နူကဵုဒပ်ပၠန်ဂတးဂကူမန် ၄ ဒပ်တံ ချဳဒရာင်ပံင်တောဲအာပရေင်ပၞာန်ရောင်ဟီုဂှ် သွက်ဂွံဒှ်အထံက် အရီု သၟဝ်ဂၠံၚ်တရဴကဏ္ဍပရေင်ဍုင်ကွာန်ဘုံလတူတေံရောင် ညးမၞုံအခေါင်ဟီုဂး ဗော်ဍုၚ်မန်တၟိ (ဗတိုက်သရိုဟ်တၠအဝဵုပၞာန်) NMSP-AD နာဲဂံင်သကာ ဟီုရ။

“ပံင်တောဲလုပ်ပေါဲဗတိုက်ဗီုဏံဂှ်လေဝ် နတဲလေဝ် နွံပၟိက်မံင်ဏောင်၊ ပိုဲကၠောန်စမ်ရံင်နတဲဏံကၠာ ဏောၚ်၊ ဒုင်သဇိုင်ကဵုပိုဲ ဗမံက်ရုပ်ရဴ (ပံၚ်တောဲ) ဏံမာန်တှ်ေ နကဵုသွာင်ပရေင်ဍုၚ်ကွာန်လေဝ် သဳကၠဳ ညးသ္ကအ်လောဲဏောၚ်ဂတဏံ” သာ်ဝွံ ဟီုရ။

လ္တူဒပ်မန် ၄ ဒပ်တံ လလောင်တြးလဝ် ချဳဒရာင်ပံင်တောဲအာပရေင်ပၞာန်ကၠာ စဗမံက်အာရုပ်ရဴ နတဲကၠာတုဲ အနာဂတ်ဂတ သွက်ဂွံဆက်ဗမံက်ရုပ်ရဴ ဒက်ပတန်အာ ဒပ်မန် မွဲဒပ်ဓဝ်ရောင်ဂှ်လေဝ် လိက်လလောင်တြးဒပ်မန်ပံင်တောဲတံ ချူဗမံက်လဝ်ရ။

“နကဵုဗီုပြင်ပရေင်ဍုင်ကွာန်ရ လးဖျေံနင်တုဲတှ်ေ ကဵုသ္ပမွဲဒပ်ဟီုဂှ် ဗီုဂှ်ဍေံဟွံသေင်က္ဍၚ်ဏီ၊ နဲကၠောန် ဂွံနူသၟဝ်ဏံ သ္ကိုပ်ဒပ်တံ တာလျိုင်သွာင်ဒပ်တံ ညးတံရ ကၠောန်မံင်နတဲဏောင်တှ်ေ ဆန္ဒနွံဂှ် ဗမံက်စမ်ရံင်ရုပ်ရဴဏောင်၊ နူဏံမွဲအဆံင်ဂှ် ဍေံအာဒှ်ထံက်ပၚ်ကဵု ဂကောံပရေင်ဍုင်ကွာန်အဆံၚ်လတူတေံဏောၚ်” သာ်ဝွံ ညးမၞုံအခေါင်ဟီုဂး NMSP-AD နာဲဂံင်သကာ ဆက်ဟီုရ။

အပ္ဍဲကဵုသွာင်ကဏ္ဍပရေင်ဍုကွာန်ရပ်လွဟ် ပ္ဍဲဂကူမန်မ္ဂး ဗော်ဍုင်မန်တၟိ၊ ဗော်ဍုင်မန်တၟိ (ဗတိုက်သရိုဟ်တၠအဝဵုပၞာန်)၊ ကံင်ဇြဳဖေဝ်ဒရာဍုၚ်မန် စတမ် ဂၠံင်တရဴပရေင်ဍုင်ကွာန်ဂကူမန် ဂၠံင်ညးကဵုညး ချူဓဇက်မံင်နွံတုဲ သဳကၠဳပညဳပညပ် ဇိင်တပ် ပတဝ်ဗမံက်အာမံင်ရုပ်ရဴနွံရ။

အပ္ဍဲကာလလုပ်မံင်ပေါဲဗတိုက် သွက်ဂွံသရိုဟ်ကၠေံသၞောတ်တၠအဝဵုပၞာန် ကေုာံ တၠအဝဵုဒဳမဵုကရေဇြဳ တအ်ဂှ် အပ္ဍဲဂကူမွဲမွဲ သွာင်ဒပ်ကီု၊ သွာင်ကဏ္ဍပရေင်ဍုင်ကွာန်ကီု ညံင်ဂွံဒှ်မွဲဗီု မွဲဗီုပြင်ဂှ် ဂကူကောန် ဍုင်အရင်ဂမၠိုင် ချဳဒရာင် ဗမံက်မံင်ရုပ်ရဴဗီုညးကဵုညးအိုတ်ရ။

အပ္ဍဲကဵုဂကူမန်လေဝ် ဗော်ပရေင်ဍုင်ကွာန် မလုပ်မံင်ပေါဲဗတိုက် သွက်ဂွံဗတိုက်သရိုဟ်တၠအဝဵုပၞာန် တ္ရဲဏံတအ်လေဝ် သဳကၠဳပညဳပညပ်ဇိင်တပ်မံင် သွက်ဂွံခၞံဗဒှ်ပတိုန် ဂၠံင်တရဴပရေင်ဍုင်ကွာန်ဂကူမန် မွဲဂၠးဓဝ်ဂှ် ဂစာန်ပညဳပညပ်မံင်ညးသ္ကအ်ရ။

အနာဂတ်ဂတ သွက်ဂွံဒက်ပတန်အာဍုင်မန်ရာမည ကေုာံ ကၟိန်ဍုင်ဖေဝ်ဒရာတၟိမွဲမာန်ဂှ် မပ္တံကဵု ဗော်ဍုင်မန်တၟိ၊ ဗော်ဍုင်မန်တၟိ (ဗတိုက်သရိုဟ်တၠအဝဵုပၞာန်)၊ ကံင်ဇြဳဖေဝ်ဒရာဍုၚ်မန် မူသဇိုင်ဂၠံင် တရဴပရေင်ဍုင်ကွာန်ညးကဵုညးဝွံ သွက်ဒးသဳကၠဳပညဳပညပ်အာ ညံင်ဂွံဒှ်မွဲဂၠံင်တရဴဂှ် ပၟိက်ဇၞော်မံင် ရောင် သ္ဂးအိုတ်ရ။

အပ္ဍဲဂကူမန်ဂှ် သွက်ဂွံရန်ပတဝ်အာ ကဏ္ဍပရေင်ဍုင်ကွာန် ပရေင်ပၞာန် မွဲဂၠံင်တရဴမာန် တုဲကၠုင် ဒဳဇြေမ်ဗာ ၁၈ ဂှ် ဒပ်ပၞာန်ဗၠးၜးဍုင်မည် (Mon Liberation Army- MLA)၊ ဒပ်ပၞာန်ဗၠးၜး ကောန်ဂကူမန် (Mon National Liberation Army- MNLA-AD)၊ ဒပ်စဵုဒၞာဍုင်မန် (Mon State Defense Force -MSDF)၊ ဒပ်ပၠန်ဂတးဍုင်မန် (Mon State Revolutionary Force- MSRF) ဒပ်မန် ၄ ဒပ်တံ စဗမံက်အာရုပ်ရဴ ပံငပတောဲပရေင်ပၞာန်တုဲ နူဂှ်မွဲအဆံင် သွက် ဂွံဒှ်မွဲဒပ်ဓဝ်မာန်ဂှ် ရေင်တၠုင်ဗမံက်အာရုပ်ရဴရောင် လလောင်တြးလဝ်ရ။