ဝဏ္ဏမာန်၊ ဂျူလာၚ် ၁၄၊ ၂၀၂၁

ကောံဓရီုဇၞော်သၟတ်မန် အလန်ဒုတိယ ချိၚ်လဝ် သွက်ဂွံကၠောန် ကၠာဂိတုဂျူလာၚ်ဏံဟွံအိုတ်ဂှ် ဟိုတ်နူအကာဲ အရာ ယဲကၠောံထၞာန်ဂၠိုၚ်တိုန်ဂှ်တုဲ မ္ဒးပဆုဲဏာရောၚ် ကမ္မတဳဍိုက်ဍိုပ် ကၠောန်ဗဒှ် ကောံဓရီုဇၞော်သၟတ်မန် အလန်ဒုတိယ နာဲဇာနဲဥု ဟီုထ္ၜးသာ်ဝွံရ။
“ရံၚ်ကဵုယဲကၠောံထၞာန်ဂၠိုၚ်တိုန်တုဲတှေ် ကောံဓရီုဇၞော်သၟတ်မန် အလန်ဒုတိယ ပိုဲဖျေံလဝ် သွက်ဂွံကၠောန်ဂိတု ဏံဂှ်တှေ် ဟွံဒှ်ကၠောန်ရ၊ ပဆုဲဆလအ်လဵုဂှ်တှေ် ဟီုဟွံဒးဏီ၊ မၚ်ရံၚ်ကဵု အကာဲအရာယဲဂှ်ဏောၚ်” သာ်ဝွံ နာဲဇာနဲဥု ဟီုရ။
ကောံဓရီုဇၞော်သၟတ်မန် အလန်ဒုတိယဂှ် တမ်ဝါဒိဂှ် ကမ္မတဳကၠောန်ဗဒှ်တံ ရန်လဝ် ဂိတုဂျူလာၚ် (၂၈/၂၉/၃၀) (၂၀၂၁) ဂှ်မ္ဂး သွက်ဂွံကၠောန်အာ ပ္ဍဲခရိုၚ်သဓီု ပွိုၚ် (၃) တ္ၚဲနွံရ။
ကောံဓရီုဇၞော်သၟတ်မန် အလန်ဒုတိယ ရန်လဝ်သွက်ဂွံကၠောန်ဂှ် သွက်ဂွံကလေၚ်ဒက်ပခိုၚ်ပတိုန် ဌာန်ကောံသၟတ်မန်ကီု၊ သွက်ဂွံသဳကၠဳ သ္ပအာဒတန် စပ်ကဵုမူဝါဒသၟတ်မန်ကီုနွံရ။
“မူဝါဒသၟတ်ဂှ် ပိုဲပဒတန် ညံၚ်ဂွံမာန်ရောၚ်၊ ပရေၚ်ပံၚ်ပကောံသၟတ်ပိုဲ MYF ရောအ်ရေၚ် (ယောၚ်ယာ) မံၚ်တ္ၚဲဏံဂှ် ဗီုလဵုဂွံက္လေၚ်စန်ပကောံ ပံက်အာကမ္မတဳ ဂကောံသၟတ် MYF ဏံဂှ် သဳကၠဳအာရောၚ်” သာ်ဝွံ ညးကဵုကသပ် ဂကောံသၟတ်မန် နာဲဉာဏ်သိုက်ရာမာဉ် ဟီုလဝ်ရ။
တ္ၚဲကၠောန်ကောံဓရီုဇၞော်သၟတ်မန် အလန်ဒုတိယဂှ် ကမ္မတဳကၠောန်ဗဒှ်တံ ဂ္ဇံမံၚ်ကောံဓရီုတုဲ ပဆုဲဏာ စဵုကဵု အခိၚ်လဵုဂှ် ဟီုဒးဏီရောၚ်ဂှ်လေဝ် ကမ္မတဳဍိုက်ဍိုပ်ဂှ် ဟီုထ္ၜးရ။
ကောံဓရီုဇၞော်သၟတ်မန် အလန်ပထမဂှ် တုဲကၠုၚ်သၞာံ (၂၀၁၄) ဂိတုမေဂှ် ကၠောန်ကၠုၚ်လဝ် ပ္ဍဲဘာသာသနာ (၂၅၀၀) ဍုၚ်မတ်မလီုရ။