လညာတ်သ္ရဳဂၠိပ်၊ ရာမညဌာနဳ
ပၠန်ဂတးရပ်လွဟ်ခေတ်တၟိ မမံက်ဒှ်ကၠုင်ကြဴနူပၞာန်သီအဝဵု စနူသၞာံ ၂၀၂၁ ဂှ် တင်ရန်တၟအ် နွံ (၂) သာ်ရ။ ယင်တံဂှ်ဝွံ (၁) သွက်ဂွံဗ္တိုက်သရိုဟ်ကၠေံ သၞောတ်တၠအဝဵုပၞာန် ကေုာံ သွက်ဂွံဖ္အိုတ်ကၠေံ သၞောတ်တၠအဝဵုအိုဿီုကီု (၂) သွက်ဂွံဒက်ပ္တန်ကၟိန်ဍုင်ဖေဝ်ဒရေဝ် (ဟွံသေင်) ဍုင်ဗၠးၜး ပ္ဍဲကာလအနာဂတ်တေံရ။
မြော်တိုန်ဂလာန်မ္ဂး ဍုင်ဗၠးၜးဟီုဟီု ဇက်တိုန်ကၟိန်ဍုင်ဖေဝ်ဒရေဝ်ဂးဂး ပရေင်မ္ဒးပ္တိုန်ဖျေံဂလာန်တအ် နွံကၠာလေဝ် သွဟ်ကြက်ဍေံ ကၞောတ်အထောတ်တေံဂှ် နွံပၟိက်ကဵုပရေင်သၠးပွးပူဂဵု၊ သၠးပွးမၞိဟ် ကေုာံ သၠးပွးဗော်၊ ဂကောံ၊ သၠးပွးဂကူစတမ်တအ် ပါလုပ်ရ။
ပၠန်ဂတးရပ်လွဟ်ခေတ်တၟိဟီုမံင်ဂှ် ဂိတုဖေဝ်ဖဝ်ဝါရဳ စၟတ်တ္ရဲ ၁၊ သၞာံ ၂၀၂၅ ဏအ်မ္ဂး ပေင်ပွိုင် (၄) သၞာံကိတ်တ်ရ၊ ဒၞါဲဏအ် ဟွံမိက်ပံက်ပွံက်ကၟိန်ဍုင်ဖေဝ်ဒရေဝ်ကဵု ပွံက်ဍုင်မဗၠးၜးတအ်ဏီ၊ ဟွံမိက်သ္ပ ပရေင်သ္ရဳဂၠိပ် တင်အံင်ဇၞး၊ တင်ဍိုန်လျတအ်ရ။ ပ္ဍဲကာလပွိုင်သၞာံ ၂၀၂၄ တတ်ၜက်တုဲ အခိင်မဂါံ လုပ်စိုပ်ကၠုင်ဒၟံင် သၞာံ ၂၀၂၅ ဏအ် လအ်ဂွံပွိုင် ၄ သၞာံမွဲဒမြိပ်ဝွံ သွက်ဂွံသ္ပအထိုင်အသး ဇြဟတ်ညးဗြဴ ကေုာံ သွက်သ္ဂောံပ္တိုန်စရာဲ ဇြဟတ်ညးဗြဴတအ် နွံဟွံလောန်လးလးရောင်။
မုဟိုတ်ရောမ္ဂး နူစအခိင်ပၞာန်သီအဝဵုတေံ ဒုင်တဲဟွံမာန်တုဲ တိတ်ဍာန်ဇၞော် ပ္ဍဲအရာမကွာ်ဂၠံင် ဓမံက်ထ္ၜးဆန္ဒကီု၊ မံင်တန်တဴပ္ဍဲသ္ရိ (တက်ဂၟဳပုင်၊ ၜုင်ထၟာဲသွ) ကီု စတမ်တအ်ဂှ် ဇြဟတ်ညးဗြဴ သွာင်ဇဳ၊ အဆံင်အလံင်ဇဳ ပါလုပ်ကၠုင်လဝ် လၟိဟ်ဂၠိုင်မံင်ဂှ် ညးမွဲလေဝ် တးပါဲမာန်ဟွံသေင်၊ ဇြဟတ်ညးဗြဴ ပါလုပ် ပ္ဍဲကာလပၠန်ဂတးသာ်ဝွံဟေင် သွက်ဂွံဗ္တိုက်သရိုဟ်၊ သွက်ဂွံဖ္အိုတ်ကၠေံ သၞောတ်အတိုင်မဟီုလဝ်ပ္ဍဲပိုဒ်လိက် ဗွဲလ္တူတေံဂှ် ဒှ်ကၠုင်လဝ်အထံက်အရီုဇၞော်ဇၞော်ရ။
ဆဂှ်သၟးဟွံက ဟိုတ်နူပါလုပ် ပူဗိုင်ကၠုင်လဝ် ကရောံပၠန်ဂတးတ္ရဲဏအ်တုဲလေဝ် ညးမဒှ်မၞိဟ်ဗြဴဗြဴတအ် ဒးဒုင်ရပ်၊ ဒးဒုင်ၜုင်တက်ပျဲပျာံ သီုဒးဒုင်ဂစိုတ်လဝ်ကဵု တၠအဝဵုပၞာန် (ဂကောံကံင်ဇြဳပၞာန်မေန်အံင်လှာင်) တအ် အပံင်သရောပ်ဖ္အိုတ် နွံဒှ်ကၠုင်ကဵုလ္ရီတၠကီုရ။
ပရေင်ဂိသ္ကေဝ်၊ ခအံင်စိုတ်၊ စိုတ်ဓါတ်ဒုင်ဒဝ်ဟွံမာန်တအ် မံက်ဒှ်ကၠုင်မ္ဂး နူကဵုပၠန်ဂတးညးဍုင်ကွာန်ဂှ် ဒံင်စိုပ်အာပၠန်ဂတးရပ်လွဟ်အိုတ်ရ။ တၠုင်လအာသာ်ဂှ်ကီု ညးဗြဴဗြဴတအ်လေဝ် နကဵုလညာတ်သမ္တီ ဟွံဒး ဟွံဒုင်ဂှ် ဗွဲပၞးမတုပ် ကၠောံစိုပ် ဗွိုင်ပၠန်ဂတးရပ်လွဟ်တအ် နွံလၟိဟ်ဗွဲမဂၠိုင်ကီုရ။
ပ္ဍဲကာလပစ္စုပ္ပန်လၟုဟ်ဝွံ ဇြဟတ်ညးဗြဴနူသွာင်ဇဳတအ် ပါလုပ်ဒၟံင် ပ္ဍဲလၟေင်ကမၠောန်ပၠန်ဂတးနတဲအိုတ်ရ။ ပ္ဍဲကဵုဂှ်ဝွံ နဒဒှ်သ္ဂံင်ဗြဴ တိတ်မုက်ပၞာန်ကီု၊ မံင်စးပၞာန် (မံင်သွာင်ရုင်) တုဲ ကဏ္ဍထံက်ပလံင် အရာပၞာန်ကီု၊ နဒဒှ်သ္ဂံင်ဗြဴ ဒပ်ပၞာန်ဒမၠုက်၊ သ္ဂံင်ဗြဴတဲတပ် (Sniper) ဂမၠိုင်ကီု၊ နဒဒှ်သ္ဂံင်ဗြဴ ကေတ်တာလျိုင်သွာင်ကွတ် မပ္တံကဵုအ္စာဂဥုဲ၊ ဒပ်စက်ဗရုသာဲ (ဒရုင်)၊ ညးဂၠာဲသြန်ဘဏ္ဍာစတမ်တအ် ကဏ္ဍညးခံင် ညးပါလုပ်ဂွံ ပါလုပ်မာန်တအ်ဂှ် နူကဵုဇြဟတ်ညးဗြဴသွာင်ဇဳတအ် ပါလုပ်ကၠောန်ၜိုတ်ဒၟံင် နဇိုင်နတဲအိုတ်ရ။
“တဲဓဝုဲကောန် ကၠောန်သွက်ဍုင်၊ တဲဓဝုဲခြေင် ယိုက်ဂၠေင်တ္ရိန်လွဟ်” ဂှ် မံက်ပြာကတ်တိုန်ကၠုင် ပ္ဍဲကာလပၠန်ဂတးခေတ်တၟိဏအ်အိုတ်ရ။ ဟွံဒးစိုတ်သၞောတ်မသ္ပမာန်ဍဵုဍိုက်မွဲလ္ပာ်ဓဝ်ဂှ်ရ ဇြဟတ်ညးဗြဴ နူသွာင်ဇဳ ကၠဟ်သ္ရိ ထောံဌာန် သာဲခြာနူကောန်ဇာတ်၊ မိမ၊ ကောဒေံမသတုဲ ဒုင်ဒဒိုက်ပ္ဍဲဂြိုပ်မွဲစွံ၊ တိုန်ဘာပၞာန်၊ ကတ်လ္ရတ်ကွတ်ဗ္တိုက်ပၞာန် ကရောညးတြုံတအ်မွဲစွံ၊ လုပ်ပေါဲဗ္တိုက် ပံင်လမျီု ကရောံညးတြုံတအ်မွဲစွံအိုတ်ရ။
ညးဗြဴလ္ရဵုတအ်ဂှ်မ္ဂး စဵုကဵုအဆံင်ညးကဵုတန်ဗ္တောန်ကွတ်ဘာပၞာန်၊ သ္ကိုပ်ဒပ်၊ ညးကောပ်ကာဲသွာင်ဒပ် (ပ္ဍဲရုင်) ကေုာံ ညးက္ဍိုက်ပ်ဒပ်ဂဥုဲ၊ ဒပ်စက်ဗရုသာဲ (ဒရုင်) တအ် ပါလုပ်ကၠုင် ပ္ဍဲကဏ္ဍပရေင်အာက္ဍိုပ် အခိင်ကာလပၠန်ဂတးတ္ရဲဏအ် ဗွဲမကတိုင်ကၟိုဟ်အိုတ်ရ။
ညးဗြဴမန် အဝဲသၟတ်၊ အဝဲညးဇၞော်လ္ရဵုတအ်လေဝ် နကဵုစိုတ်ဓါတ် ဒုင်ဒဝ်ဟွံမာန်၊ နကဵုစိုတ်ဓါတ် ဟွံမိက်သ္ပဍိက်ပၠက်ညး၊ နကဵုစိုတ်ဓါတ်ကေတ်သၠးပွးကဵုဂကူဇကုဂှ် ပါလုပ်ကေတ်မံင်တာလျိုင် ဒၞါဲကဏ္ဍဇကု မသၟဟ်အစောံ ပ္ဍဲဒပ်စက်ဗရုသာဲ (ဒရုင်)၊ သွာင်အုပ်ဓုပ်ကောပ်ကာဲရုင်၊ သွာင်ထံက်ပလံင် ကေုာံ သွာင်ဂၠာဲသြန်ဘဏ္ဍာ နဇိုင်နတဲ နွံတဴအိုတ်ရ။
တုဲပၠန် ပ္ဍဲကာလပၠန်ဂတးခေတ်တၟိတ္ရဲဏအ်ဝွံ ညးမဒှ် “မိ၊ ယာဲ” တအ်ဂှ် ဒးဒုင်သၠးကဵုဏာ ဂၠိုင်အိုတ်ရ၊ ဟိုတ်နူပရေင်ကြံကြဓဇန်ကြာန် ကေုာံ မကမ်နူပၠံင်လွဟ် တၠအဝဵုပၞာန် (ဂကောံကံင်ဇြဳပၞာန်ဗၟာ) မဟၟဲကဵုဓဝ်ညှာတာတအ်ဂှ်တုဲ ဟွံမွဲကဵုဓဝ်ယာမွဲသာ် ကောန်ဖျုန်ဂြိုဟ်ညးတအ်ညးတအ် ဒးလသာတိတ်အာမံင် မွဲတုဲမွဲ ဟွံသ္ကုတ်ခြာရ။
ညးဗြဴတအ် ၜိုန်ရဒးဒုင်ပျူဲပျာံ၊ ဒးဒုင်ဖျေံထံင်၊ ဒးဒုင်စံင်သ္ရိဌာန်၊ ဍုင်ကွာန်ဇကုတုဲ ဒးဂြိပ်ဒဴ ပါဲဓလေတ်ဘဲပၞာန် အကြာဘဲမကမ်လွဟ်ကၠာလေဝ် တင်သ္ဂုတ်သွာတ် မတွံဂး ညံင်ဂွံပလှ်ဖျေံတၠအဝဵုပၞာန်ဗမာ ပ္ဍဲတ္ရဲဏအ်ဂှ် ခိုင်ဗိုန်ဒၟံင်လၟိုန်ဟေင်။
ဒှ်သာ်ဂှ်ရ ရမျှာင်အောန်စိုတ်၊ ရမျှာင်ခအိက်လရိုအ် နူဂၠံသြိုဟ်တအ်ဂှ် ညးမဒှ် “မိ၊ ယာဲ” တအ် င္ရိတ်ဗ္ၜမ်ကၠေံထောံဖ္အိုတ်တုဲ ဖန်ဗဒှ် ကဵုဇြဟတ်စိုတ်၊ ဇြဟတ်ကာယ သွက်ကောန်ဖျုန်ဂြိုဟ် မၞုံဒၟံင်တိဍာ်ပၠန်ဂတးတအ် သွက်ဂွံအာစိုပ်ကဵုတိုင်ပ္ကဴဗၠးၜးဂကူ အတိုင်မရန်တၟအ်လဝ်တေံရောင် ပ္တိုန်ထ္ၜးဏာရ။
0 Comments