မယံၚ် (ဍုၚ်မန်)

တုဲကၠုၚ်မွဲၜါတ္ရဲဏံ နူကဵုရုၚ်ကုမ္မဏဳ ဍာ်ခေါ် (Coca Cola) (ဍာ်ဍာတ်ဍာတ်) တံ ကဵုကၠုၚ်ပရိုၚ် ကုတၠဆေၚ်ဖျာဂမၠိုၚ် အကြာဏံ ဍာ်ခေါ်သွက်ဂွံပိုတ်အာ မွဲချိုန်ခဏနွံရောၚ် နူကဵုညးစၞးရုၚ်ကုမ္မဏဳဍာ်ခေါ်ဂှ် ဒစးဒုၚ်လဴကဵုလဝ်ပရိုၚ် ကဵုတၠဆေၚ်ဖျာ မၞုံလ္တူဍုၚ်၊ အကြာကွာန် အရာပ်တံရ။

နူဂှ်တုဲ တၠဆေၚ်ဖျာဂမၠိုၚ်တံလေဝ် ဍာ်ခေါ်ၜိုတ်သှ်ေမံၚ်ပ္ဍဲဖျာဂှ် သၠုၚ်ပတိုန်င္ရုဟ်ညိတုဲ သွံမံၚ်အတိုၚ်လၟေၚ်ဓမ္မတာရ၊ ညးသုၚ်စောဲမံၚ်ဍာ်ခေါ် ဖက်နှဴဍုန်ၜိုဟ်ကဵု တၞးဘိၚ် (ၜါဲကထမ်) လ္ရဵုတံ မိၚ်တီစုတ် အကြာဏံ ဍာ်ခေါ်သွက်ဂွံပိုတ်အာ မွဲခဏနွံရောၚ်သ္ဂးတုဲ ညးသုၚ်မံၚ်ဍာ်ခေါ်သၟးသၟးဗွဲမဂၠိုၚ်တံကီု၊ ညးသုၚ်စောဲမံၚ် ဍာ်ခေါ် ဖက်နှဴဍုန်ၜိုဟ်ကဵု တၞးဘိၚ်(ၜါဲ ကထမ်)တံဂှ်ကီု ဒှ်ကၠုၚ်ဂဝိၚ်ဖေက်ဟွံဂွံသုၚ်ဍာ်ခေါ်၊ ဖေက်ဟွံဂွံသုၚ်စောဲ ဍုန်ၜိုဟ်ဍာ်တၞး၊ ဖေက်ဍာ်တၞး(ဘိၚ်)ပိုတ်အာ တုဲ ညးဂြိပ်အာရာန်၊ အဲဂြိပ်အာရာန်တုဲ ဍာ်ခေါ်ၜိုတ်သှ်ေမံၚ်ပ္ဍဲဆေၚ်ဖျာတံဂှ် မွဲလစုတ်ဓဝ် သှ်ေအောန်စှ်ေအာကွေံကွေံ ဂှ်ရ တၠဆေၚ်ဖျာလ္ရဵုတံ သၠုၚ်ပတိုန်ထောံင္ရုဟ် မွဲဍေင် (တဲလ္ဒောဝ်) ၄၀၀၀ ဒ္ကေဝ်၊ က္ဍၚ်တိုန်ကဝက်ရ။

အခါရ ညးသုၚ်စောဲမံၚ်ဍာ်တၞးၜိုဟ်နှဴကဵုဍာ်ခေါ်မွဲတၠဂှ် “မွဲဗူ ၅၀၀၀ လေဝ် သ္ဇက်သ္ပဟွံမွဲ မူစိဒှ်ဒှ် ဒးရာန်ဂှ်ရ၊ ဍာ်ခေါ်ပိုတ် အာဟွံဂွံပုဟ်၊ ဍာ်ခေါ်ပိုတ်အာတှ်ေ အေၚ်ကၠောဝ်ပုၚ်ရ” သ္ဂးတိုန်ရ။ အဓိပ္ပါဲညးတေံဟီုဂှ် ဍာ်တၞးၜိုဟ်ဂှ် ပိုတ်အာမ္ဂး မု လေဝ်ကၠောန်ဟွံမာန်ရ၊ မုကၠောန်ဟွံမာန်ဂှ်ရ ဒးအေၚ်ကၠောဝ်ပုၚ်ဏောင် ညးတေံ ဟီုသ္ဂးတိုန် ဟွံဒးရောံဒညမွဲသာ်ရ။

ပရိုၚ်ဍာ်ခေါ်သွက်ဂွံပိုတ်နွံရောၚ်ဂှ်တုဲ မၞိဟ်တဲအဒေါဝ်၊ အဝဲသၟတ်၊ သၟတ်ပၠိုၚ်ပၠိုၚ် ဍောတ်ဍောတ် မွဲဏှ မွဲခွက်၊ မွဲဏှ ကဵုဖာ သ္ပမံၚ်ကမၠောန်ပၠံၚ်ရာန်မံၚ်ဍာ်ခေါ် နူဆေၚ်ဖျာတံအိုတ်ရ။

ဍာ်ခေါ် ဖက်နှဴကဵုဍာ်တၞးဘိၚ် (ၜါဲကထမ်) ဂှ် မၞိဟ်သုၚ်စောဲမံၚ်ဗွဲမဂၠိုၚ်တံ ကြပ်ဖအိုတ်ဂှ် ဂလာန်ညးတံဟီုကြဴမံၚ် မွဲတၚ်ဂှ် “ဍာ်တၞး(ၜါဲကထမ်)ၜိုဟ်နှဴကဵုဍာ်ခေါ်ဏံဂှ် မၞိဟ်တံဟွံဒှ်အန္တရာဲမွဲသာ်တုဲ သုၚ်စောဲလဝ်ဍေံတုဲ စိုတ်လေဝ် ဟွံကြာန်ပုဟ်၊ ဇိုၚ်တဲလေဝ်သာဍာ၊ ဟွံစောဲလာမ်ပုဟ်၊ ဟွံဂွံသုၚ်စောဲလေဝ် မုဟွံဒှ်ပုဟ်” ဂးသာ်ဏံ ကီုလေဝ် ဇၟာပ်မၞိဟ်သုၚ်စောဲမံၚ် ဍာ်တၞး (ၜါဲကထမ်) ၜိုဟ်နှဴကဵုဍာ်ခေါ်ဂှ် တ္ရဲပိုတ်ခြာအာမံၚ်ဟွံမာန်တုဲ ဒးသ္ပမံၚ်ကဵု ဒးအာဂၠာဲရာန် တၞးဘိၚ်၊ ဒးအာရာန်မံၚ် ဍာ်ခေါ် လၟိုန်အခိၚ်လၟေၚ်တ္ရဲဂှ် အခါရစိုတ်စောဲလာမ်အာရဂှ် ဘိၚ်တၠိၚ်မံၚ် ညံၚ်ကဟွံဆဵုဍာ် ကီုရ။

တၞးဘိၚ်(ၜါဲကထမ်)ဂှ် ဒးဂၠာဲကၠတ်ရာန်ကေတ်ကီုလေဝ် ရာန်လောဲသွာနူကဵု ရာန်ဍာ်ခေါ်ပ္ဍဲဖျာဏီရ။ မုဟိုတ်ရောဟီုမ္ဂး ရံၚ်အခါတ်အကာဲကေတ် မၞိဟ်ဒှ်ဂဝိၚ်ကဵု ဍာ်ခေါ်ပိုတ်အာတံ ဗက်ဂၠာဲရာန်မံၚ် ဍာ်ခေါ်နကဵုင္ရုဟ်က္ဍၚ်ၚ်ဂှ်တုဲ ယိက်တီ ကေတ်မာန်ရ။

အဓိပ္ပါဲမ္ဂး တၞးဘိၚ်(ၜါဲကထမ်)ဂှ် ၜိုန်ရဒးဂၠာဲကၠတ်ရာန် မ္ရးမၞိဟ်၊ မ္ရးကွာန်ကီုလေဝ် အခိၚ်ဟွံရုဲရာန်ကေတ်ဂွံမံၚ်ရ။ ဍာ် ခေါ်ဂှ် ၜိုန်ရ ရုၚ်ကမ္ပဏဳတံ နွံအဒေါဝ်ဍုၚ်၊ ဖျာသွံဍာ်ခေါ်တံ နွံဇၟာပ်ဍုၚ် ဇၟာပ်ကွာန်ဂှ် အခိၚ်ဍေံပိုတ်အာမ္ဂး ဆေၚ်ဖျာလဵု လေဝ်ရာန်ကေတ်ဟွံဂွံတုဲ ဍာ်ခေါ်ပိုတ်အိုတ်အာဂှ် မၞိဟ်သုၚ်စောဲမံၚ်တံ ဒှ်ဂဝိၚ်ဂၠိုၚ်နူကဵု တၞးဘိၚ်(ၜါဲကထမ်)ဂှ်ဏီ တော်ဒးရ။

တၠဆေၚ်ဖျာသွံဍာ်ခေါ်လတူဍုၚ်မုဟ်ဍုၚ်မွဲတၠဂှ် သာ်လဵုညးတေံဟီုရောမ္ဂး- “ဆေၚ်စပ်ကဵုဍာ်ဍာတ်ဍာတ်ဂလိုၚ်ဂှ်တှ်ေ ဍာ်ခေါ်ဂှ် လုပ်အဝေါၚ်သွံခိုဟ်အိုတ်မွဲ၊ င္ရုဟ်ပၠန်လေဝ် နူရုၚ်ကမ္ပဏဳဍေံခုတ်လဝ် ၜိုတ်လဵုဒှ်ဒှ် ပ္ဍဲဆေၚ်ဖျာသၟဝ်ဏံ ဗပဵုက္ဍၚ်တိုန်ဂလိုၚ်လဵုလေဝ် ရဲသုၚ်တံ ဟွံဂွိၚ်ပုဟ်၊ ရာန်ကေတ်ဂွံမံၚ်တှ်ေတုဲ မွဲဗူ ၂၀၀၀ ဂှ် ဒးရာန် ၅၀၀၀ လေဝ် ညးတံ ဟွံဂွိၚ်ပုဟ် ရာန်ကေတ်ဂွံမံၚ်တှ်ေတုဲရ၊ လဆောဝ်ပိုတ်အာတှ်ေ ရဲဂၠာဲရာန်ဍာ်ခေါ်တံ ဗီုကၠဵုတမြအ်ရ၊ ဃဴ(ဃရေက်ကွာ်) အာ ဃဴကၠုၚ်တုဲ ဗက်ဂၠာဲသၟာန်ဆေၚ်တေံ၊ ဗက်ဂၠာဲသၟာန်ဆေၚ်ဏံ ရံၚ်ဟဏံမၞိဟ်က္ဍဟ်ဟွံလီုလေဝ် ဒှ်အာဗီုတမြအ်မွဲဣ ရ” သ္ဂးရ။

ဍာ်တၞးဆု (တၞးဘိၚ်) ကော်(ၜါဲကထမ်) ၜိုဟ်ဍုန်ဖက်နှဴသုၚ်ကဵု ဍာ်ခေါ်ဂှ် မုဟိုတ်မၞိဟ်သုၚ်စောဲတံ သုၚ်စောဲဒးတုဲ ဂွံဒှ်စောဲလာမ် ဗလးဟွံမာန်၊ တုဲပၠန် သုၚ်စောဲလအ်တိုန်မ္ဂး က္ဍဟ်လီုတုဲ စိုတ်ဓာတ်ယောၚ်ယာ ဒှ်ဗီုတမြအ်ဂှ် ဟိုတ် သာ်လဵုရောဂှ် ဒှ်မံၚ်ပဟေဠိ မွဲရ။

မုဟိုတ်ရောမ္ဂး တၞးဆု ကော်တၞးဘိၚ်(ၜါဲကထမ်)ဏံဂှ် လုပ်မံၚ်အဝေါၚ်ဂြန်ဂဥုဲတေၚ်ဇက် မွဲဂကူတုဲ သၟာကမၠောန်မန် မၞုံပ္ဍဲဍုၚ်သေံတံ နကဵုတၞးလတ်လတ်ကီု၊ စဲဗကှ် ဗုတ်ဗဒှ်လဝ်ထၟိက် သ္ပဂဥုဲတဗျတုဲ မၞိဟ်ဗွဲမဂၠိုၚ် သုၚ်စောဲမံၚ်အိုတ်ရ။ နကဵုအလဵုအသဳသေံတံလေဝ် တၞးဆု ကော်မံၚ် တၞးဘိၚ်(ၜါဲကထမ်)ဏံဂှ် ဟွံလုပ်အဝေါၚ်ဂဥုဲၜူမာဲတုဲ ကဵုလဝ် အခေါၚ် သုၚ်စောဲဗၠးဗၠးၜးၜးရ။

ဍာ်ခေါ်(Coca Cola) ဂှ်ပၠန်လေဝ် ပ္ဍဲဍုၚ်သေံကီု၊ ပ္ဍဲဍုၚ်(ကၟိန်ဍုၚ်ဗမာ)ကီု သ္ပလဝ် ဍာ်ဍာတ်ဍာတ်မွဲဂကူတုဲ သုၚ်စောဲမံၚ် သၠဲသၠဲလးလးလုပ်သၞောဝ်ရ။ ယဝ်ခါရ လုပ်အဝေါၚ်ဒှ်အန္တရာဲကုမၞိဟ်တံမ္ဂး အလဵုအသဳဍုၚ်တံ သွက်ဒးရပ်စပ်တွဵုရ။

လညာတ်မၞိဟ်လ္ရတ်အခါတ်အကာဲမံၚ် ပရေၚ်ဍာ်တၞးဘိၚ်(ၜါဲကထမ်) နူဍုၚ်ဇြပ်ဗု မွဲတၠ ညးတေံဟီုဂှ် “လညာတ်အဲတှ်ေ တၞးဘိၚ် ပိုဲကော်မံၚ်ဏံဂှ် တၞးဆု လုပ်အဝေါၚ်ဂဥုဲတဗျ တေၚ်ဇက်မွဲဂကူရ၊ မၞိဟ်တံ သုၚ်စောဲလေဝ် မုဟွံဒှ်အန္တရာဲမွဲသာ် ပုဟ်၊ ဠ အာဖက်နှဴကဵုဍာ်ခေါ်ဂှ်မှ ဍေံဒှ်တိုန် ဗီုဂဥုဲဝိဝိၚ် မွဲဂကူကီုဏံဂှ် ဍေံတၟေၚ်မံၚ်ညိ၊ အဲညာတ်ဂှ်မွဲဗီု ပ္ဍဲစိုတ်အဲတှ်ေ ဍာ်ခေါ် (Coca Cola) ဂှ် မၞိဟ်သုၚ်ဍေံသၟးသၟးတံလေဝ် သုၚ်ဒးဍေံတုဲ ဟွံဂွံသုၚ် မံၚ်ဟွံမာန်၊ ဒးရာန်သုၚ်မံၚ်ဍေံဟဂှ် စွံသ တိတှ်ေ ဆဵုဏောၚ်၊ ဇှ်ရ အဲစှ်ေစိုတ်တှ်ေ မၞိဟ်တံဂွံစောဲလာမ်ကီု၊ သုၚ်စောဲလအ်တုဲ ဂွံကြအ်ယှောတ်ဝိုက်အာ ဗီုတမြအ် ကီုဂှ် ဆေၚ်စပ်ကဵု ဍာ်ခေါ်(Coca Cola)ဏံဏောၚ် အဲစှ်ေစိုတ်” ညးစှ်ေစိုတ်ရ။

ဆဂးဂှ် ဆေၚ်စပ်ကဵု ဍာ်ခေါ်(Coca Cola) ဏံတုဲ သုၚ်စောဲဍေံၜက်သၞောတ်မ္ဂး ဒှ်မံၚ်အန္တရာဲဏောၚ်၊ ဓာတ် က္ဍဟ်မၞိဟ်တံ ညံၚ်ဂွံလီု။ ကပေါတ်ဓာတုသွက်ဂွံကတဵုဒှ်ဘဲအန္တရာဲ ဇီုကပိုက်ကဵု ပရေၚ်ထတ်ယုက်မၞိဟ်တံမာန် မံၚ်ရောၚ်ဂှ် ဒံက်တာ အ္စာသဝ်ဝန် လဵုလေဝ် ဟီုဗမံက်ပတိတ်ကၠုၚ်လဝ် ဟွံဆဵုရ။

ဟိုတ်နူတၞးဆု ကော် တၞးဘိၚ်(ၜါဲကထမ်)ဂှ်ဟာ ဟွံသေၚ်မ္ဂး သုၚ်စောဲဒး ဍာ်ခေါ်(Coca Cola)ၜက်သၞောတ်ဟာ၊ ဗီုဂှ်ဟွံ သေၚ် တၞံဆု(ၜါဲကထမ်)ကဵု ဍာ်ခေါ်(Coca Cola)ၜါသာ်ဏံ သုၚ်ဖက်နှဴဒးတုဲ မၞိဟ်တံ စောဲလာမ် ၜူမာဲ ဝိဝိၚ်အာဟာဂှ် အ္စာသုတေသနလ္ရတ်ဂၠိုက်ဂၠာဲတံ ပတိတ်လဝ်ဟွံဆဵုကီုလေဝ် မၞိဟ်ဇၞော် မၞိဟ်ဍောတ် မၞိဟ်ပၠိုၚ်ပၠိုၚ် အဝဲဇဳ မၞိဟ် သုၚ်စောဲလဝ် ဍာ်တၞးဍုန်ၜိုဟ် ဖက်နှဴလဝ်ကဵု ဍာ်ခေါ်(Coca Cola)ဗွဲမဂၠိုၚ်ဂှ် ဝိဝိၚ် ဘိၚ်တၠိၚ် ၜူမာဲ ကြအ်ယှောတ် ဒိုဟ်ဓီု က္ဍဟ်လီုအာ ဟွံသာလးလးအိုတ်ရရောၚ်။