Categories
ပရိုၚ်

ဟိုတ်နူကၠေၚ်စက်ၚုဟ်သၠုၚ်တုဲ ညးတၠစက်ပၟတ် ပ္ဍဲကွာန်တအ် ဒးဒေံါဇူလဝ်

မာံသုခ၊ ဂိတုအံက်တဝ်ဗာ ၂၃၊ ၂၀၂၁

ပ္ဍဲဒေသလှာဒကှ် ကွာန်ဗွဲမဂၠိုၚ် ပၟတ်ဍုၚ်ဟွံစိုပ်ဏီတုဲ ကွာန်လ္ၚဵု ညးဍုၚ်ကွာန်တအ် ဒးသုၚ်စောဲမံၚ် ပၟတ်စက်ပူဂဵု အပ္ဍဲကွာန်တအ်ရ။
လၟုဟ် ဟိုတ်နူကၠေၚ်စက် ၚုဟ်သၠုၚ်တိုန်တုဲ ညးတၠစက် ဍေန်ကဵုပၟတ်တအ် ဒးသၠုၚ်ဗက်တိုန် ၚုဟ်ယူနေတ် ၜါဆမှပြေပြံၚ်တုဲ ညးဍုၚ်ကွာန်တအ် ဒးသုၚ်စောဲနကဵုၚုဟ်မးယူနေတ် ဂၠိုၚ်လောန်အာဂှ်ရ ဒေါံဇူတုဲ ဒးသၟာန်ဆန္ဒ ညးကေတ်ပၟတ်တအ်တုဲမှ ဂွံဆက်ဗလးအာကဵုပၟတ်ပၠန်ရ။
“ခက်ဂှ်တှေ် ဟိုတ်နူကၠေၚ်ဍၚ်တိုန်အာ ၜါဆဏောၚ်တှေ် ဒးဗက်တိုန်ၜါဆဂှ်ရ ဒးကၟာတ်လဝ်စက်၊ ညအ် ဗက်ထပိုတ်ထောံ ခရိတ်ဂိတုဏံတုဲတှေ် ဒးက္လေၚ်ကေတ်ဆန္ဒညးတအ်၊ ညးတအ် ကေတ်မာန်တှေ် ဆက်ပံက်၊ ဆ ရံၚ်ကေတ် မၞိဟ်ကေတ်ယအ်စစှ်ဏောၚ်” သာ်ဏံ ညးဍေန်ကဵုမံၚ်ပၟတ်စက် ဒဵုထောၚ်ပန်ကအ် နာဲအံၚ်မန် ဟီုရ။
ပ္ဍဲကွာန်ဒဵုထောၚ်ပန်ကအ်ဂှ်မ္ဂး ဒးသုၚ်စောဲမံၚ်ၚုဟ်ပၟတ် မွဲယူနေတ်ပၟတ်စက်ကွာန် နူစတမ် မွဲယူနေတ် (၈၀၀) ဒ္ကေဝ်၊ ဟိုတ်နူကၠေၚ်စက်ၚုဟ်တိုန်၊ တိုန်အာ (၉၀၀)၊ နူ (၉၀၀) တိုန် (၁၀၀၀)၊ လၟုဟ် ဟွံပြေပြံၚ် သွက်ဂွံဆက်တိုန်အာ မွဲယူနေတ် ဒဵုကဵု (၁၅၀၀) နွံမံၚ်ရ။
ပ္ဍဲဒေသလှာဒကှ်ဝွံ ကွာန်လ္ၚဵု ဂွံကၠုၚ်ပၟတ်ဍုၚ်ညိညနွံကီုလေဝ် ကွာန်ဟွံဂွံပၟတ်ဏီ ဒးသုၚ်စောဲစကာမံၚ် ပၟတ်ကွာန် ပၟတ်စဲတ္ၚဲတအ် နွံဗွဲမဂၠိုၚ်ဏီရ။ ပၟတ်တအ်ဂှ် ဗလးကဵုမံၚ်ပွိုၚ် (၂၄) နာဍဳဟွံသေၚ်၊ သဝ်တ္ၚဲ နူကဵု (၆းဝဝ) နာဍဳ စိုပ် (၉း၃၀) နာဍဳ၊ ကုညးမ္ဒးသုၚ်စောဲမံၚ် ပၟတ်ကွာန်ဗီုဏံ မွဲဂိတုမ္ဂး မွဲသ္ၚိအောန်အိုတ် အကြာ (၅) ယူနေတ် စဵုကဵု (၂၀)၊ (၃၀) ယူနေတ်နွံရ။
ဒေသလှာ်ဒကှ် ပၟတ်ဍုၚ်မွဲယူနေတ် (၃၀) ဒ္ကေဝ်၊ ယဝ်ဒးတော်ကဵု ၚုဟ်ယူနေတ်ပၟတ်ဍုၚ်မ္ဂး တၞဟ်ခြာအာဗွဲမဂၠိုၚ်ရ။
ပ္ဍဲဒေသလှာဒကှ်ဝွံ ကွာန်ဟွံကလိဂွံ ပၟတ်ဍုၚ်တအ်ဂှ် နွံပၟိက်မံၚ်ကဵု ပၟတ်ဍုၚ်အိုတ်တုဲ ဒေသလှာဒကှ် ကွာန်မန် ကွာန်ကြုၚ်ခယာၚ်၊ ကွာန်ကုန်မိပ်ဇြိပ်၊ ကွာန်အၚ်လှာထဝ်၊ ကွာန်ဝါဂြာဲ၊ ကွာန်သၞေဟ်သြောံ ကွာန်ဗေဒါဇၞော်တအ် ကလိဂွံကၠုၚ်လဝ် ပၟတ်ဍုၚ်နွံရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.