ဝဏ္ဏမာန်၊ အဝ်ဂါတ် ၁၃၊ ၂၀၂၁
အကာဲအရာ ပရေၚ်ဍုၚ်ကွာန်ကၟိန်ဍုၚ်ဗၟာဂှ် ပဋိပက္ခသွက်ဂွံသှ်ကလးအာ ဟွံမာန်ဏီတုဲ စပ်ကဵုပရေၚ်ပိုန်ဒြပ်လေဝ် သွက်ဂွံဒးဆုတ်စှေ်အာရနွံရောၚ် ညးအုပ်ကာနာနာ နူဂကောံတၠကမၠောန်မန် နာဲထောန်လောန် ဟီုရ။
“အကာဲအရာ ပရေၚ်ဍုၚ်ကွာန်ဍုၚ်ပိုဲဏံ ဘိုအ်ဍေံဂွံသက်သာစှေ်အာ ဟွံဆဵုဏီပုဟ်၊ ဘိုအ်ဍေံဂွံတေၚ်အာဂှ်ရ ညာတ်ကေတ်ဂၠိုၚ်၊ ဟိုတ်ဍေံကတဵုဒှ်ဗီုဂှ်တုဲတှေ် ပ္ဍဲကဵုပရေၚ်ပုိုန်ဒြပ်ဏံလေဝ် ဓဝ်ပတှေ်ညးဍုၚ်ကွာန်တံကီု၊ ဓဝ်ပတှေ် ရဲဓလိုက်တမ်ရိုဟ်တံကီု အောန်စှ်အာကွေံကွေံဏောၚ်” သာ်ဝွံ နာဲထောန်လောန် ဟီုရ။
ကြဴနူကဵု ဒပ်ပၞာန်ထိၚ်ဏာအဝဵုတုဲဂှ် စပ်ကဵုပရေၚ်ဓလိုက်တမ်ရိုဟ်ကီု၊ သွာၚ်ကမၠောန်ရဲအာတရဴကီု၊ ဆေၚ်စသုၚ် ဇၞော်ဇၞော် ဍောတ်ဍောတ်တံကီု ယောၚ်ယာဆုတ်စှေ်အာ မွဲစွံကဵု အကာဲအရာ ပရေၚ်ဍုၚ်ကွာန် ဒှ်ကလိုက်ကမဵုဂှ်ရ။
ဆက်တုဲ ညးအုပ်ကာ ဂကောံတၠကမၠောန်မန်ဂှ် “ရဲဓလိုက်တမ်ရိုဟ်ဍုၚ်သၟာၚ်တေံဂှ် လ္ပဟီုဏီရ ရဲနွံပ္ဍဲဍုၚ်ဏံဂှ်မှ လှုဲညးတံနွံတုဲ ဂွံထပ်သၠဲပတိုန်ကမၠောန်ညးတံ၊ ဂွံဓလိုက်တမ်ကမၠောန်ညးတံဂှ် ခက်ခုဲနွံတၟာဟလိုၚ်ဏီ၊ ဓဝ်ပတှေ် ပရေၚ်ဍုၚ်ကွာန်အောန်မံၚ်တှေ် လတူပရေၚ်ပိုန်ဒြပ်လေဝ် ဒှ်ပရေၚ်ဆိုအ်ဗ တၟာဇၞော်မွဲတဲဏောၚ်” ညးထပ်ဟီုရ။
အကာဲအရာ ပရေၚ်ဍုၚ်ကွာန်ကၟိန်ဍုၚ်ဗၟာဂှ် ဘိုအ်ဂွံညိၚ်တိုန်အာ ဟွံဆဵုဏီတုဲ သွက်ဂွံရောအ်ရေၚ်အာနွံဂှ်ရ အကာဲ အရာ ပရေၚ်ပိုန်ဒြပ်လေဝ် ဘိုအ်ဂွံဆုတ်ယောၚ်စှေ်အာနူဏံဏီရောၚ် ညးအုပ်ကာ ဂကောံတၠကမၠောန်မန်ဂှ် သ္ၚဳဂၠိပ်ရ။
