ပ္ဍဲအရာဒေသမုက်ပၞာန် ဒှ်ဒၟံင်ပေါဲဗတိုက်ကီု၊ ပေါဲဗတိုက်ဟွံဒှ်မွဲသာ် ဒေသဂကောံပၠန်ဂတးတံ ချဳဒရာင်ကီု ကံင်ဇြဳပၞာန် တအ် စကာကၠုင်ပၞာန်ကျာဂၠိုင်တိုန်တုဲ သုင်စောဲထောံဖျေံဗမ်ဇၞော်ဂၠိုင်တိုန်ကၠုင်မံင်ဂှ် ဂွံဆဵုကေတ်ရ။

ကံင်ဇြဳပၞာန်တအ် စကာကၠုင်ပၞာန်ကျာတုဲ ထောံဖျေံဗမ်ဇၞော် လျိုင်ပံင် ၅၀၀ ဂၠိုင်တိုန်ကၠုင်ဏံဂှ် သွက်ရဲပၠန်ဂတးတအ် ဂလိုင်လဵုဇီုကပိုက်မာန် ဟွံတီကေတ်ကီုလေဝ် လ္ပာ်ညးဍုင်ကွာန်တအ်ဂှ် ချိုတ်၊ ဒးဝပ်၊ သ္ၚိဌာန် ဘုတ်ဘာ ဒှ် ဆောံ လေင်ဒိုက်ဂၠိုင် ဟွံသာလးလးရ။

ရံင်ကေတ်ဒဒှ်ကွာန်ကအ်ဗိုတ်(ကာန္နဳ) တုဲကၠုင် နူအေပရဴ ၁၅ တ္ၚဲအတးကြာပ်သၞာံတုဲကၠုင်ဏံမ္ဂး က္ၜင်ကျာပၞာန် ဗၟာတအ် ထောံဖျေံဗမ်ဇၞော် လျိုင်ပံင် ၅၀၀ ၜါမ ဒတူစှ်ေလတူဘာလကျာ်တုဲ ခၟဳသင်ပ္ဍဲဘာဂှ်ကီု၊ ညးဍုင်ကွာန်မၞုံ ပွဳပွိုင်ဂှ်ကီု ချိုတ်ဂျိုင်လေဝ်နွံ၊ ဒးဝပ်လေဝ်နွံဟွံအောန်ဂှ် ဇၟာပ်ညးအဲ ဂွံမိင် ဂွံဆဵုကေတ်မံင်ရ။

ပ္ဍဲကွာန်ကအ်ဗိုတ်ဂှ် ပေါဲဗတိုက်ဟွံမွဲ မွဲသာ် ဟိုတ်သာ်လဵု က္ၜင်ကျာကံင်သဳပၞာန်တအ် ဂွံထောံဖျေံဗမ်ဇၞော် ပ္ဍဲ ဘာဂှ်ရောမ္ဂး – အတိုင်ညးကွာန် နူကွာန်ကအ်ဗိုတ် မၞုံအာယုက် ၅၀ သၞာံပြင်မွဲတၠ ဟီုလဴကလးမ္ဂး- ပ္ဍဲကွာန်ကအ်ဗိုတ်ဂှ် ဒှ်ဒေသတိဍာ် ဒပ်ပၠန်ဂတးဂမၠိုင်တအ်မွဲတုဲ သီုကဵုဒှ်ဂၠံင်လုပ်တိတ် အကြာတိဍာ်တွဵုရးမန် ကဵု ကရေင်ရ။ ပ္ဍဲတ္ၚဲ က္ၜင်ကျာပၞာန်ဗၟာတအ် ထောံဖျေံဗမ် လတူဘာလကျာ် ကွာန်ကအ်ဗိုတ်ဂှ် ဂကောံပၠန်ဂတး (ကေအေန်ယူ) တအ် နွံမံင် ပ္ဍဲအရာပ် ဟွံသ္ၚောဲ ဟွံကြပ်ကဵုဘာဂှ်ရ။

“အခိင်ဂှ်ဂှ် ဒပ်ပၠန်ဂတး(ကရေင်)တအ် နွံမံင်ပ္ဍဲကွာန်ရရဏောင်၊ ဍေံတအ် ဇူမံင်ပ္ဍဲအရာပ်မွဲအရာပ်ဂှ် ဟွံသ္ၚောဲ ဟွံကြပ် ကဵုဘာဂှ်ကွေံကွေံ၊ လ္ပာ်ကွာန်ဂတတေံလေဝ် ပေါဲဗတိုက်ဒှ်မံင် အလုံမွဲကွာန်ဂှ် တီမံင်ရရ၊ လ္ၚဵုဂှ် ဂြိပ်ပါဲဓလေတ်မံင်ဣ ယျ၊ ပၞာန်ကရေင်တအ် နွံမံင်ပ္ဍဲကွာန်ဂှ်ဂှ် က္ၜင်ကျာလေဝ် ပဝ်သဝ်စှ်ေကၠုင်ဂှ် ညးကွာန်တအ် ဂွံမံင်သတိရရ၊ အတိုင်ဂွံမံင်သတိဂှ်ရ ဗမ်ဇၞော်စှ်ေဂှ် ဒးအာဘာတဝ်တဝ်ဂှ်၊ လ္ၚဵုဂှ် ဒးကပှ်ကေတ် ဍိုပ်အာ တၞဟ် ဇိုင်အာ တၞဟ်၊ မၞိဟ် ယဲဆီၜေတ်နွံမံင် တှ်ေ ယဲကတဵုဒှ်လေပ်မံင်၊ ဒးဗက်ဂၠာဲကပှ်တၟာကလှ်ေ” မၞိဟ်ဂှ် ဟီုထ္ၜးကဵု ဗီုဒှ်ဂှ်ရ။

ကွာန်ကအ်ဗိုတ်ဝွံ ပ္ဍဲဒေသပွိုင်ဍုင်ကအ်ကြိက်ဂှ် ဒှ်ကွာန်မန်ဇၞော်အိုတ်မွဲကွာန်လေဝ်ဒှ်တုဲ ဂကူမန် နွံဂၠိုင်အိုတ်တုဲ ဂကူ ဗၟာ ကေုာံ ဂကူကရေင်တအ်လေဝ် ဒၟံင်တန်တဴနွံရ။

ဒၞာဲဒှ်ဒၟံင်ပေါဲဗတိုက် ဂတကွာန်ကအ်ဗိုတ် လ္ပာ်ဒေသကြုင်ဒဵု (ဍုင်ကြုင်ဒဵု) ဂှ် သ္ၚောဲခြာဒၟံင်ဗၞတ်ၜိုတ် ၇ တိုင်ရ။ ဆဂးဂှ် ကွာန်ကအ်ဗိုတ် ဇၞော်သၠဲလၟိဟ်သ္ၚိဂၠိုင် သတီုမၞိဟ်ဂၠိုင်ကီု၊ သီုကဵုဒှ်ဒၟံင်ဂၠံင်သွက်ဂကောံပၠန်ဂတးတအ် အာကၠုင်ဇူဒီုမံင်ဂှ် ဒပ်ကံင်သဳပၞာန်တအ် တီမံင်ဂှ်တုဲ ထောံဖျေံဗမ်ဇၞော်ဂှ်ရောင် ညးကွာန်ဂှ် ဆက်လဴဗီုဏံရ။

“အခါရ ပၞာန်ကရေင်တအ် လုပ်နွံမံင်ပ္ဍဲကွာန်ဂှ် ဍေံ(ပၞာန်ဗၟာ)တအ်တီမံင်၊ က္ၜင်ကျာပၞာန်ဍေံ ယာန်ကၠုင် သဝ်စှ်ေ သဝ်စှ်ေ စိုပ်တဝ်ကဵုလတူကၟဳဘာဂှ် ဍေံထောံဖျေံဗမ်ဇၞော်ဂှ် ညးကွာန်တအ်အလုံမွဲကွာန်ဂှ် ကညာင်ဟီုမံင် စှ်ေဏောင်၊ စှ်ေဏောင် ရမျှာင်ကညာင်မံင်ညးကအ်ဟွံအိုတ်ဏီ၊ ဗမ်ဇၞော်နူက္ၜင်ကျာဂှ် ခတိုဟ်တမ္ညဝ်အလုံမွဲကွာန် ကညာင်ကရေဲ တိုန်ဂှ် ညးဒးဂှ် ဒးယျ က္ၜင်ကျာဍေံသ္ၚိတ်အာဂှ် ဂြိပ်အာဘာဂှ် ဒးကပှ်ကေတ် အတေံမွဲဒကုတ် အဏံမွဲဒကုတ် ပး ညာတ်ဒး စိုတ်လီု” သ္ဂးရ။

ပ္ဍဲပွိုင်ဍုင်ကအ်ကြိက် ဍုင်ကြုင်ဒဵု ဒေသဒှ်ဒၟံင်ပေါဲဗတိုက် ကွာန်မွဲဒမြိပ်ဂှ် စတမ်နူ အေပရဴ ၁၄ တ္ၚဲအတးစှ်ေတုဲ ဒဵုကဵု တ္ၚဲ သၞာံမွဲမံက် အေပရဴ ၁၇ တ္ရဲဏအ်ဂှ် က္ၜင်ကျာပၞာန်ဗၟာတအ် ပဝ်ဂေတ်ဒၟံင်လၟေင်တ္ၚဲ လၟိုန်အခိင်တုဲ ထောံဖျေံဒၟံင်ဗမ် ကွာန်တေံ ကွာန်ဏံ အရိုဟ်တ္ၚဲနွံရ။

ပ္ဍဲတ္ရဲဏအ် အခိင်နူဂယး အကြာ ၈ နာဍဳဂှ်လေဝ် ဟိုတ်နူဒးဘဲက္ၜင်ကျာပၞာန်ဗၟာဂှ်တုဲ ပ္ဍဲကွာန်ဂြိုပ်ကြုက် ပွိုင်ဍုင်ကအ်ကြိက်ဂှ် ကောန်ဂကူမန် မၞိဟ်တြုံမွဲတၠ လမျီုဒးအိုတ်ကၠုင်လဝ်ပၠန်ရ။

ဂိတုအေပရဴ ၁၅ အခိင်လ္ဒောဝ်တ္ၚဲ ပ္ဍဲကွာန်ကအ်ဗိုတ်ဂှ် မၞိဟ်ဇၞော်ကောန်ၚာ် ချိုတ်အာ ၇ တၠတုဲ ခၟဳသင် ကောန်ထပိုဲ ဗၞတ်ၜိုတ် ၁၇ တၠ ဒးဝပ်ဒးတိုန်မံင်ရုင်ဂဥုဲဍုင်မတ်မလီုရ။ ကြဴနူဂှ် အေပရဴ ၁၆ ဂှ်ပၠန် ပ္ဍဲကဵုကွာန် (မြောက်ကမ္မရိုက်)ဂှ် က္ၜင်ကျာပၞာန်ဗၟာတအ် ထောံဖျေံဗမ်ဇၞော်ပၠန်ဂှ် မၞိဟ်ဗြဴယိုက်လဝ်ဂဝ်ဂၞဴမွဲတၠ ချိုတ်အာတုဲ ကောန်ၚာ်သီုမၞိဟ်ဇၞော် ၄ တၠ ဒးအာဝပ်ပၠန်ရ။

ကာလဂကောံပၠန်ဂတးဂမၠိုင်တအ် လုပ်ဗတိုက် ဒပ်ဗျူဟာ ဝင်ကနာင် ဂၠံင်ကျာ်ပိ-ဇြပ်ဗု တုဲကၠုင်ဏံဂှ်လေဝ် အရိုဟ် ဒဒှ်တ္ၚဲဂှ် က္ၜင်ကျာပၞာန်ဗၟာတအ် အာထောံဖျေံဗမ်ဇၞော်ပ္ဍဲအကြာကွာန်တုဲ ဘာလကျာ်ဂမၠိုင်၊ သ္ၚိဌာန်ဂမၠိုင် တူဆောံ လေင်ဒိုက်အာ ဗွဲမဂၠိုင်ဂၠင်ရ။

ဗီုကဵုဒဒှ်ဒပ်ကျာကံင်ဇြဳပၞာန်တအ် ထောံဗမ် ဒေသမန် ကရေင် ကတဵုဒှ်ကၠုင်ဆက်ဆက်လၟုဟ်ဏံဂှ် လ္ပာ်ဒေသ ကၟိန်ဍုင်ဗၟာ သ္ကုတ်လ္ပာ်လတူတေံလေဝ် မပ္တံကဵု ရးသေတ်ကိုင်၊ ရးမဂွေ၊ ရးမာန္တလေဝ်၊ တွဵုရးဍုင်ကချေင် စတမ် ဒေသဒှ်ပေါဲဗတိုက်ကီု၊ ဒေသဂကောံ ပၠန်ဂတးဂမၠိုင် ချဳဒရာင်အာကၠုင်ကီု လၟေင်ဒဒှ်တ္ၚဲဂှ် က္ၜင်ကျာကံင်ဇြဳပၞာန်တအ် ဂြာတ်ထောံဖျေံဒၟံင်ဗမ်ဇၞော် လၟေင်တ္ၚဲအဆက်ဆက်ရ။

ဗီုရုပ် – ဟိုတ်နူဒးဘဲက္ၜင်ကျာပၞာန် ပ္ဍဲတ္ရဲဏအ်တုဲ ကောန်ကွာန်ဂြိုပ်ကြုက်မွဲတၠ ဒးအိုတ်လမျီု (လင်နိုင် သစ္စာမောင်)