လညာတ်ပါ်ပါဲ၊ ယက္ခဂုမ္ဘဏ်
ဂကူမန်ဂှ် ဒှ်ဂကူမၞုံကၠုၚ်ကဵုဝၚ် ဗွဲမခိုၚ်ကၠိုက်တုဲ ကောန်ဂကူမန်ပိုဲတံ ကေတ်စမံၚ်စရာဲအိုတ်ရ။ ဂကူမန်ပိုဲ ဗွဲမဂၠိုၚ်ဂှ် ၜိုန်ရဒှ်မံၚ်ဘဝဍိက် ဟွံမွဲကဵုဍုၚ်ဗၠးၜးကီုလေဝ် ဘဝၚ်စိုတ်သၠုၚ်မံၚ်တုဲ ဂကူညးတၞဟ် ညံၚ်ကဵုၜိုတ်ဂကူမန်ဇကုဟွံဒှ် ကေတ်စမံၚ်စရာဲ လ္တူဇကုဇကုဂှ် လ္ရတ်ရံၚ်ချိုတ်တ်ပၠိုတ်မ္ဂး ဂွံတီကေတ်မာန်ရ။
“ဂကူဗၟာဂှ် ဂွံလဝ်ဍုၚ်၊ ဂကူကရေၚ်ဂှ် ဂွံလဝ်ဂြိုပ်၊ ဂကူမန်ဂှ် ဂွံလဝ်ဝၚ် ပြိုက်ဏာပြိုက်နၚ် ပ္ဍဲထိုၚ်ပဠောံတုဲ ကြီုအာ ကြီုကၠုၚ်” ဂလာန်ဏံ ညးမဒှ်ကောန်ဂကူမန် ဆာန်ဂကူ မန်ဍုၚ်သေံ နာဲဍာံရောၚ် (ကော်) နာဲၜၚ်က္ဍဳ ဟီုမံၚ်လၟိုန်ကာလ ဂွံမိၚ်ကေတ်ရ။ ဂလာန်ဏံ ဇၟာပ်ညးမဟီုပတိတ် ညးမက္လၚ်တံ ဒးကအ်တုဲ ဂြိုၚ်တိုန်လၟိုန်ရ။ ဍာံဍာံတေံ ဂလာန်ညးဟီုဂှ် ဒှ်ဂလာန်ဗျံက် သွက်သ္ဂောံဂြိုၚ်ဝေၚ် ဟွံသေၚ်ရ။ ဂလာန်ဂှ် ချပ်ဗ္စာရံၚ်ဇြိုဟ်ဟ်နက်က်မ္ဂး ဒှ်ဂလာန်ဍာံပြ ဒှ်ဂလာန်ကဵုသတိတုဲ ထေက်ကဵုသ္ဒးဂွံသတိရောၚ်။
က္ဍိုပ်သ္ကိုပ်တိုန်ကၠုၚ်မွဲ ဟီုကြီုဝၚ်အတိက်တုဲ သ္ရဳသ္ရိတ်မံၚ် ဆၜိုတ်ထိၚ်လဝ် ခုၚ်ဂ္ဇအ်၊ က္ဍိုပ်သ္ကိုပ်တိုန်ကၠုၚ်ၜါလေဝ် ဟီုကြီုဝၚ်အတိက်တုဲ သ္ရဳသ္ရိတ်မံၚ် ဆၜိုတ်ထိၚ်လဝ် ခုၚ်ဂ္ဇအ်ပၠန်ဂှ် ဆဵုမံၚ်ဇၟာပ်မၞိဟ်ရ။ ဒြဟတ်ဟွံမွဲဏီတုဲ မၚ်မံၚ်ဒြဟတ်မၞိဟ် ဒြဟတ်သြန်ကၠးကၠးဂှ် ညးတၞဟ်ၜက်အာအိုတ်ရ။ ကြီုမံၚ်ကဵုဝၚ်အတိက် အခိုက်ဟွံလီု အတိုၚ်တြေံရ။
ဂကူဍောတ်တ် ဝၚ်လေဝ်ဟွံခိုၚ်ကၠိုက် တွဵုရးလေဝ် ဟွံမွဲ ဗီုကဵုဂကူဝ၊ ဂကူတအၚ် ပလံၚ်၊ ဂကူကိုဝ်ကတံ အဆံၚ်ပၠန်ဂတးညးတံ ၜက်သၠုၚ်တိုန်အာ ဒဵုကဵုဂကူမန် ကေၚ်နွံကၠုၚ်ကဵုဍုၚ်နန်တံ က္ဍကျောဝ်ဟွံညာတ်ရ။ ဂလာန်တံဏံ ဂလာန်ဖျေံကဝုဟွံသေၚ် ပကတိရုပ်မကတဵုဒှ်မံၚ်ဍာံ ဂတမတ်ပိုဲတ္ရဲဏံ ဆဵုညာတ်မံၚ်တုဲ ဒှ်ဂလာန်ထံက်ထ္ၜး သွက်သ္ဂောံင္ရုဟ်ကတဵုနူဂၠံသတိက်ရောၚ်။
လ္တူဂလာန်ထံက်ထ္ၜးဏံ “နာဲတံတီ ဆဟီု၊ နာဲတံတီ ဆချူတုဲ သွက်ဂကူသ္ဂောံတိတ်ဗၠးနူဘဝဍိက် မုနာဲတံကၠောန်လဝ် နွံကီုရော” သွက်သ္ဂောံဒးက္လေၚ်ထံက်ထ္ၜးနွံရ။ ပွဗီုတံဏံဂှ် ဒှ်ပွမဟီုပတိုန်ဖျေံရေၚ်သ္ကံရ။ လ္တူဂလာန်တံဏံ နကဵုလညာတ် ညးချူလိက်ဏံ မိက်ဂွံပါ်ပရအ်ဏာရ။ ပ္ဍဲကဵုဂကူမွဲမွဲ ကွပ်အဆံၚ်မၞိဟ်နွံနာနာရ။
ဟိုတ်နူနွံကဵုကွပ်နာနာဂှ်ရ လညာတ်ဒုၚ်ဂိုၚ်ကေတ် နွံနာနာတုဲ ကမၠောန်စပ်ကဵုဂကူလေဝ် ကၠောန်မံၚ်နာနာရ။ ဒးထ္ၜးဥပမာမ္ဂး ညံၚ်ရဴပေါဲသဘၚ်မွဲကီု ပေါဲသဘၚ်ဂှ် ဂွံဒှ်သဘၚ်မြဟ် ဒယှ်တမ္ညဝ်မွဲ မၞိဟ်ဗဵုပေါဲလေဝ်ဒးနွံ၊ ပေါဲလှ်ေဒယှ်ေလေဝ်ဒးနွံ၊ မၞိဟ်ဗဵုပေါဲတံ ဗုၚ်စံၚ်ဂမ္တဴ ဂွံဗပေၚ်ဗုၚ် ဖျာနာနာလေဝ်ဒးနွံရောၚ်။
သရုပ်ခ္ဍန်ဖျေံညိပၠန်မ္ဂး ပေါဲမၞိဟ်ဗဵုဂှ် ဂွံဒှ်ပေါဲခိုဟ်မွဲ ကောန်သၟိၚ်ဗီုလဵုကျေဝ်ဝ် ဗီုလဵုခိုဟ်ဟ် ယဝ်ဟွံမွဲကဵုဂၞကျာ်၊ မၞိဟ်ပရမ်၊ မၞိဟ်ကတဵုဟရိုၚ်၊ မၞိဟ်ဝေၚ်ပၟတ်၊ မၞိဟ်တံၚ်ဖျေံဂၞိက်၊ မၞိဟ်တက်ထဗိုန် မပ္တံသာ်ဏံမ္ဂး ဒှ်ပေါဲခိုဟ်မွဲဟွံမာန်ရောၚ်။ တၠုၚ်လအာ ညံၚ်ရဴသာ်ဂှ်ကီု ပ္ဍဲဂကူမန်ပိုဲလေဝ် ရံၚ်ကဵုအကာဲအရာဂကူ ဟွံမွဲကဵုဍုၚ်ဗၠးၜး ဒှ်မံၚ်ဂကူဍိက်တုဲ နကဵုလညာတ်သမ္တီညးကဵုညး တၚ်ဒုၚ်ဂိုၚ်ကေတ် ညးကဵုညး ဆာန်မံၚ်ဂကူ၊ ကၠောန်မံၚ်သွက်ဗၠးၜးဂကူ ဗီုညးကဵုညးကီုရ။
ရပ်လွဟ်လက်နက်တုဲ တဝ်စၞေဟ်ကဵုသၞမှ ဒှ်မၞိဟ်ဆာန်ဂကူ၊ ကၠောန်သွက်ဂကူဟွံသေၚ် ဗီုချူလဝ် ပရေၚ်ပေါဲသဘၚ် ဗွဲလ္တူတေံရ။ ဆ္ဂး – အဆံၚ်ကမၠောန်ညးကဵုညး ဟွံတုပ်ရေၚ်သ္ကံရ။ ပ္ဍဲအရာကမၠောန်ဂကူ သ္ဂောံဗၠးၜးမ္ဂး ကမၠောန်ရပ်လွဟ်လက်နက်တုဲ တဝ်စၞေဟ်ကု သၞဂှ် ဟိုတ်နူဒးပံၚ်ကဵုလမျီု ကေုာံ ဆီပဠက်တုဲ ဒှ်ကမၠောန်အဆံၚ်သၠုၚ်အိုတ်မွဲရောၚ် သာ်ဏံ ညးလောကတံ ပ္ညပ်လဝ်ရ။
လစှ်ေဂှ်မ္ဂး ကၠောန်ကမၠောန် ပ္ဍဲဗော်ပရေၚ်ဍုၚ်ကွာန်မွဲမွဲမ္ဂး အဆံၚ်ဒုတိယ၊ လစှ်ေဂှ်ပၠန် ကၠောန်ကမၠောန်ဆေၚ်စပ်ကဵုလိက်ပတ်တံ လၟေၚ်ၚ်နွံတုဲ အဆံၚ်သဝ်အိုတ် တုပ်တဴညံၚ်ရဴ ညးဗဵုပေါဲ ကၠုၚ်စိုပ်ဗဵုပေါဲ ညံၚ်သဘၚ်ဂွံဒှ်ဂှ်ကီု ပ္ဍဲဂကူမန် ညးမဟီုအရေဝ်ဘာသာမန် သွက်ဂကူမန်ဂွံသှ်ေသၟေဟ်တဴ ပ္ဍဲလိုက်ဏံဂှ် ဒှ်ညးဆာန်ဂကူ ဒှ်ညးကၠောန်သွက်ဂကူ ကွပ်ညးကဵုညး အဆံၚ်ညးကဵုညးအိုတ်ရ။
ပ္ဍဲကဵုအရာဏံ မုမိက်ဟီုသ္ဂးရောမ္ဂး အတိုၚ်ဓဝ်ပတှ်ေဇကု ကမၠောန်ဇကုကၠောန်ဂှ် ဒှ်ကမၠောန်ရပ်လွဟ် အဆံၚ်သၠုၚ်အိုတ်တုဲ ဇကုမှဇကု ကမၠောန်ဇကုကၠောန်ဂှ်ဟေၚ်ရ ဒှ်ကမၠောန်ကၠောန်သွက်ဂကူ ညးတၞဟ်ဟီုဂးထံက်ထ္ၜးမ္ဂး “နာဲတံတီ ဆဟီု၊ နာဲတံတီ ဆချူတုဲ သွက်ဂကူသ္ဂောံတိတ်ဗၠးနူဘဝဍိက် မုနာဲတံကၠောန်လဝ် နွံကီုရော” မပ္တံဂလာန်သာ်ဏံ ဟီုဂးဟွံထေက် ဒုၚ်ဂိုၚ်ကေတ်လဝ် ဟွံထေက်ရောၚ်။
ကမၠောန်ပၠန်ဂတးရပ်လွဟ်ဇကုကၠောန်ဂှ် သၟိက်မိက်ဂွံကဵုအံၚ်ဇၞး စိုပ်တိုၚ်ပ္ကဴပြဟ်ဟ်မ္ဂး ပိုဲတံသ္ဒးဗ္ဒဗ္ဒါဲကဵုကောန်ဂကူပိုဲ အဆံၚ်ၚ်တံဂှ် ရောၚ်။ ကမၠောန်ဇကုကၠောန်ဂှ် ဒှ်ကမၠောန်အဆံၚ်သၠုၚ် ဒှ်ကမၠောန်ပြဲပြဲတုဲ စိုတ်ဓာတ်ဇကု ဟွံသၠဲလးဟွံဂွံ ကမၠောန်ဇကုပြဲမ္ဂး စိုတ်ဓာတ်ဇကု ဒးသၠုၚ်ပြဲကီုရောၚ်။ မၞိဟ်မကၠောန်မံၚ်ကမၠောန် သွက်ဂကူ လစှ်ေနူကဵု အဆံၚ်ရပ်လွဟ်တံဂှ်လေဝ် ညံၚ်ရဴသာ်ဂှ်ကီု ဒးစွံစိုတ်သၠဲသၠဲလးလးတုဲ “အဝ် – ၜိုန်ရဒးသၠာဲကဵုလမျီု ကေုာံ ဆီပဠက်ကီုလေဝ် ညးတံဒုၚ်ပူဇဴလမျီုညးတံမာန်မံၚ်ရောၚ်သွံ” သာ်ဏံ ဒးကေတ်ဂုဏ်စရာဲ လ္တူကမၠောန်ညးတံ မကၠောန်မံၚ်တံဂှ်ရောၚ်။
ထပ်တုဲ သရုပ်ခ္ဍန်ဖျေံညိပၠန်မ္ဂး ကမၠောန်ရပ်လွဟ်လက်နက်တုဲ တဝ်စၞေဟ်ကဵုသၞဂှ် ဟိုတ်နူဒးပံၚ်ကဵုလမျီု ကေုာံ ဆီပဠက်တုဲ ဒှ်ကမၠောန်အဆံၚ်သၠုၚ်အိုတ်မွဲရောၚ် ၜိုန်ရဟီုကီုလေဝ် ပ္ဍဲဂကူမန်ပိုဲတ္ရဲဏံ ဂကောံပၠန်ဂတးရပ်လွဟ်မန်ပိုဲ နွံမံၚ်ၜါဗီု၊ မွဲဗီုဂှ် ရပ်လဝ်လွဟ်တုဲ ဗတိုက်မံၚ်ကဵုသၞ၊ မွဲဗီုပၠန်ဂှ် ရပ်လဝ်လွဟ်တုဲ အာမံၚ်နကဵုပရေၚ်ၜိုဟ်လလမ်ရ။ ဟိုတ်နူအကာဲအရာ ပရေၚ်ဍုၚ်ကွာန်တုဲ ဒးအာၜါဗီုဂှ်လေဝ် သွက်ဂွံဒးဟီုဟွံမွဲမံၚ်ရ။ ဆ္ဂး ဆေၚ်စပ်ကဵုဒှ်မံၚ်ၜါဗီုတုဲ မန်ကဵုမန်လ္ပကဵုဒှ်သၞညးသ္ကံညိ။ ကျောဝ်ညးသ္ကံညာတ်မံၚ်မ္ဂး ရုမ်ဂပ်မံၚ်ရောၚ် ညာတ်ရ။
တာလျိုၚ်မဒုၚ်ကေတ်ယၟု ကၠောန်မံၚ်သွက်ဂကူတုဲ မံၚ်ကၠေံၜိုတ်မဇ္ဇျဟ်ဓဝ်ဂှ် လ္ပကဵုဒှ်ညိ။ ရဲညးပန်မံၚ်ကဵုသၞဂှ် မုလေဝ် ဟွံပါ်ပါဲရ။ ရဲညးဟွံပန်သၞဏီဂှ် ကမၠောန်ဒှ်ဖဵုသွက်ဂကူဂှ် ကၠောန်ဂှ် ကၠောန်မံၚ်ရ။ ဆ္ဂး ကမၠောန်ပၟိက်ဇၞော်ထေက်ကဵုဒးကၠောန်တံ ဟွံကၠောန်ဏီဂှ် နွံမံၚ်ဘောနဘောနံရ။ ရပ်လဝ်လွဟ်တုဲ မံၚ်ထောံဆၜိုတ် အဆံၚ်ဗော်ပရေၚ်ဍုၚ်ကွာန်ဓဝ်ဂှ် ဒှ်ဟွံထေက်ရောၚ်။
ဗော်ပရေၚ်ဍုၚ်ကွာန်လေဝ် တၠုၚ်လအာ ညံၚ်ရဴသာ်ဂှ်ကီုရ။ စိုပ်အခိၚ်ရုဲမာဲမှ ပၠးတဲအာတ်မာဲ ပ္ဍဲညးဍုၚ်ကွာန်ဓဝ်ဂှ် ဒှ်ထေက်ဟာ၊ သ္အာၚ်အာနူကဵုအာတ်မာဲ သ္ပအမာတ်တုဲ ကမၠောန်ဒတုဲဖဵု သွက်ညးဍုၚ်ကွာန်တံ ထေက်ကဵုဒးချဳဓရာၚ် သ္ဒးကၠောန်မံၚ်လၟိုန်ရောၚ်။ ဗော်ပရေၚ်ဍုၚ်ကွာန်မန်လုပ်သၞောဝ် သၟဝ်အလဵုအသဳကံၚ်ဇြဳပၞာန် မေန်အံၚ်လှာၚ်တံ ကာလဏံ နွံမံၚ်ပိဗော်ရ။ မွဲဂှ် ဗော်ညဳသၟဟ်မန်၊ ၜါဂှ် ဗော်တောတက်မန်၊ ပိဂှ် ဗော်ညးဗြဴ (မန်) တံ နွံတဴတုဲ သီုပိဗော်ဂှ် ကာလလၟုဟ်ဏံ ကမၠောန်ဒတုဲဖဵု သွက်ညးဍုၚ်ကွာန်ဂှ် မုလေဝ် ကၠောန်ကဵုဟွံမွဲရ။ ဒးဟီုတပ်ပ်တဝ်ဝ်မ္ဂး အဆံၚ်သဝ်နူကဵု ဂကောံပရဟိတ မွဲဂကောံနွံဆမၞိဟ်ဟွံပေၚ်စှ်တၠတံဂှ်ဏီရောၚ်။
ဗော်ရပ်လွဟ် ကေတ်လဝ်ပရေၚ်ၜိုဟ်လလမ် ကဵု ကံင်ဇြဳပၞာန်တံဂှ် မုကမၠောန်သ္ဒးကၠောန်ထေက်ရော? ယဝ်သ္ဒးထံက်ထ္ၜး နကဵုဥပမာမ္ဂး ကောန်ဂကူမန် ဒးဒုၚ်ရပ်လဝ်ကဵုကံၚ်ဇြဳပၞာန်တံ ဟွံမွဲကဵုဒုဟ်ဒဏ် ခိုၚ်ၚ်ကၠိုက်က်၊ ရပ်လဝ်နကဵုဓဝ်သၠေဟ်ပၟာတံဂှ် ထေက်ကဵုသ္ဒးစဵုဒၞါ ထေက်ကဵုသ္ဒးဗက်ကဵုရောၚ်။ ရပ်လဝ်လွဟ်တုဲ ထေက်ကဵုသ္ဒးထ္ၜးစ ဒၞါဲဇိုၚ်ကၠညိညိကီုရောၚ်။
ဗော်ပရေၚ်ဍုၚ်ကွာန်မန်တံလေဝ် တၠုၚ်လအာ ညံၚ်ရဴသာ်ဂှ်ကီုရ။ ကမၠောန်ရီုဗၚ်ကောန်ဂကူ အဆံၚ်သဝ်ဝ် မပ္တံကဵု ညးဍုၚ်ကွာန်တံ သ္ၚိတူ၊ ဒးပါဲဒဴဘဲပၞာန်ကီု မပ္တံကဵု ညးဍုၚ်ကွာန်တံ ဒးဆက်ဆောံကဵုရုၚ် ဌာနဆေၚ်စပ်ကဵု အလဵုအသဳတံကီု ထေက်ကဵုသ္ဒးကဵုအရီုအဗၚ်ရ။ ကာလဏံ ဟိုတ်နူဍုၚ်ကွာန်လီုလာ်မံၚ်တုဲ သၞာဲဒဴဌာန မၞုံသၟဝ်အုပ်ဓုပ်ကောပ်ကာဲ ကံၚ်ဇြဳပၞာန်တံလေဝ် စာ်ထောၚ်မံၚ် အိုတ်အစောန်ရ။ သၞာဲဒဴတံ ကၠောန်သ္ပဒၟံၚ်လ္တူညးဍုၚ်ကွာန်တံ ဟွံသၟဟ်တးကဵုသၞောဝ်ဥပဒေ ဗီုဒးစိုတ် ပ္ဍဵုပ္ဍိုက်သ္ပမာန်မံၚ်ဂှ် ဂွံဆဵုကေတ်မံၚ်နကဵုမတ်၊ ဂွံမိၚ်ကေတ်မံၚ် နကဵုကတောဝ်ရ။
သရုပ်ကၠေံမ္ဂး အတိုၚ်ထ္ၜးလဝ်ဥပမာ ဗီုကဵုပေါဲဇာတ် သ္ကုတ်လ္တူတေံကီု ပေါဲဇာတ်သ္ဂောံဒှ်ဇာတ်ခိုဟ်မွဲ ကဏ္ဍညးကဵုညး တာလျိုၚ်ညံၚ်သ္ဂောံပြေပြံၚ်ဂှ် ဒးချဳဓရာၚ် ဒးဝေၚ်ထ္ၜးကဵုပုရိသာတ်ဗဵုပေါဲတံရ။ ပ္ဍဲပေါဲဇာတ်မ္ဂး ဗီုကဵု ကောန်သၟိၚ်လှ်ေ၊ ကောန်သၟိၚ်ထ္ၜးဇာတ်၊ ဂၞကျာ်ဇၞော်တံ တာလျိုၚ်ဇၞော်ကီု ပ္ဍဲဂကူမန်ပိုဲလေဝ် ဗော်ပၠန်ဂတးရပ်လွဟ် ကေုာံ ဗော်ပရေၚ်ဍုၚ်ကွာန်တံဂှ် တာလျိုၚ်ဇၞော်လ္တူကောန်ဂကူဇကုရ။ တိုၚ်ပ္ကဴရန်တၟံ ဍုၚ်ဗၠးၜး၊ ကၟိန်ဍုၚ်ဖေတ်ဒရေဝ်ဂှ် ဒှ်အန္တိမတိုၚ်ပ္ကဴတုဲ လလအ်သ္ဂောံအာစိုပ် တိုၚ်ပ္ကဴတေံ အကြာဏံ ဒဒိုက်ကောန်ညးဍုၚ်ကွာန် ဂကူမန် သောဲသောဲဗြောဲဗြောဲတံ ဂွံပြေပြံၚ်အာ ဗၞတ်ညိညမာန်ဂှ် ထေက်ကဵုသ္ဒးကေတ်လျိုၚ်ကီုရောၚ် ပတိုန်ထ္ၜးဏာရ။
0 Comments