မိလတိုပ်၊ ဂိတုမေ ၂၄၊ ၂၀၂၁

ပ္ဍဲကာလပရေၚ်ဍုၚ်ကွာန် ထုဲထံၚ်မံၚ်ဏံဂှ် ၚုဟ်ကပေါတ်ဖျာလ္ၚဵု က္ဍၚ်တိုန်နွံ၊ ၚုဟ်ကပေါတ်သိုၚ်သ္ၚိလ္ၚဵုလေဝ် က္ဍၚ်တိုန်မံၚ်ကြပ်ကဝက် ဒှ်မံၚ်နွံရ။
ဟိုတ်နူအကာဲအရာ ပရေၚ်ဍုၚ်ကွာန်တုဲ ကွဳစက်ဖ္ဍိုက်ကပေါတ် ဒှ်ခက်ခုဲကီု၊ ပရေၚ်ဗွဝ်ဖျာပိုတ်သကုတ်ကီု ဒှ်ကၠုၚ်တုဲ ကပေါတ်ဖျာလ္ၚဵု၊ ကပေါတ်သိုၚ်သ္ၚိလ္ၚဵု ၚုဟ်က္ဍၚ်တိုန်မံၚ် ဟွံသာရ။
“ဂွံဇက်ရာန်ကပေါတ်ဂှ် ကာအာကၠုၚ်ဂွိုအ် ကပေါတ်ပိုတ် ဟိုတ်နူဂှ်တုဲတှေ် ကပေါတ်လ္ၚဵု ၚုဟ်ဍၚ်တိုန်ကြပ်ကဝက် ဒှ်” သာ်ဝွံ အ္စာပရန်သိုၚ်ခၞံသ္ၚိ နာဲနာၚ်ဥု ပွိုၚ်ဍုၚ်ဇြပ်ဗု ဟီုရ။
နူကၠာအခိၚ်ပရေၚ်ဍုၚ်ကွာန် ဟွံရုသံၚ်ဏီဂှ် တိဗဳလာတ်မွဲရိုက်မ္ဂး ၚုဟ်နွံမံၚ် အကြာ (၅၀၀၀) ပြၚ် (၆၀၀၀) တုဲ လၟုဟ်မ္ဂး ဒှ်အာ (၇၅၀၀) ကီု၊ ပသဲမွဲတာန် ကၠာတေံၚုဟ်နွံ အကြာ (၅) ကိုတ်ပြၚ်ဂှ် လၟုဟ် ဒှ်အာ (၇) ကိုတ်ပြၚ်ကီု၊ ပသဲစဝ်ကောန်ကရေတ် (ကွန်ကရစ်လောၚ်းသွပ်) ဂှ် ကၠာတေံၚုဟ်နွံ မွဲပေ (၃၅၀၀) ပြၚ်ဂှ် လၟုဟ်ဒှ်အာ (၆၀၀၀) ပြၚ်ကီု အိုတ်သီုဂှ် ၚုဟ်က္ဍၚ်တိုန်အာအိုတ်ရ။
“ကပေါတ်သိုၚ်သ္ၚိ ဗီုတိဗဳလာတ်မွဲရိုက် ၚုဟ်သၠုၚ်တိုန်အာ (၂၀၀၀)၊ ပသဲဂှ် (၁) တာန် ၚုဟ်သၠုၚ်တိုန်အာ ဗဒဲါ (၂) ကိုတ် ပသဲစဝ် (ကွန်ကရစ်) ဂှ် မွဲပေ ၚုဟ်သၠုၚ်တိုန် (၂) လ္ၚီပြၚ်တှေ် ဗီုကပေါတ်တၞဟ်ဟ်လေဝ် ၚုဟ်သၠုၚ် က္ဍၚ်ဗက်တိုန် ဗီုဂှ်သီုဖအိုတ်ရ” သာ်ဏံ တၠဆေၚ်သွံကပေါတ်သိုၚ်သ္ၚိ ပ္ဍဲဍုၚ်ဇြပ်ဗုမွဲတၠ ဟီုထ္ၜးရ။
ရဲသိုၚ်သ္ၚိ၊ ပလေဝ်သ္ၚိ ပ္ဍဲကဵုအကြာကာလဏံဝွံ ဟိုတ်နူအသိၚ်ပရေၚ်ဍုၚ်ကွာန် ဟွံညိၚ်ဝတ်တုဲ ပရေၚ်ဆက်စၠောံဂၠံၚ် ဍာန်ကီု ကာဇက်ဖ္ဍိုက်ကပေါတ်တအ် အာကၠုၚ်အောန်စှေ်ဂှ်ရ ရဲပလေဝ်သ္ၚိကီု၊ သိုၚ်သ္ၚိကီု ဒးရပ်စပ်စကာသြန် ဂၠိုၚ်ကၠုၚ်ရ။