မာံသုခ၊ မေ ၂၄၊ ၂၀၂၂
ပ္ဍဲစၟတ်တ္ၚဲ 19.5.2022 ဂှ် နူကဵုညးတာလျိုၚ် ခရိုၚ်မတ်မလီု က္ဍိုက်ပ် ပံၚ်တောဲကဵု အုပ်ဓုပ်ကွာန်တအ်တုဲ ထံက်ပၚ်ဏာလဝ်ဇွောံမသ္ၚု သွက်ညးပဲါဒဴဘဲပၞာန် ဂကူကရေၚ်၊ ဂလာ မၞုံပ္ဍဲတိဍာ်လှာဒကှ် ခရိုၚ်မတ်မ လီုဂှ်နွံရ။
“ပိုဲဂှ် နူကဵုအုပ်ဓုပ်ကွာန်တအ် ပွိုၚ်ဍုၚ် ခရိုၚ် အာတ်ဂွံဒါန်မလှုဲတုဲ ပိုဲရာန်လဝ်သ္ၚုၜိုတ် (၁၀၀) ညးဒဴဘဲပၞာန်ဠပိုဲအာကဵုဏံဂှ် ဍေံအောန်စှေ်အာတုဲ ပိုဲချိၚ်ကဵုလဝ် တုဲညိ ညးနွံမံၚ်အကြာကွာန်မန်လ္ၚဵု တအ်ဂှ်လေဝ် ပိုဲသၟာန်ဟဍာံတုဲ ဆက်ကဵုအာညိညိပၠန်ဏောၚ်” သာ်ဏံ ညးအုပ်ကာခရိုၚ်မတ်မလီု နာဲဗညာမသာန် ဟီုရ။
ကွာန်မထံက်ပၚ်ဏာလဝ်ဂှ်ဝွံ ကွာန်ဝါဂြာဲ (ဒရယ်ကွၚ်ကျေးရွာ) (၃) ရိုက် ၊ ကွာန်ကသီု (ကွမ်ကသောၚ်ကျေးရွာ) (၁၅) ရိုက်၊ ဖာဟရေဝ် (ဖာတလဲကျေးရွာ) (၅) ရိုက်၊ သီုဖအိုတ် ပံၚ် (၂၅) ရိုက်နွံရ။
ညးပဲါဒဴဘဲပၞာန် စိုပ်ကၠုၚ်ဒေသလှာဒကှ်ဝွံ လောန်ကၠုၚ်အကြာမွဲဂိတုပြၚ်တေံ လၟိဟ်မၞိဟ်ကဵုလ္ၚီနွံတုဲ လ္ၚဵုက္လေၚ်စဴသ္ၚိဌာန်တအ်နွံတုဲ လၟုဟ်မ္ဂး နွံအကြာ (၅၀၀) တၠပြၚ်ရ ညးအုပ်ကာ ခရိုၚ်မတ်မလီု နာဲဗညာမသာန် ဟီုလဝ်ကီုရ။
ဟိုတ်နူပေဲါဗတိုက်အကြာ ဒပ်ပၞာန်ကရေၚ် KNU ကဵု ဒပ်ပၞာန်ဗၟာဂှ် ညးဍုၚ်ကွာန်သ္ကုတ်ဒေသဝၚ်ရော (ဝၚ်းရော်ဒေသ) မပ္တံကဵုကွာန်(ခလယ်၊ မြို႕ဟောၚ်း၊ ခလယ်ရွာလေး၊ နောၚ်းဒေ့ (ကွာန်ကြုၚ်တူ)၊ ဘုရားၚါးဆူ (ကွာန်ကျာ်မသုန်)၊ တံခွန်တိုၚ်၊ နန်းသိုၚ်းထွန် (ကွာန်ဝါဇြပ်)၊ တံခွန်တိုၚ်ရွာလေး၊ ပူလိန်၊ ဒိုၚ်လွတ်၊ ကမော့ဝမ်း) တအ် လၟိဟ်ကဵုဠက်ဒးပဲါဒဴဘဲပၞာန်တုဲ လၟိဟ်မၞိဟ်ကဵုလ္ၚီဂှ် စိုပ်ကၠုၚ်ဗၟံက်ၜဳဝၚ်ရော ဒေသလှာဒကှ်တအ်နွံရ။
