မိလတိုပ်၊ အဝ်ဂါတ် ၁၀၊ ၂၀၂၁

ပ္ဍဲကာလ ဗြဲဂူတရိုပ်မံၚ်တ္ၚဲဏံဂှ် ဒှ်မံၚ်အခိၚ်ယဲမနက် (တုပ်ကွေး) တုဲ မၞိဟ်ဗွဲမဂၠိုၚ်ဂှ် က္တဵုဒှ်မံၚ်ယဲတုဲ ယဲမနက် (တုပ်ကွေး) ဟာ ယဲကိုဝ်ဝေဒ်ဟာဂှ် သၠေဟ်ပၟာမံၚ်အိုတ်ရ။
ပ္ဍဲဒေသရးမန်ဝွံ ဇၟာပ်စိုပ်အခိၚ်လ္ဒောဝ်ကသီု လၟုဟ်ဏံမ္ဂး ယဲမနက် ကော် (ရာသီတုပ်ကွေး/ သွေးလွန်တုပ်ကွေး) က္တဵုဒှ်မံၚ်တုဲ သၞာံဏံလေဝ် ယဲကိုဝ်ဝေဒ်အလန်တတိယ က္တဵုဒှ်မံၚ်ကီုတုဲ ထုဲနှဴမံၚ်ဂှ်ရ ယဲမနက်ဟာ ယဲကိုဝ်ဝေဒ်ဟာ ပါ်ပဲါဟွံဒးရ။
“ယဝ်ဒးဆာံ၊ ဟဍက်ယျဵုယျဵုရတှေ် ၜိုတ် (၅) တ္ၚဲ မွဲသတ္တဟတှေ်ဗၠးရ။ ယဝ်ဟွံဂွံသၟူပုဟ် ကိုဝ်ဝေဒ်ဏောၚ်ဟီုတှေ် ဒးဒုၚ်ဝေဒနာ ၜိုတ် (၁၅) တ္ၚဲ၊ မၞိဟ်ဇၞော်ဇၞော်တှေ် ၜိုတ် (၂၀) တ္ၚဲ ဒှ်မံၚ်ဏောၚ်” သာ်ဝွံ ဒံက်တာပိုန်ညာဏ် ဟီုရ။
ပ္ဍဲကာလလၟုဟ်ဏံ မၞိဟ်ဗွဲဗဂၠိုၚ် ခဍက်၊ ဒးဆာံ၊ ကအ်ဂိ၊ ဇကုဂမ္တဴ ဇကုဇဂောဝ်ဂိ စတံဒှ်မံၚ်ဗွဲမဂၠိုၚ်တုဲ ယဲမနက် (တုပ်ကွေး) ဟာ၊ ယဲကိုဝ်ဝေဒ်ဟာ ဂှ် လက်သန်ယဲ ထုဲနှဴမံၚ် ဂွံဆဵုကေတ်ရ။
မၞိဟ်ဒှ်ယဲ ခ္ဍက်၊ ဒးဆာံ လ္ၚဵုဂှ် ဟွံဂွံသၟူ တုဲ ကာလစမ်ၜတ် ပ္ဍဲရုၚ်ဂဥုဲဂှ် စၟယဲဟွံမံက် ဒှ် (Negative) လေဝ် နွံ ဗွဲမဂၠိုၚ် ဂွံဆဵုကေတ်ရ။
“ယဲ (တုပ်ကွေး) ကဵု ယဲကိုဝ်ဝေဒ်ဂှ် လက်သန်ဍေံတုပ်မံၚ်ညးသက္ကအ်တှေ် ညးလ္ၚဵုဟဍက်၊ ဒးဆာံ၊ ယဲလေဝ်ဟွံ ဂံၚ်အာလွဳ၊ ဟွံဂံၚ်အာစမ်ပုဟ် ဂွိၚ်ဖေက်ယဲကိုဝ်ဝေဒ်မံက်၊ ဟွံမိက်ဒုၚ်ယၟုကိုဝ်ဝေဒ် ဗီုဂှ်လေဝ်နွံ” သာ်ဝွံ ဂကောံကဵုဒါန်ဆီကွာန်ပ္ၚ မိခိုၚ်ယေန်မန် ဟီုရ။
ယဝ်ခါရ ကတဵုဒှ်ယဲ ခ္ဍက်၊ ဒးဆာံ ဇကုက္တဴ ဟွံဂွံသၟူမ္ဂး ထ္ၜးလက်သန် ယဲကိုဝ်ဝေဒ် (positive) ဒှ်ဒှ်၊ ဟွံထ္ၜး လက်သန်ယဲ (Negative) ဒှ်ဒှ် ညံၚ်ယဲဟွံဂွံကၠောံထၞာန်အာ နူညးသၟာၚ်ဂှ် ဒးသ္ပကဵု ပရေၚ်စဵုဒၞာထေက်ရောၚ် သဝ်ဝန် ဒံက်တာတံ ဟီုထံက်ထ္ၜးရ။