ဌာန်သ္ဇိုၚ်ပရေၚ်ပညာ ပုပ္ဖဟံသာ ဖျေံသ္ဇိုၚ်ဍုၚ်ဇြပ်ဗုဝွံ ရန်တၟအ်ကဵုသၟတ်ကွးဘာမန်တအ် သ္ဂောံကတ်လ္ရတ်အာ လိက်ပတ်မန် ကေုာံ ပညာဂတာပ်ခေတ်ဂမၠိုၚ်တုဲ ပံက်ဗ္တောန်အာကဵုတန်ဗ္တောန်ဥတုကညၚ် ပညာဒါနနွံရောၚ် ဂွံတီကေတ်ရ။

တန်ဗ္တောန်ဥတုကညၚ်ဏံဝွံ သၟတ်ကွးဘာတန်ဒေါဝ်ကေုာံ တန်သၠုၚ်နူ Grade-6 စဵုစိုပ် Grade-9တအ် တိုန်စိုပ်မာန်တုဲ နကဵုဘာသာမ္ဂး လိက်ပတ်မန်၊ ဘာသာအင်္ဂလိပ်၊ ကွတ်သဇိုင်ကောန်ပျူတာ ကေုာံ ကွတ်သဇိုင်ကသူတအ် ဖျေံဗ္တောန်အာကဵုရောၚ် ဂွံတီကေတ်နူညးတာလျိုၚ်တအ်ရ။

ကၠုၚ်စိုပ် ဂိတုဝှိတ်ဝှဝ်ရဳ စၟတ်တ္ရဲ ၂၈ ဏံမ္ဂး နူဇြပ်ဘသၚ်ဓဝ်ဂှ်မွဲကဆံၚ် ဟွံသေၚ်မ္ဂး နူလပှ်ကျာမွဲကဆံၚ် သၟတ်ကွးဘာညးမစိုပ်လုပ်စတအ် ကေတ်အဆက် ကၠုၚ်စိုပ်အာပ်တန်ဗ္တောန်မာန်တုဲပပ္တံဂိတုမာတ် စၟတ်တ္ရဲ ၅ စဵုကဵုဂိတုမေ စၟတ်တ္ရဲ ၅၊ ပံက်ဗ္တောန်အာ ပ္ဍဲဌာနဇြပ်သဘၚ်ဓရ်မန် လ္တူဍုၚ်ဇြပ်ဗု ပွိုၚ်ၜါဂိတုရောၚ် သ္ဂးလဝ်ရ။

“ပိုဲတအ်ပံက်ဂှ် ဘာဥတုကညၚ်ရ၊ ပိုဲတအ်ပၠောပ်လဝ်စရၚ်ဇရေၚ် ဂကောံလိက်ပတ်ယေန်သၞာၚ်မန် ပွိုၚ်ဍုၚ်ဇြပ်ဗုတုဲ ပံၚ်အာတောဲကဵုအ္စာကောန်ပျူတာ၊ အ္စာအၚ်ဂလိက်၊ အ္စာကသူတအ် သွက်ကောန်ၚ္ရာ်တအ် ဂွံဂွံအာသ္ဇိုၚ်၊ လိက်မန်သၟးတှ်ေ လ္ရဵုဂှ် စိုတ်ဟွံစ၊ ဟိုတ်ဂှ်ရ ပိုဲပံၚ်ကၠုၚ်တောဲဗီုဏံ။ ဣဏံတှ်ေ လိက်မန်လေဝ် ဒးဗ္တောန် ဘာသာတၞဟ်တၞဟ်လေဝ် ဂွံဗ္တောန်ဏောၚ်” သာ်ဝွံ ညးအုပ်ကာဌာန်သ္ဇိုၚ်ပရေၚ်ပညာ ပုပ္ဖဟံသာ နာဲအံၚ်ဆာန်လဴထ္ၜးလဝ်ရ။

ဆ္ဂးဂှ်သၟးဟွံက သွက်ကွးဘာတြေံ ကေုာံ ကွးဘာညးမလေပ်လဝ် သဇိုၚ်ကောန်ပျူတာတအ်မ္ဂး မ္ဒးဆက်ကတ်ဗ္တောန်အာ ဘာသာဂမၠိုၚ် မပ္တံကဵု လိက်ပတ်မန်(တန်သၠုၚ်ဥတုကညၚ်)၊ သဇိုၚ်ကွတ်နဲပညာ(IT Basic Course)၊ ဗဟုသုတမဆေၚ်စပ်ကဵုကောန်ပျူတာ(PC Knowledge၊ Microsoft Office၊ Internet Uses၊ Graphic Design)တအ်ရောၚ်။

တန်ဗ္တောန်ဝွံ ဒှ်တဴပညာဒါနမွဲတုဲ သၟတ်လဵုဟွံရုဲ နူလ္တူဍုၚ်ဇြပ်ဗုကီု နူကွာန်နူရးမန်ဂမၠိုၚ်တအ်ကီု ကၠုၚ်စိုပ်ပၠောပ်စရၚ် တိုန်စိုပ်မာန်ရောၚ်ဂှ် ညးတာလျိုၚ်တအ် ဟီုဂးဆဝ်မ္ရုဟ်လဝ်နွံရ။

“ပိုဲတအ်ကော်ဘိက်လဝ်ဂှ်တှ်ေ နွံမံၚ်ၜါတၞး အရၚ်ကွးဘာတြေံ(ရဲကေၚ်တအ်လဝ်ဘာပိုဲ) ရဲလေပ်လဝ်ဇြိုၚ်တုဲတုဲတအ်ဂှ်တှ်ေပိုဲကဵုအာ ကွတ်နဲပညာ(IT)ဏောၚ်၊ အရၚ်ကွးဘာတၟိဂှ်တှ်ေ လိက်မန်ဂှ် ဒးတိုန်နူသ္ဇိုၚ်ဏောၚ် ဘာသာတၞဟ်တၞဟ်လေဝ် ဂွံတိုန်ဏောၚ်” ဂှ် နာဲအံၚ်ဆာန်ဆက်ဟီုလဝ်ရ။

ဘာဥတုကညၚ် နွံသၟဝ်တဲဌာန်သ္ဇိုၚ်ပရေၚ်ပညာ ပုပ္ဖဟံသာဏံဝွံ ပံက်ပ္တန်ကၠုၚ်လဝ် နူသၞာံ ၂၀၂၃ တုဲ ပ္ဍဲသၞာံဏံမ္ဂး ဂွံကၠုၚ် ပိဝါယျရောၚ် သ္ဂးရ။ အပ္ဍဲကဵုသၞာံ ကိုပ်ကၠာအိုတ်ဂှ်မ္ဂး ၜိုတ်ရဒုၚ်ကၠုၚ်လဝ်တဲ လၟိုဟ်ကွးဘာ ၂၄၀ တၠကီုလေဝ် ဟိုတ်နူဒၞါဲတန်ဗ္တောန်ဒှ်ဆိုအ်ဗနွံကၠုၚ်တုဲ လက်ကြဴဏံမ္ဂး လၟုဟ်ကွးဘာ ၁၂၀ တၠဟေၚ် ဒုၚ်ကၠုၚ်တဲနွံရ။

ဌာန်သ္ဇိုၚ်ပုပ္ဖဟံသာဝွံ ရန်တၟအ်ကဵု သွက်ဂွံထံက်ပၚ် ပညာပရိယတ္တိကီု သွက်ဂွံထံက်ပၚ် ပညာဘာတက္ကသိုလ်ကီု သွက်ဂွံထံၚ်ပၚ်ပညာကောန်ဂကူမန်ကီုသွက်ဂွံဒက်ပ္တန် ဌာန်သၠုၚ်ပ္တိုန်ဍာ်ဒကေဝ်သၟတ်ကီု သီုကဵုသွက်ဂွံရီုဗၚ်ထံက်ပၚ်ဘဲဒဏ်သဘာဝနာနာကီုရောၚ်ဂးတုဲ ပ္ဍဲသၞာံ ၂၀၂၁၊ ဂိတုမေ စၟတ်တ္ရဲ ၁၈၊ ဂိတုပသာ် ၈မံက်ဂှ် ပံက်ပ္တန်ကၠုၚ်လဝ် ပ္ဍဲဘာသိရီမၚ်ဂလပရိယတ္တိ ဍုၚ်ဇြပ်ဗုဂှ်ရောၚ် ဂွံတီကေတ်လဝ်ရ။