အရာပရေၚ်ပိုန်ဒြပ်ကဵု စသုၚ်မံၚ်စံၚ်

နာဲကသုမန်

ပရေၚ်ထိၚ်အဝဵု နူကဵုအလဵုအသဳညးဍုၚ်ကွာန်တံ ရုဲစှ်ပတိုန်ဂှ် ဒှ်ဟိုတ်ညးဍုၚ်ကွာန်တံ ဟွံပတှေ်စ ကံၚ်ဇြဳပၞာန်တုဲ ဇီုကပိုက်ကုပရေၚ်ပိုန်ဒြပ် အလုံဍုၚ်ရ။ လိက်ပရေၚ်ဏံ သ္ၚဳဂၠိပ်လဝ် ပရေၚ်ဇီုကပိုက် အရာပရေၚ်ပိုန်ဒြပ် ကၟိန်ဍုၚ်ဗၟာ ပိသာ်၊ (၁) ကမၠောန်ကၟိတ် အပ္ဍဲဍုၚ်၊ (၂) ပရေၚ်ပိုန်ဒြပ် ဂေတ်ဒၟံၚ် အပ္ဍဲဍုၚ် ကေုာံ (၃) ပရေၚ်ဓလိုက်တံရိုဟ် နူကဵုဍုၚ်သအာၚ်တံရ။

ပ္ဍဲကဵုလိက်ပရိုၚ်သၞံၚ်တိုၚ် ကၞပ်တုဲကၠုၚ်တေံဂှ် လဴထ္ၜးစ ပရေၚ်ဇီုကပိုက် စပ်ကဵုပရေၚ်ဍုၚ်ကွာန် ကြဴနူကဵု ပၞာန်သီအဝဵုကီုရ။ ကၞပ်ဏံဂှ် ဆက်တုဲ ပတိုန်ထ္ၜးဏာကဵု ပရူပရာ ဆက်စပ်ကဵု ပရေၚ်ပိုန်ဒြပ် သီုကဵု မပါလုပ် ပရေၚ်ဇီုကပိုက် ပရေၚ်စသုၚ်မံၚ်စံၚ်အိုဿီုပၠန်ရောၚ်။

ဍုၚ်မွဲမွဲ ပ္ဍဲကဵုဂၠးကဝ်ဏံ ပၞာန်တံ သီအဝဵုတုဲ ပရေၚ်ပိုန်ဒြပ်ဇၞော်မောဝ်တိုန် ဍုၚ်ကွာန်ဇၞော်မောဝ်တိုန်ဂှ် အောန်တဴဗွဲမလောန်ရောၚ်။ ကၟိန်ဍုၚ်ပိုဲတံလေဝ် တုပ်တဴညံၚ်ရဴ သာ်ဂှ်ကီုရ။ သာတုဲ ပရေံမွဲသာ်ပၠန်ဂှ် သ္ကိုပ်ပၞာန် ‘မေန်အံၚ်လှာၚ်’ သ္ပသကိုပ်သကတုဲ ကံၚ်ဇြဳပၞာန်တံ သီအဝဵုတုဲ ပေၚ်အာ (၄) ဂိတုပၠန်လေဝ် ဍုၚ်ကွာန်ဂှ် ဍေံဟွံညိၚ်ဝတ်ရ။ အကာဲအရာဍေံ နူကဵုထ္ၜးဆန္ဒ အာတ်မိက်အခေါၚ်အရာ ဒဳမဝ်ကရေဇြဳ လတူဍာန်ဂှ် ဒးဒုၚ်ပန်ဂစိုတ်တုဲ ဍေံကၠောံပရေၚ်ပန်ပှော် ဂစိုတ်ဂယိုၚ်ညးသကအ်ပၠန်တုဲ ဍုၚ်ကွာန် ဟွံညိၚ်ဝတ်ရ။ ပရေၚ်ဍုၚ်ကွာန် ဟွံညိၚ်ဝတ်မ္ဂး ပရေၚ်ပိုန်ဒြပ်တံဂှ် သာတုဲ ပရေံစှေ်မာန်ရ။

ယဝ်ရ ပိုဲတံသ္ၚဳဂၠိပ်အာ ပရေၚ်ပိုန်ဒြပ်ဍုၚ်မွဲမွဲတှေ် ဒးရံၚ်အာ စပ်ကဵုအကာဲအရာ (၁) ကမၠောန်ကၟိတ် အပ္ဍဲဍုၚ်၊ (၂) ပရေၚ်ပိုန်ဒြပ် ဂေတ်ဒၟံၚ် အပ္ဍဲဍုၚ် ကေုာံ (၃) ပရေၚ်ဓလိုက်တံရိုဟ် နူကဵုဍုၚ်သအာၚ်တံ ပါလုပ်ရ။ စပ်ကဵုအကာဲအရာအိုဿီု သ္ၚဳဂၠိပ်အာ မွဲသာ်တုဲ မွဲသာ်ရောၚ်။

(၁) ကမၠောန်ကၟိတ် အပ္ဍဲဍုၚ်
ပ္ဍဲကၟိန်ဍုၚ် (ဍုၚ်ဗၟာ) ပိုဲတံဂှ်တှေ် စပ်ကဵုကမၠောန်ကၟိတ်ဟီုဂှ် လၟိဟ်မၞိဟ် (၇၀) တၟအ်ကၠံတံဂှ် တန်တဴဒၟံၚ် ပ္ဍဲရးတံတုဲ တန်တဴလတူကမၠောန် ဂူယာဝါဗ္ၚတံရ။ ဆဂး လၟိဟ်မၞိဟ် (၃၀) တၟအ်ကၠံ တန်တဴ လတူဍုၚ်တံဂှ် အဓိက ကၠောန်ကမၠောန် ပရေၚ်ကူသာန်သွံရာန်၊ ကမၠောန်ရုၚ်စက်၊ ကမၠောန်ကမ္ပဏဳ ကေုာံ ကမၠောန်အလဵုအသဳတံရ။

ဆဂး ပရေၚ်ဇီုကပိုက် ကြဴနူထိၚ်အဝဵုတုဲဂှ် ဒးဆဵုဂဗ သီုညးဍုၚ်ကွာန် မတန်တဴဒၟံၚ် လတူဍုၚ်ကီု ပ္ဍဲကွာန်ရးတံရ။ အဓိက ညးဍုၚ်ကွာန် တန်တဴလတူဍုၚ်တံဂှ် ဒးဘဲဂၠိုၚ်ရ။ ဟိုတ်နူကဵု ပေဲါထ္ၜးကတဵုဒှ်တုဲ ညးဍုၚ်ကွာန် မတန်တဴဒၟံၚ် လတူဍုၚ်ဗွဲမဂၠိုၚ် မပတံကဵုဍုၚ်လ္ဂုၚ်၊ ဍုၚ်မတ်မလီု၊ ဍုၚ်မာန်တလေဝ်တံဂှ် ဒေံါကမၠောန်အိုတ်ရ။ ကာလ ညးတံ ထ္ၜးဆန္ဒတုဲ ကံၚ်ဇြဳပၞာန်တံ ဗလးနၚ်ကောန်ပၞာန်တံ ဗၠာဲသၟိၚ်တံတုဲ ပန်ပၠောပ် ညးဍုၚ်ကွာန် သွက်ဂွံဗဒေံါထောံ ပေဲါထ္ၜးဆန္ဒရ။ ညးဍုၚ်ကွာန် လတူဍုၚ်တံ ဟွံပေၚ်စိုတ်တုဲ အဓိကဵု အကြာရဲဂီုကၠီုတံကဵု ညးဍုၚ်ကွာန်တံ ဒှ်တိုန် ဂၠိုၚ်ကဵုဒၞာဲ ပ္ဍဲဍုၚ်ဇၞော်တံရ။ ဟိုတ်နူကဵု ကံၚ်ဇြဳပၞာန်တံ ကြာန်တိုန်သာ်ဝွံတုဲ ရုၚ်ကမၠောန် ရုၚ်စက် လတူဍုၚ်အိုဿီုတံဂှ် ဒးဒုၚ်ကၟာတ်ထောံနွံရောၚ်။

ပ္ဍဲကဵုလတူဍုၚ်လ္ဂုၚ် ပ္ဍဲကဵုပွိုၚ်ဍုၚ်လှာၚ်သာယျာ (လှိုၚ်သာယာ) ဂှ် ရုၚ်စက်ဇၞော် ဗၞတ် (၁၅) ရုၚ် နူကဵုကမ္ပဏဳဍုၚ်ကြုက်တံ ဒးဒုၚ်စံၚ်ရ။ ကံၚ်ဇြဳပၞာန်တံ စောဲစပ်လဝ်ဂှ်တှေ် ညးထ္ၜးဆန္ဒတံဟေၚ် စံၚ်ထောံ ရုၚ်စက်တံဂှ်ရောၚ် ဂးရ။ ပရူပရာဝွံ ဍေံကတဵုဒှ် ကြဴနူကဵု ဍုၚ်ကြုက် စဵုဒၞာဒၟံၚ် ကၚ်ဇြဳပၞာန် ပ္ဍဲကဵုကံၚ်ဇြဳပရေၚ်ဂီုကၠီု ကုလသမဂ္ဂတေံရ။ ဟိုတ်နူရုၚ်စက် တူအာသာ်ဏံကီု သၟာကမၠောန်တံ ထ္ၜးဆန္ဒဂှ် ပၞာန်ဗၟာကဵု ဗၠာဲသၟိၚ်ဗၟာတံ လုပ်ပန်ဂစိုတ်ကီုတုဲ သၟာကမၠောန် လတူဍုၚ်လ္ဂုၚ်ကဵု အိန်ထံၚ်ညးတံ လၟိဟ်မၞိဟ် ဗၞတ် (၁၀၀၀၀၀) တၠပြၚ်ၚ်တံ ဒဴတိတ်နူလ္ဂုၚ်ရ။ တုပ်တဴသာ်ဂှ်ကီု ရုၚ်စက်ကမ္ပဏဳကြုက် ပ္ဍဲမာန်တလေဝ်တေံလေဝ် ကၟာတ်ထောံတုဲ သေဌဳကြုက်တံ ဒးဂြိပ်စဴရ။ ဟီုသရုပ်မ္ဂး ကမၠောန်ကၟိတ် လတူဍုၚ်ဗွဲမဂၠိုၚ်ဂှ် ဒေံါဒေၚ်အာရ။

ပရေၚ်ဇီုကပိုက် လတူကောန်ဍုၚ်ကောန်ကွာန် ဒေသရးတံလေဝ် နွံရ။ ဟိုတ်နူကဵု ပေဲါထ္ၜးဆန္ဒ ကတဵုဒှ် အလုံဍုၚ်တုဲ ကံၚ်ဇြဳပၞာန်တံ ပတိတ်အမိၚ်ကာဖျူတုဲ ကၟာတ်ထောံ အာကၠုၚ် အခိၚ်ဗ္တံရ။ ကွဳစက်အာကၠုၚ် မွဲဒေသကဵု မွဲဒေသ ဒးဒေံါရ။ ကွဳစက်ဖ္ဍိုက်ကပေါတ် ကူသာန်သွံရာန်တံ ဒးဒေါံအာကၠုၚ် အခိၚ်ဗတံတုဲ ဟွံကလိတ်ကလောတ်ရ။ အရာဏံဂှ် ဍေံအာဇီုကပိုက်ကဵု ကပေါတ်ပတိတ် နူကဵုဒေသကွာန်ရးတံတုဲ ကပေါတ်စသုၚ် ကပေါတ်မံၚ်စံၚ် ကပေါတ်ဆေၚ်စပ်ကဵု ကမၠောန်တံဂှ် ၚုဟ်မးဍေံသၠုၚ်အာကီုရ။

(၂) ပရေၚ်ပိုန်ဒြပ် ဂေတ်ဒၟံၚ် အပ္ဍဲဍုၚ်

ခြာဟွံလအ်ကၠုၚ်တေံ ပိုဲတံ ဂွံဆဵုကေတ်ဂှ်တှေ် ညးဍုၚ်ကွာန်တံဂှ် ဂွိၚ်ဖေက် သြန်နူဘာဏ် အိုတ်အာဂးတုဲ အာပတိတ်ဒၟံၚ်သြန် ဂြုဂြုဂြီုဂြီုဂှ် ဂွံဆဵုကေတ် စဵုကဵုလၟုဟ်ရ။ လၟုဟ်ပၠန်တှေ် တိုက်သြန်ဘာဏ်ဏံ ပတိတ်သြန် ဟွံဂွံရ။ ပၠောပ်သြန်ရဟေၚ် ဂွံရောၚ် ဂးရ။ ရံၚ်အာ လတူဏံတှေ် စပ်ကဵုသြန်ဂေတ်ဒၟံၚ် အပ္ဍဲဍုၚ်ဂှ် နူကဵုတိုက်သြန်ဘာဏ် ဗဟဵုတံ ဒးထိၚ်ဒဝ်အာ တၟာကလှေ်ဂှ် ဂွံဆဵုကေတ်ကီုရ။

အကာဲအရာ ဍာံပြဝွံ အပ္ဍဲကဵုအလုံဍုၚ်မွဲဂှ် အရာပရေၚ်ပိုန်ဒြပ် ဂေတ်ဒၟံၚ် အပ္ဍဲဍုၚ် မပတံကဵု ပရေၚ်ကူသာန်သွံရာန်ကီု၊ ပၠောပ်ကပေါတ်/ ပတိတ်ကပေါတ် ဒေသပယျဵုကီု၊ ကမၠောန်ရုၚ်ကမၠောန် ရုၚ်စက် လတူဍုၚ်ကီု ဒေံါဒေၚ်အာ ဗွဲမဂၠိုၚ်တုဲ သြန်ပၠောပ်/ပတိတ် အပ္ဍဲကဵုတိုက်သြန်ဘာဏ်တံဂှ် ဍေံဒေံါဒေၚ်အာ ဗွဲမဂၠိုၚ်ရ။ ဟိုတ်နူကမၠောန်ကၟိတ် လီုလာ်အာတုဲ သွက်ညးဍုၚ်ကွာန်တံဂှ် သြန်လုပ် လၟေၚ်တ္ၚဲ ဒေံါအာရ၊ ဟွံမွဲရ။ ဟိုတ်ဒှ်သာ်ဝွံတုဲ ညးဍုၚ်ကွာန်တံဗွဲမဂၠိုၚ် ပတိတ်သြန်ညးတံ ဂိုၚ်ဒိပ်လဝ် ပ္ဍဲတိုက်သြန်ဘာဏ်ရ။ ကာလပတိတ်သြန်ဘာဏ်ပၠန်ဂှ် ဟိုတ်နူကဵု ဘာဏ်ဗဟဵုတံ ပတိတ်ကဵုသြန် ပေၚ်ၚ် ဟွံမာန်တုဲ ညးဍုၚ်ကွာန် ပတိတ်သြန်ဂွံညိညရ။ ဒှ်သာ်ဂှ်တုဲ ညးဍုၚ်ကွာန်တံ ဂွိၚ်တိုန်ခ္ဍၚ် အာပတိတ်သြန် ဂၠိုၚ်ခ္ဍၚ်ရ။

ကြဴနူကဵု ကံၚ်ဇြဳပၞာန်တံ ထိၚ်အဝဵုတုဲ ဂွံဗၞတ် (၁) ဂိတုဂှ်တှေ် ဂွိၚ်ဖေက် ပရေၚ်ဆက်စၠောံ ညးထ္ၜးဆန္ဒတံ လောဲသွာ ပကောံမၞိဟ် လောဲသွာကီု၊ သွက်ဂွံဗဒေံါထောံ ဗီုရုပ်/ ဗဳဒဳယဝ်တံ တိုန်ဒၟံၚ် ဒဒှ်ရဒပ်ပၞာန်ဗၟာတံ ပန်ဂစိုတ်ဒၟံၚ် ညးဍုၚ်ကွာန်တံဂှ်တုဲ ကံၚ်ဇြဳပၞာန်တံ ကၟာတ်ထောံ အေန်တာနိတ် (Internet) ရ။ ကံၚ်ဇြဳပၞာန်တံ ကၟာတ်ထောံအေန်တာနိတ် ကၟာတ်ထောံပရေၚ်ဆက်စၠောံဟီုဂှ် ဍေံအာဇီုကပိုက်ကဵု ပရေၚ်ထ္ၜးဆန္ဒသၟးဟွံသေၚ် ဍေံအာဇီုကပိုက်ကဵု ပရေၚ်ပိုန်ဒြပ်ပၠန်ရ။ အပ္ဍဲဍုၚ်ဗၟာဝွံ စကာမံၚ် အေန်တာနိတ် ညးဍုၚ်ကွာန် ကၠောန်ဒၟံၚ်ပရေၚ်အန်လိုၚ် (Online Business) ဂှ် လုပ်ကဴ ဗၞတ် (၅) သၞာံပြၚ်ရ။ ရာန်ကပေါတ်၊ ဗကန်ကပေါတ်၊ ပၠံၚ်သြန်၊ ဒုၚ်တဲသြန်၊ လိၚ်ကွဳစက်၊ ပသောၚ်စရၚ်သြန်အိုဿီုတံဂှ် စကာဒၟံၚ် အန်လိုၚ်တုဲ ကၠောန်ရ။ ကမၠောန်ဓမ္မတာ ကၠောန်ဒၟံၚ်သာ်ဏံဂှ် ဍေံဒေံါဒေၚ်အာတုဲ ယာန်ဂေတ်မံၚ် အရာပရေၚ်ပိုန်ဒြပ်လေဝ် ဒေံါအာ ဗၞတ် (၇၅) တၟအ်ကၠံ ခက်ခုဲအာကဵု ဂကောံကမၠောန်၊ ကမ္ပဏဳတံရ။

ပ္ဍဲဂိတုဒဳဇြေမ်ဗာ (၂၀၂၀)၊ ကၠာအလဵုအသဳတၟိမွဲ ဟွံဂွံပံက်ဂှ်တှေ် ဟိုတ်နူကဵု အကာဲအရာ ပရေၚ်ဍုၚ်ကွာန် ညိၚ်ဝတ်တုဲ ပ္ဍဲကဵုမွဲဂိတုဂှ် ကမ္ပဏဳပတိုန်စရၚ်တၟိ နွံဗၞတ် (၂၀၀၀) ကမ္ပဏဳရောၚ် ဂွံတီကေတ် အတိုၚ်စရၚ်အလဵုအသဳရ။ ဆဂး သီအဝဵုတုဲ ဂွံမွဲဂိတု ပ္ဍဲဂိတုမာတ်ဂှ် ကမ္ပဏဳတၟိ အာပတိုန်စရၚ်ဂှ် ကၠံလေဝ် ဟွံပေၚ်ရ။ ရံၚ်ကေတ်လတူဏံဂှ် ပရေၚ်ဇီုကပိုက် နွံလတူပရေၚ်အပ္ဍဲဍုၚ် တၟာဂလိုၚ်ရောၚ်။

(၃) ပရေၚ်ဓလိုက်တံရိုဟ်ဍုၚ်သအာၚ်

ကၟိန်ဍုၚ်ပိုဲတံဂှ် တၟော်ကဵုဍုၚ်သအာၚ်မ္ဂး ဍုၚ်ဝါတ်ဒိုက်မွဲရ။ ပရေၚ်ပိုန်ဒြပ် စဵုကဵုဇၞော်မောဝ်ကွေံကွေံ ဟွံသေၚ်ဏီရ။ ပရေၚ်ပိုန်ဒြပ် အပ္ဍဲဍုၚ်ဇကု သွက်ဂွံဇၞော်မောဝ်တဴတက်ဂှ် ဒးကော်ဘိက် ဍုၚ်မ္ၚးတံ သွက်ဂွံလုပ်ဓလိုက်တံရိုဟ် အပ္ဍဲဍုၚ်ဇကုရ။ ယဝ်ရ ရဲဍုၚ်သအာၚ် လုပ်ဓလိုက်တံရိုဟ် ပ္ဍဲဍုၚ်ဇကုရောၚ် ဟီုမ္ဂး စပ္တံနူကဵု ဍေံတံ သိုၚ်ခၞံရုၚ်စက် ဒးရာန်ကပေါတ် ပ္ဍ္ဍဲဍုၚ်ဇကု ဒးလိၚ်မၞိဟ် ပ္ဍဲဍုၚ်ဇကုတုဲ ညးဍုၚ်ကွာန်တံ ဂွံကမၠောန်ကၟိတ်ရောၚ်။ သိုၚ်ခၞံရုၚ်စက်တုဲ လိၚ်သၟာကမၠောန်မ္ဂးလေဝ် ကောန်ဍုၚ်ဇကု ဂွံကမၠောန်ရ။

နူကဵုကံၚ်ဇြဳပၞာန်တံ ထိၚ်ကေတ်အဝဵု နနဲအဓမ္မ၊ ဖျေံထောံ အလဵုအသဳညးဍုၚ်ကွာန်တုဲဂှ် ဓရ်ပတှ်ေ သၟာပိုန်ဒြပ်ဍုၚ်သအာၚ်တံ စှေ်အာ စိုပ်သုညအိုတ်ရ။ သဘာဝ သၟာပရေၚ်ပိုန်ဒြပ်ဍုၚ်သအာၚ် ညးမဓလိုက်ဍုၚ်သအာၚ်တံတှေ် ပ္ဍဲကဵုဍုၚ်ဒဳမဝ်ကရေဇြဳ ဒၞာဲပရေၚ်ဍုၚ်ညိၚ်ဝတ် သၞောဝ်ဓရ်ခိုဟ် အလဵုအသဳတံ ဗိုၚ်စဵုဒၞာကဵုဂှ်ဟေၚ် ညးတံ မိက်ဂွံဓလုိုက်တံရိုဟ်ရ။

ဗွဲကြဴဏံ ဟိုတ်နူကဵုကံၚ်ဇြဳပၞာန်တံ ပန်ဂစိုတ် ညးဍုၚ်ကွာန် ရပ်စပ်ညးဍုၚ်ကွာန်တံ ဗွဲမသကာတ်မြဟ်တုဲ ညးဍုၚ်ကွာန် မွဲဂၠးကဝ်တံ ဒစဵုဒစးကၠုၚ် တၠအဝဵုကံၚ်ဇြဳပၞာန်တံတုဲ ဒစဵုဒစး ထ္ၜးဆန္ဒရ။ ညးဍုၚ်ကွာန် ဍုၚ်သအာၚ် မဆက်စပ်တံဂှ် အာတ်မိက်ကမ္ပဏဳဍုၚ်ညးတံ လုပ်ဓလိုက်လဝ်တံရိုဟ် အပ္ဍဲဍုၚ်ဗၟာ အိုဿီုတံ သွက်ဂွံနုက်တိတ်တုဲ ညံၚ်ဟွံဂွံကဵုသြန် ကံၚ်ဇြဳပၞာန်ဂှ် ဆဝ်ဗ္ၚုဟ်ရ။ ဟို်တ်နူဂှ်ရ ကမ္ပဏဳနွံဒၟံၚ် အပ္ဍဲဍုၚ်ဗၟာ နူကဵုကဝ်ရဳယျာ၊ ဂျာပါန်၊ ယူရပ်ကဵု အမေရိကာန်တံ ဗွဲမဂၠိုၚ် တိတ်ထောံ နူကဵုဍုၚ်ဗၟာရ။

ဟိုတ်နူကဵု အလဵုအသဳအမေရိကာန်တံ ဓရတ်ကၠုၚ် ကမ္ပဏဳလ္ၚဵု ညံၚ်ဟွံဂွံပံၚ်ကၠောန်ကမၠောန် ကုကမ္ပဏဳ ဒပ်ပၞာန်ဗၟာတံ ဂးတုဲ ကမ္ပဏဳလ္ၚဵုလေဝ် ဒးတိတ်နူကဵုဍုၚ်ဗၟာရ။ သှေ်မံၚ် ဆၜိုတ်ကမ္ပဏဳကြုက်တံရ။ ဒၟာနူဏံတုဲ သွက်ကံၚ်ဇြဳပၞာန်ဂှ် သြန်လုပ်နူကဵုဍုၚ်သအာၚ် ယအ်စှေ်အာတုဲ ဗဂေတ်သြန် ဟွံလောဲသွာရ။ ပရေၚ်ဇီုကပိုက်ဏံဂှ် ဒးအာ ပရေၚ်အုပ်ဓုပ်ကံၚ်ဇြဳပၞာန် ဒှ်ကၠာလေဝ် မွဲနဲမွဲဗီု ဒွံဒးအာ ကမ္ပဏဳအပ္ဍဲဍုၚ် ကေုာံ သြန်လုပ် ညးဍုၚ်ကွာန်တံရ။

နိဂီု
အရာဇီုကပိုက် ပရေၚ်ပိုန်ဒြပ်သာ်ဏံဂှ် ယဝ်ရ ကံၚ်ဇြဳပၞာန်ရ အုပ်ဓုပ်ရောၚ်တှေ် ဍေံဆက်ဒှ်အာ အတိုၚ်ဏံရ။ အရာဇီုကပို်က် သာ်ဏံနွံတုဲ သြန်ဗၟာဂှ် ဖောဝ်တိုန် (ၚွေကြေးဖောၚ်းပွမှု) ဗွဲမဂၠိုၚ်ဂၠေၚ်တုဲ ၚုဟ်မးကပေါတ်တံလေဝ် သွက်ဂွံက္ဍၚ်တိုန်နွံရ။ သြန်လုပ် ညးဍုၚ်ကွာန်တံအောန်၊ ကမၠောန်ကၟိတ် အောန်၊ ၚုဟ်မးကပေါတ်က္ဍၚ်ရောၚ်။ မွဲအခိၚ်ဓဝ် ယဝ်ရအာအတိုၚ်ဏံမ္ဂး ဖျာဒမၠု (မှောၚ်ခိုစျေး) လေဝ် သွက်ဂွံမံက်တိုန် ဗီုခေတ်မဆလတေံမာန်ရောၚ်။