အံက်သာ၊ ဂျာန္နဝါရဳ ၁၃၊ ၂၀၂၂

ဒေသကၞောတ်ၜဳရေဝ် ပ္ဍဲတိဍာ်ဗၠးၜးဗော်ဍုၚ်မန်တၟိမွဲဒၞါဲ ဒၞါဲဂှ် ညးဒေသတံကော်ဂး ၜါသွာၚ်၊ ကျာ်မသုန်၊ ဗလးဒဵုကပေါဝ် ဇိုၚ်ဒဵုဗျုဂှ် တၠဂုဏ်အ္စာထပိုဲဍောတ် (ကော်) ကျာ်ဇၞော်အ္စာ ဘဒ္ဒန္တပုပ္ဖရမ္မ ဘာကျာ်ဒဵုတၟံဗြာတ် က္လိလဝ်ဂွံဒါန်တိဂြိုပ်ဒဵု မွဲလ္ၚီဨကတုဲ ကျာ်ဇၞော်အ္စာ ရန်တၟံကဵုသတ်ဂြိုပ်ဂမၠိုၚ် ဂွံတန်တဴအာ ဗွဲတသိုက်တုဲ ကၠောန်ဗဒှ်အာ ဂြိုပ်ဥဒျာန်စေတဝန်မွဲရောၚ် ဂွံတီကေတ်ရ။
နူဒဒန်ဗုသၠုၚ်ကျာဍုၚ်ရေဝ်ဂှ် ပါ်တိတ်အာလ္ပာ်ဗၟံက် ဂၠံၚ်အာကွာန်ဝါဗိုၚ်၊ ကွာန်ဝါဇြေန်တေံ နူဍုၚ်ရေဝ်မၞုံဇ မ္ၚောဲ (၂၈) တိုၚ်တုဲ တိဂြိုပ်ဒဵုတံဂှ် ဒှ်တိဗော်ဍုၚ်မန်တၟိ ပိုၚ်ပြဳအုပ်ဓုပ်လဝ်ရ၊ “ရန်တၟံဂွံကၠောန်ဗဒှ် ဂြိုပ်စေတဝန်ဏံဂှ် နွံမံၚ်အဓိက ၜါတၚ်ရ၊ တၚ်မွဲဂှ် ဂွိၚ်ဖေက်ဂြိုပ်ဒဵုသဘာဝဏံ လီုလာ်အိုတ်အာရ၊ မုပရောဟီုမ္ဂး အဲရံၚ်ကဵုညးတၠဓနကမ္ပဏဳတံ ဍေမ်လုပ်မံၚ်ဏောၚ်၊ ဒးထ္ၜးကြပ်ပ်တှေ် ဗီုကဵုနဳဗောန်ဖံၚ်ဒေယှေန် နူကဵုဍုၚ်ဂျပါန်တံ ဗက်သိုၚ်ကဵုဒၟံၚ်သ္ၚိတံဂှ်တှေ် ပရေၚ်တဴတက်ဂှ် လုပ်ကေတ်ကၠုၚ်ဒၞါဲသိုက်က်တုဲ ဂြိုပ်သဘာဝတံဏံ ကၠေံအာအိုတ်အာဏောၚ်၊ တၚ်ၜါဂှ် ဂွိၚ်ဖေက်သတ်ဂြိုပ်တံ ကၠက်အိုတ်အာရ၊ ဂြိုပ်တံဏံဟၟဲတုဲတှေ် သတ်ဂြိုပ်တံဂှ် အလဵုဂွံဒၟံၚ်အိုတ်ရော၊ ဟိုတ်ဂှ်ရ ဂြိုပ်ဒဵုသဘာဝ သတ်ဂြိုပ်သဘာဝတံဏံ ညံၚ်ဟွံဂွံကၠေံကၠက်အာဂှ် ဒးမၚ်မွဲထိၚ်ဒဝ်ဏောၚ်” သာ်ဏံ ကျာ်ဇၞော်အ္စာသောၚ်ထ္ၜး ဟိုတ်ဂွံဒှ်ကၠောန်ဂြိုပ်ဥဒျာန်စေတဝန်ဂှ်ရ။
ဒၞါဲဂြိုပ်ဒဵု မကၠောန်ဗဒှ် ဥဒျာန်စေတဝန်ဂှ် လောန်ကၠုၚ်ၜါသၞာံတုဲကၠုၚ်တေံ ဗော်ဍုၚ်မန်တၟိကဵုလဝ်ဒါန် ကုကျာ်ဇၞော်အ္စာကျာ်ဒဵုတၟံဗြာတ်တုဲ ပ္ဍဲကၠအ်ဥဒျာန်စေတဝန်ဂှ် သွက်သ္ဂောံဒက်အာကျာ်နွံရ၊ အခိၚ်လၟုဟ် ဍိုတ်၊ ဗတဳ သီုကဵုကျာ်တၟံပဋိမာရုပ်မွဲဇကု ကေတ်နိမန်ကညပတိုန်ဏာလဝ် စိုပ်ဒၟံၚ်လ္တူဒဵုပ္ဍဲကၠအ်ဥဒျာန် ဒဵုဗလးကပေါဝ် တေံတုဲရ၊ ရံၚ်အာအကာဲအရာတုဲ ခြာဟွံလအ် ဆက်ဓမံက်အာ ရုပ်ရဴရောၚ်။