ပ္ဍဲဒေသဍုင်မန်ဂှ် ပွိုင်ဍုင်ဗွဲမဂၠိုင် ဒပ်ပၞာန်ဗၟာတံ ထပက်ကၠုင်ပၞာန် နကဵုကရောင်ပၞာန်တုဲ သၟတ်ဂမၠိုင်တံ ဒှ်ဂဝိင် ဖေက်ဒးဒုင်ရပ်တံင် သ္ပကောန်ပၞာန်ဂှ်ရ ဂြိပ်ပါဲတိတ်နူကွာန်နွံဗွဲမဂၠိုင်ရောင် မိမသၟတ်ဒေသရေဝ်သၟဝ်ကျာမွဲတၠ ဟီု လဴထ္ၜးရ။

နကဵုဒပ်ပၞာန်ဗၟာကံင်ဇြဳပၞာန်တံဝွံ နူကဵုမဒုင်ခဳလဝ်ပၞာန်ဒုင်ဂှ် လၟုဟ်မ္ဂး ချဳဒရာၚ်ကၠုင် နကဵုကရောၚ်ပၞာန်ထပက် အကြာကွာန်ကီု၊ အကြာဒေသဂကောံပၠန်ဂတးတံချဳဒရာင်ကီု နွံကၠုင်တုဲ သၟတ်ဒေသဗွဲမဂၠိုင် ဒှ်ဂဝိင်ကဵု ပရေင်ဒးဒုင်ရပ်သ္ပကောန်ပၞာန်အိုတ်ရ။

“နူကဵုဒပ်ပၞာန်ဗၟာတံ စချဳဒရာင်ကၠုင်အကြာကွာန်ကီု၊ ထပက်ကၠုင်ပၞာန် အကြာကၠအ်ဒေသ ဂကောံပၠန်ဂတးတံ ချဳဒရာင်ဂှ်ကီု အဓိက မၞိဟ်ဍောတ်တ် သၟတ်တံ ဒးဂွိင်ဂၠိုင်၊ ပ္ဍဲပရိုင်လေဝ် ဂွံဆဵုကေတ်မံၚ်မွဲဏှေအ်မွဲဏှေအ် ဍေံတံင်ရပ်ကဵု သ္ပကောန်ပၞာန်၊ ဟိုတ်နူဂှ်ရ အကြာကွာန်ကီု အကြာကၠအ်ကီု သၟတ်တံဂွိင်ဖေက်ဒးဒုင်ရပ်တံင်သ္ပကောန်ပၞာန်တုဲတှ်ေ သၟတ်နွံမံင်ပ္ဍဲကွာန်ကီု၊ အကြာကၠအ်တံကီု ဂြိပ်ပါဲတိတ်အာဍုၚ်သေံ အိုတ်ရ” နာဲလေဝ် မိမသၟတ် ဒေသရေဝ်သၟဝ်ကျာဂှ် ဟီုရ။

နူစသၞာံ ၂၀၂၄ မံက်တုဲ နကဵုကံင်ဇြဳပၞာန်တံ ပတိတ်အမိင်စၞောန်ဥပဒေ ညးဍုင်ကွာန်အာယုက်စိုပ်တံ ဇၟာပ်မၞိဟ်ဒးကေတ်တာလျိုင်သ္ပကောန်ပၞာန် (ဗၟာ) ရောင်တုဲဂှ် မၞိဟ်ပရေင်ထတ်ယုက်ခိုဟ်၊ သၟတ်တံ ဗွဲမဂၠိုင် ဂြိပ်ပါဲစိုပ်အာ ဍုင်သအာင်၊ ဍုင်သေံ ဗွဲမဂၠိုင်ဂၠင်ရ။

ကြဴနူဂှ်တုဲ နူကၠာသၞာံ ၂၀၂၄ ဟွံအိုတ်က္ဍင်ကဵု သၞာံ ၂၀၂၅ မံက်ဏံ ဒပ်ပၞာန်ဗၟာတံ သၠုင်အသိင်တုဲ နကဵုဇြဟတ်ကရောငပပၞာန် လၟိဟ်ဂၠိုင်င်ဂှ် ထပ်ထပက်ကၠုင်ပၞာန် အကြာကွာန်ဒေသ ဂကောံပၠန်ဂတးတံချဳဒရာင်ဂှ်ကီု၊ အကြာဒေသကွာန်ဟွံသေင် ဒၞာဲဒေသဂကောံပၠန်ဂတးတံ ဖျေံသဇိုင်ချဳဒရာင်တံဂှ်ကီု ဒှ်ကၠုင်တုဲ သၟတ်ဂမၠိုင် သာတုဲ ဒးဂွိင်ကၠုင်ကဵု ပရေင်ဒးဒုင်ရပ်တံင် သ္ပကောန်ပၞာန်ဂှ်ရ သၟတ်နွံသှ်ေမံင်ပ္ဍဲကွာန်တံဂှ်လေဝ် ထပ်ဂြိပ်ပါဲဓလေတ်မံင်အိုတ်ပၠန်ရ။

“နူကဵုပၞာန်ဗၟာဍေံပတိတ်ဥပဒေဍေံ သၟတ်တံ ဒးကေတ်တာလျိုင်ယိုက်ဂၠေင် သ္ပကောန်ပၞာန်ဗၟာ ဍေံဏောင်တုဲဗက်ဂှ် သၟတ်တံဇၟာပ်ကွာန်ရ ဂြိပ်ပါဲဓလေတ်တိတ်အာနူကွာန် စိုပ်အာသေံအိုတ်မံင်ရ၊ သှ်ေမံင်ပ္ဍဲကဵုကွာန်တံဂှ်တှ်ေ မၞိဟ်ဍောတ်တ် ဝိဝိင်ကဵု ဍာ်တၞး (ဂဥုဲၜူမာဲ) တံဂှ်၊ သၟတ်ဟွံမိက်ကၠောန် ကမၠောန်တံဂှ်၊ သၟတ်ဒှ်ခက်ခုဲပ္ဍဲသ္ၚိတုဲ တိတ်နူကွာန် ဟွံဂွံတံဂှ် ဗွဲမအောန်ရနွံ သှ်ေမံင်၊ အဵု နူကဵု ပၞာန်ဗၟာတံချဳဒရာင် ထပက်ကၠုင်ပၞာန် မုဟွံလအ်ကၠုင်ဏံပၠန်ဂှ် သၟတ်တံဂှ်လေဝ် မိမဍေံ ဗလးစွံလဝ်ပ္ဍဲသ္ၚိ ဟွံၜိုဟ်ရ ဂးတုဲတှ်ေ ဗီုညးညး ကဵုပါဲဓလေတ်အာဍုင်သေံအိုတ်” မိသဝ်ယျဳ မိယာဲသၟတ် နူပွိုင်ဍုင်ဇြပ်ဗုဂှ် ထပ်ဟီုပၠန်ရ။

ဒေသဍုၚ်မန်မ္ဂး စတမ်နူဍုင်မတ်မလီု သ္ကုတ်သၟဝ်ကျာ ပွိုင်ဍုင်ဗွဲမဂၠိုင်ကီု၊ သၠုင်ကျာဂှ်လေဝ် မပတမ်ကဵု ပွိုင်ဍုင်ကျာ်မြဟ်၊ မုဟ်ဍုင်၊ ဇြပ်ဗု၊ ရေဝ် သီုဖအိုတ်ဂှ် ဒပ်ပၞာန်ဗၟာတံ ချဳဒရာင်ထပက်ကၠုင်ပၞာန်ဇၟာပ်ပ်ဒေသဂှ်တုဲ ဒၞာဲလ္ၚဵု ကတဵုဒှ်ပေါဲဗတိုက်နွံ၊ ဒၞာဲဒေသလ္ၚဵုဂှ် ဒပ်ပၞာန်ၜါလ္ပာ် မင်ဒၟံင်ဂွန် သွက်ဂွံဒှ်ပေါဲဗတိုက်လေဝ်နွံတုဲ အကြာဏံဂှ် ဟိုတ်နူကဵုဒပ်ပၞာန်ဗၟာတံ ထပက်ကၠုင်ကရောၚ်ပၞာန်ဒေသဂကောံပၠန်ဂတးဂမၠိုင်တံဖျေံသဇိုၚ် ချဳဒရာင်ဂှ်တုဲ ပေါဲ ပၞာန်သွက်ဂွံကတဵုဒှ်နွံမံၚ်ဂှ်ရ ညးဍုင်ကွာန်တံ အာကၠုင်စွံသတိညိဂှ်လေဝ် ညးတာလျိုင်ဂကောံပၠန်ဂတးမန်လ္ၚဵု ဟီုကဵုကၠုင်သတိနွံရ။

ပရေင်ကံင်ဇြဳပၞာန်တံ ကေတ်ကောန်ပၞာန် ပ္ဍဲညးဍုၚ်ကွာန်တံဂှ် လၟုဟ်မ္ဂး ဟိုတ်နူကေတ်ကၠုင်လဝ် မွဲဒမြိပ်ဆက်ကၠုင်တုဲ အကြာလတူဍုင် ပ္ဍဲအရာပ်၊ ပ္ဍဲအကြာကွာန်တံဂှ် သၟတ်တံ ဂြိပ်ပါဲဓလေတ်ထောံအိုတ်ကီု၊ ဂွံလိင်ထပ်ထပက်စၞး(အဇာ)ဂှ် ဂၠာဲလိင် မၞိဟ်ဝါတ်ကၠုင်ကီုတုဲ အကြာတရဴကီု၊ လတူဍုင်တံကီု ကံင်ဇြဳပၞာန် ကေုာံ ဂကောံလစှ်ေနူဒပ်ပၞာန်ဗၟာတံ ဗက်ရပ်တံင်ကၠုၚ်မၞိဟ် အဓ္ဓမ ကတဵုဒှ်နွံကၠုင်မံၚ်ရောင် ဂွံတီကေတ်ရ။