်ဓရတ်လဝ် အုပ်ဓုပ်ဇၟာပ်ကွာန်ဂှ်တှ်ေ ရဲစဴနူကဵုလ္ဂုၚ်တှ်ေ ဗီုလဵုစဴစဴ ဒးပလံၚ်ဏာ ဗဒိုပ် Quarantine ရေဝ်ဂှ်ဏောၚ်။ ရဲစဴနူဍုၚ်သေံ ဍာန်သၟဝ်တေံ ဒးပလံၚ်ဏာ ဗဒိုပ် Quarantine ဍုၚ်မတ်မလီုဏောၚ်။ ဍေံထပ်ဓရတ်လဝ် ပေၚ်ၚ်တှ်ေ ၝ (သၞေဟ်စၟဳစၟတ်) တေံဂှ် ဟွံပံက်ရပုဟ်” သာ်ဝွံ သ္ကိုပ်အုပ်ဓုပ်အရာပ် ၝောံဍုၚ် (၃) ဍုၚ်လၟိုၚ် နာဲဝေ ဟီုရ။

နူကဵုဂိတုသေပ်တေမ်ဗာ (၁၉) တေံ ပံက်ကၠုၚ်လဝ် သၞေဟ်ကၚ်စၟဳစၟတ် ပါၚ်ဂၠံၚ်ကွာန်သၞေဟ်ခြေၚ်တုဲ ညးစဴကၠုၚ်နူကဵုဍုၚ်လ္ဂုၚ်တံ စၟယဲမံက်ဂှ် နွံမံၚ်ကီုလေဝ် ဂွံပၠောပ်လဝ် Quarantine တိုက်ရိုက်ဂှ်ရ ပရေၚ်ကၠောံထၞာန်သက်သာမံၚ်ရောၚ် ညးဒေသတံ ပတှ်ေမံၚ်အိုတ်ရ။

ပ္ဍဲကဵုတွဵုရးဍုၚ်မန်ဂှ် မၞိဟ်ယဲကဝ်ဝေဒ်သ္ပဒတန် (၈၀၀) တၠပြၚ်နွံတုဲ မၞိဟ်ဒးချိုတ်အာကဵုယဲကဝ်ဝေဒ်ဂှ် (၁၀) တၠရောၚ် ဂွံတီကေတ်ရ။