ဝဏ္ဏမာန်၊ အေဗရဴ ၂၉၊ ၂၀၂၁

ပူဂဵုနုက်တိတ်လဝ် နူဗော်ညဳသၟဟ်မန်ဂမၠိုၚ် စန်ဒက်ပကောံအာဇြဟတ် စပ်ကဵုပရေၚ်ကေၚ်ကာဂကူမန် မွဲဂကောံရောၚ် နာဲမန်ရာဇာ (ညးစၞးဇၞးလဝ်မာဲ ပေဲါရုဲမာဲ ၂၀၂၀) ဟီုထ္ၜးရ။
“ပိုဲရဲဂကောံနုက်တိတ်လဝ် နူဗော်ညဳသၟဟ်မန်တံ ပံၚ်ကောံသဳကၠဳကဵု ဂကောံနာနာတံတုဲတှေ် ဒက်အာဇြဟတ် ပရေၚ်ကေၚ်ကာဂကူမန် မွဲဂကောံရောၚ်၊ ဂကောံဏံဂှ်တှေ် ဗော်ဟွံသေၚ်ပုဟ်၊ ဆေၚ်ကဵု ပရေၚ်လိက်ပတ်၊ ဆေၚ်ကဵုတ္ၚဲကောန်ဂကူတံရ ရေၚ်တၠုၚ်အာဏောၚ်” သာ်ဝွံ နာဲမန်ရာဇာ ဟီုရ။
ကြဴနူကဵု ဗော်ညဳသၟဟ်မန် ပါလုပ်ပ္ဍဲကံၚ်ဇြဳအုပ်ဓုပ်ဍုၚ်တုဲဂှ် ပ္ဍဲဗော်ညဳသၟဟ်မန် အဆံၚ်ကမ္မတဳကေၚ်ကာဗဟဵု (၁၉) တၠ၊ ပ္ဍဲကဵုဂှ် ဂကောံညးအုပ်ကာ (၂) တၠ၊ ကမ္မတဳဗဟဵု (၁၅) တၠ၊ ပံၚ်ကမ္မတဳဗဟဵု (၃၄) တၠ ပတိုန်လဝ် လိက်နုက်တိတ်နူဗော်ရ။
“ပိုဲရန်လဝ်ဂှ်တှေ် ဂိတုမေမံက်ဗက်တှေ် ပိုဲရဲနုက်တိတ်နူဗော်တံ သ္ပတိုၚ်တုဲတှေ် ကော်ဘိက် ဂကောံမဟာဇန်နာနာတံတုဲ ကၠောန်ကောံဓရီုမွဲဏောၚ်၊ ပ္ဍဲဂှ်တှေ် ပံက်အာ ဂကောံကေၚ်ကာပရေၚ်ဂကူမန် အဆံၚ်ဂကောံသ္ပစၞး ဂကူမန်ဟီုဟီု ပံက်အာမွဲဏောၚ်၊ ပိုဲပြိုၚ်ပ္ကာန် ပံက်ဗော်ဟွံသေၚ်ပုဟ်” သာ်ဝွံ ညးဆက်ဟီုရ။
နူကဵုကံၚ်ဇြဳပၞာန် အုပ်ဓုပ်ထိၚ်ဒဝ်ကၠေံ အဝဵုဍုၚ်တုဲဂှ် စၞးဗော်ညဳသၟဟ်မန် အဆံၚ်ကၟိန်ဍုၚ် (၁) တၠကီု၊ ပ္ဍဲအဆံၚ်တွဵုရး (၁) တၠကီု ပါလုပ်ကေတ်လျိုၚ်တုဲဂှ် ကမ္မတဳကေၚ်ကာဗဟဵု၊ ကမ္မတဳဗဟဵု၊ ကောန်ဗော်အဆံၚ်ပွိုၚ်ဍုၚ်-အဆံၚ်ကွာန်လ္ၚဵု ပတိုန်ကၠုၚ် လိက်နုက်တိတ်နူဗော်ရ။