သၞံၚ်တိုၚ်၊ အံက်တဝ်ဗာ ၂၈၊ ၂၀၂၁
ပ္ဍဲတွဵုရးဍုၚ်မန်၊ ဆေၚ်ဖျာမၞုံပ္ဍဲပွိုၚ်ဍုၚ်ဒးလဝ်အမိၚ် Stay at Home တအ်ဂှ် ယဝ်ခါရ ထ္ၜးကဵုလိက်ထံက်ဂလာန် ဒဒှ်ရထပက်လဝ်ဂဥုဲစဵုဒၞာ ယဲကိုဝ်ဝေဒ် (၁၉) တုဲဒှ်မံၚ်ယျရောၚ်ဟီုမ္ဂး ကဵုအခေါၚ်သွံဖျာရောၚ် ဂွံတီကေတ်လဝ် နူကဵုဂကောံဗဂဵုလဟဵု တွဵုရးဍုၚ်မန် (စည်ပၚ်သာယာရေးအဖွဲ႕) ဂှ်ရ။
တုဲကၠုၚ်ဂိတုဂျုလာၚ်ဂှ် ဟိုတ်နူကဵု ပရေၚ်ကၠောံထၞာန်ယဲတအ် သ္ကာက်မြဟ်တိုန်လဝ်ဂှ်ရ ပ္ဍဲဂိတုဂျုလာၚ်၊ စၟတ်တ္ၚဲ (၅) ဂှ် ဖျာစၞစသုၚ်တအ်ကီု၊ ဆေၚ်ထဝ်၊ ဆေၚ်ဂၠိက်ယာတ် စပ္တံတအ်ဂှ် ဒးကဵုကၟာတ်ထောံလဝ်တုဲ ကပေါတ်ဒေါံဟွံဂွံ မပ္တံကဵု ဂဥုဲဇဗ ကေုာံ ကပေါတ်စသုၚ်ညိညတအ်ဂှ်ဟေၚ် ကဵုအခေါၚ်သွံမံၚ်ရ။
ဆဂး စိုပ်ဂိတုအံက်တဝ်ဗာ၊ စၟတ်တ္ၚဲ (၁) တုဲကၠုၚ်တေံဂှ် ဟိုတ်နူပရေၚ်ကၠောံထၞာန်ယဲတအ် က္လေၚ်ယအ်သာစှေ်ပၠန်ဂှ်ရ ပဲါနူပွိုၚ်ဍုၚ်မတ်မလီုတုဲ ပွိုၚ်ဍုၚ်ပံၚ်၊ ကျာ်ထဝ်၊ ကျာ်မြဟ်၊ မုဟ်ဍုၚ်ကဵု ပွိုၚ်ဍုၚ်ရေဝ်တအ်ဂှ် ပဲါနူကဵုဂဥုဲဗဇ၊ ကပေါတ်စၞစသုၚ်ဂှ်တုဲ ဆေၚ်ဖျာသွံရာန်လ္ၚဵုတအ်ဂှ်လေဝ် ဂွံအခေါၚ်ပံက်ကၠုၚ်လဝ်ရ။
ပြဟ်ဟ်ဏံဂှ်မ္ဂး ဖျာဇၞော် စၟတ် (၁) ဍုၚ်မတ်မလီုဂှ်ဝွံ ဟိုတ်နူကဵုညးသွံဖျာတအ် ထပက်လဝ် ဂဥုဲစဵုဒၞာတုဲမံၚ်အိုတ်ဂှ်ရ ဂွံလဝ်အခေါၚ်ပံက်ဖျာယျဏောၚ် ညးတာလျိုၚ်ကမ္မတဳဖျာ စၟတ် (၁) မွဲတၠ ဥုသဵု ဟီုရ။
“ဆေၚ်ဖျာက္လေၚ်ပံက်ဂှ် အောန်မံၚ်ဏီ။ ဖျာက္လေၚ်ပံက်လၟုဟ်ဏံဂှ်လေဝ် လ္ၚဵုဂှ် ဒးပလေဝ်ပလေတ်၊ ဒးကၠောန်မံၚ် ပရေၚ်သၟးဇ္ၚးဏီဏောၚ်” ဂးရ။
ပ္ဍဲကဵုဍုၚ်မတ်မလီုဂှ်ဝွံ ပဲါနူကဵုဖျာစၟတ် (၁) ဏံတုဲ ဗီုကဵုဖျာဇၞော်ပန်ထပ် မျာၚ်ရတနာကဵု ဆေၚ်ဖျာဇၞော်၊ ဍောတ်တအ်ဂှ်လေဝ် ယဝ်ခါရ ထ္ၜးကဵုလိက်စၟတ်သမ္တီ၊ လိက်ထံက်ဂလာန် ဒဒှ်ရထပက်လဝ်ဂဥုဲစဵုဒၞာဏံ တုဲဒှ်မံၚ်ယျဏောၚ်ဟီုမ္ဂး ဂကောံဗဂဵုလဟဵုဍုၚ်မန် (စည်ပၚ်သာယာရေးအဖွဲ႕) တအ် ကဵုမံၚ်အခေါၚ်ပံက်ဖျာရဏောၚ် ဂွံတီကေတ်ရ။
ပ္ဍဲကဵုတွဵုရးဍုၚ်မန်ဂှ် စနူကဵုဂိတုအံက်တဝ်ဗာ စၟတ်တ္ၚဲ (၁) ဂှ်တုဲ စဵုကဵု (၂၄) ဂှ်ဟီုမ္ဂး လၟိဟ်မၞိဟ်ဒးဒုၚ် ကၠောံလဝ်ယဲဂှ် နွံမံၚ် (၉၄၃) တၠတုဲ ပ္ဍဲကဵုဂှ်ဝွံ လၟိဟ်မၞိဟ် (၄၅) တၠ ဒးချိုတ်အာလဝ် နွံမံၚ်ရောၚ်ဂှ် ဂွံတီကေတ်လဝ် နူဌာနဝန်ဇၞော် ပရေၚ်ထတ်ယုက် တွဵုရးဍုၚ်မန်ရ။
