လိက်ပရေင်၊ မယံင် (ဍုင်မန်)
ကြဴနူကဵု ဒပ်မန် (၄) ဒပ်ဂှ် ပံက်ကၠုင် “ကရောင်ပၞာန်ပံင်တောဲရာမည” တုဲကၠုင်ဂိတုဂျာန်နဝါရဳ ၁၉ (၂၀၂၅) ဏံတုဲ ခြာဟွံလအ်မ္ဂး သၠုင်ပတိုန်အသိင်ပေါဲဗတိုက် ဒေသဍုင်မန်ရောင် ညးမၞုံအခေါင်ဟီုဂး နာဲသဳရိမန်ဆာန် ဟီုပတိတ် ပရိုင်ရ။ ကြဴနူဂှ်တုဲ ပေါဲဗတိုက်ဒေသဍုင်မန်ဂှ် ညိင်သ္ၚိတ်အာ ဒဵုတ္ၚဲဏံရ။
ဂကောံဒပ်ပၠန်ဂတးမန်တံဂှ် ချဳဒရာင်ပံက်ဘာပၞာန်သဇိုင်၊ ဆဵုဂဗပညဳပညပ်ပရေင်ပံင်တောဲဒပ် ချဳဒရာင်မံင်နွံတုဲ စပ်ကဵု ချဳဒရာင်ပရေင်ပၞာန် ပေါဲဗတိုက်ပၞာန်ဂှ် ကပေါတ်ပၞာန်ဟွံရုမ်ဂပ်၊ ဇြဟတ်ပၞာန်ဟွံဍိုက်ပေင် ညးတာလျိုင်ဂကောံပၠန်ဂ တးမန်လ္ၚဵုတံ ဟီုမံင်ရ။
သွက်ဂကောံဒပ်ပၠန်ဂတးမန်ဂမၠိုင် ဂွံဆက်ဂျိုင်တဴဂှ် နဲကဲဗီုပြင်ညးကဵုညး အကာဲအရာဒပ်ညးကဵုညးဂှ် ဖန်ဂၠာဲဒၟံင် ဩန် ဘဏ္ဍာအကြာညးဍုင်ကွာန် ပ္ဍဲဍုင် မ္ၚးဍုင်နွံတုဲ လတူပရေင်ချဳဒရာင်ပၞာန်ဂကောံပၠန်ဂတးတံ သာ်လဵုဗမံက်အာရုပ်ရဴဂှ် လေဝ် ညးတံစၟဳဗဵုအခါတ်အကာဲဒၟံင်အိုတ်ရ။
အဃောညးဍုင်ကွာန်ဂမၠိုင်လ္ၚတ်အခါတ်အကာဲ မင်စၟဳတဴဒၟံင် ဂကောံပၠန်ဂတးမန်တအ် ချဳဒရာင်ပရေင်ပၞာန်ဂှ် နူလ္ပာ် ကံင်သဳပၞာန်တံ သၠုင်ပ္တိုန်အသိင်ပၞာန်တုဲ ဒေသဂကောံပၠန်ဂတးမန်တံချဳဒရာင်ဂှ် ဖျေံစွံကၠုင်ဒပ်ကီု၊ ဒေသလ္ၚဵုဂှ် ဖျေံဂလိုင်ပ္တိုန်ဇြဟတ်တုဲ ထပက်ကၠုင်ပၞာန်ကီု၊ သုင်စောဲပၞာန်ကျာတုဲ ဂြာတ်ထောံဖျေံဗမ်ဇၞော် ပ္ဍဲဒေသညးဍုင်ကွာန်တံ ကီု နွံကၠုင်ရ။
မွဲလ္ပာ်ပၠန်ဂှ် သၠုင်ပ္တိုန်အဆံင်ကပေါတ်ပၞာန် မပ္တံကဵု ဒရုင် (Drone) ကင်၊ ဒရုင် (Drone) ထောံဗမ်၊ မၠံက်ဇၞော် မၠံက်ဍောတ် ထောံကၠဟ်ဖျေံ ဗမ်မခတိုဟ် ပ္ဍဲဒေသဂကောံပၠန်ဂတးတံချဳဒရာင်ဂၠိုင်ကၠုင်တုဲ ညးဍုင်ကွာန်ဒေသ တံလေဝ် ဒးဒုင်ဘဲ ပရေင်ဇီုကပိုက် က္တဵုဒှ်ဂၠိုင်ကၠုင်နွံရ။
အကြာညးဍုင်ကွာန်တံ မင်စၟဳကျေဝ်ဗဵု အခါတ်အကာဲဒၟံင် ပရေင်ပၞာန်နူဂကောံပၠန်ဂတးမန်တံဂှ် နူလ္ပာ်ဒပ်ကံင်သဳပၞာန် တံသၠဲပ္တိတ်ပရေင်ထိင်ဒဝ်တိဍာ်၊ သုင်စောဲကွတ်ကပေါတ်ပၞာန် တောတက်ကၠုင်၊ သၠုင်ပ္တိုန်အသိင်ပၞာန်ကျာတုဲ ဂြာတ် ထောံဖျေံဗမ်ဒေသညးဍုင်ကွာန်ဂၠိုင်ကၠုင် မပ္တံသာ်ဏံ ညးဍုင်ကွာန်တံ သ္ဒးဆဵုဂဗကၠုင်ဒၟံင်ရ။
လ္ပာ်ဂကောံပၠန်ဂတးမန်ဂမၠိုင်တံဂှ် ပရေင်ပံက်ဘာပၞာန်၊ ပရေင်ပံင်တောဲချဳဒရာင်ပရေင်ပၞာန်၊ ပ္တိတ်လိက် ပ္တိတ်ပရိုင် မပ္တံ သာ်ဏံသၟး ညးဍုင်ကွာန်တံဂွံဆဵုကေတ်မံင် ဗဒါဲကဝက်သၞာံ ဒှ်ကၠုင်ရ။
ပရေင်ချဳဒရာင်ပၞာန် ဂကောံပၠန်ဂတးဂမၠိုင်တံ သောဲသောဲဗြောဲဗြောဲ ၜိုန်ရညးဍုင်ကွာန်တံ ဟွံဂွံတီကေတ်အိုတ်ကီု လေဝ် ညးတာလျိုင်ဂကောံဒပ်ပၠန်ဂတးလ္ၚဵု၊ ညးတာလျိုင် ဒပ်ပံင်တောဲလ္ၚဵုတံဂှ် ဟီုဓမံက်ပ္တိတ် လတူမုက်လိက်ကီု၊ လတူပရိုင်ကီုဂှ် နကဵုညးဍုင်ကွာန်တံ မင်စၟဳကျောဝ်ဗဵုဒၟံင် မတ်စေအ်စေအ်အိုတ်ရ။
ဟွံဂွံကဵုစိုတ်လ္တူဂကောံပၠန်ဂတးမန်တံတုဲ ညးတာလျိုင်ဗက်ပကောံဒၟံင်ဩန်ဒါန် ကုဒပ်တံလ္ၚဵုလေဝ် ဟီုခတိုဟ်ဓ မံက်တိတ်လတူလိုင်လေဝ် ဂွံဆဵုကေတ်မံင်ရ။ ယဝ်ရ ဂကောံပၠန်ဂတးမန်တံ ချဳဒရာင်ပရေင်ပၞာန်ညိင်သ္ၚိတ်ဇြဒၟံင် အတိုင်ဏံမ္ဂး ဇီုကပိုက်ကၠုင်ကဵု ပရေင်ထံက်ပင်ရီုဗင်သၟးဟွံက ပရေင်ပူဗိုင် ပရေင်ထံက်ဂလာန်စှ်ေတုဲ ဇီုကပိုက်ကၠုင် ကဵု သိက္ခာဗော် ဒပ် ဒှ်ကၠုင်မာန်မံင်ရ။
ပရေင်ဗ္တိုက်ပၞာန်ဂှ် နွံၜါဗီုရ။ မွဲဗီုဂှ် ပကောံဇြဟတ်၊ ပကောံကပေါတ်ပေင်တုဲ ဗ္တိုက်၊ မွဲဗီုပၠန်ဂှ် ဗ္တိုက်အာ ပကောံအာဇြ ဟတ် ဗ္တိုက်အာ ပကောံကပေါတ်၊ ပ္ဍဲဒၞာဲပကောံကပေါတ်ဂှ် ဒပ်ပၠန်ဂတးဂကူလ္ၚဵုတံ ကပေါတ်သၞ ညံင်ဂွံဒှ်ကပေါတ်ဇကု ဖန်ဂစာန်ကၠုင် နဲဏံလေဝ် ဂုန်ဖဵုဂကောံပၠန်ဂတးတံ ဂွံဆဵုကၠုင်နမတ်ရ။
ယဝ်ရတော်ကဵုမတ်ပရေင်ဍုင်ကွာန် မတ်ပရေင်ပၞာန်မ္ဂး ပေါဲပၞာန်ညိင်ဇူမံင်ဏံဂှ် ဒှ်အရာသွက်ဂွံပလေဝ်ပလေတ်စ သွက်ဂွံဗ္တိုက်ပၞာန်ရောင်ဂှ် မၞိဟ်နွံကဵုလညာတ်ပရေင်ဍုင်ကွာန် ပရေင်ပၞာန်လ္ၚဵု ၜိုန်ရကၠိုဟ်ကီုလေဝ် ညးဍုင်ကွာန်ဂမၠိုင် ဂှ် ပရေင်ချဳဒရာင်ရံင်ဟွံညာတ်နကဵုမတ်ဖျုန်တံဂှ် ဟွံဂွံကဵုစိုတ်ရ။
ပေါဲပၞာန်မွဲမွဲ ဇြဟတ်ညးဍုင်ကွာန်ဟွံပါမ္ဂး ကာလလဵုလေဝ် ဗ္တိုက်ပၞာန်ဇၞးမာန်ဟွံသေင်ဂှ် ဇၟာပ်ညးအဲ ကၠိုဟ်တီလဝ်ဖအိုတ်ရ။ ပ္ဍဲကဵုကာလပၠန်ဂတးဏံဂှ် ညးဍုင်ကွာန်တံ ဂွံပါဗက်ကၠုင် ပ္ဍဲဇြဟတ်ပၠန်ဂတးဂှ် ပၟိက်အဓိကဇၞော်အိုတ်ရ။
နကဵုဂကောံဒပ်ပၠန်ဂတးဂမၠိုင်တံဂှ်ဇြဟတ်ဂွံဇၞော်ကီု၊ ဇွောံမကပေါတ်ကြိယာပၞာန်ဂွံဇၞော်ကီုဂှ် ဒးကၠုင်နူပရေင်ပူဗိုင်၊ ပရေင်ထံက်ဂလာန်ညးဍုင်ကွာန်တံဟေင်ရ။ ပရေင်ထံက်ဂလာန် ပရေင်ပူဗိုင်၊ ပရေင်ညးဍုင်ကွာန် ဂွံပါလုပ်မာန်ဏံဂှ် ညးအာဂတပၠတရဴတံ ဒးဖန်ဇန်တပ်ဟေင်ရ။
သရောပ်မိက်ဂွံဟီုဂှ် နကဵုဂကောံပၠန်ဂတးမန်ဂမၠိုင်တံ မင်ရံင်အကာဲအရာလဵုဒှ်ဒှ်၊ ကေတ်အခိင်ပကောံဇြဟတ်ကဵုဒှ်၊ ပလေဝ်ပလေတ်ပကောံကပေါတ်ကြိယာပၞာန်ကဵုဒှ်၊ ညံင်ညးဍုင်ကွာန်တံ ဓဝ်ပတှ်ေညံင်ဟွံဂွံလီု၊ ညံင်ညးဍုင်ကွာန်တံ စိုတ်ဓာတ်ဂွံကတိုင်ကမိုဟ်ဒၟံင်ကဵု ပရေင်ကမၠောန်ပၠန်ဂတးဇကုဂှ် သ္ပလွဳပ္တိတ်ဇြဟတ်ထေက်ရ။
အကာဲအရာလဵုဒှ်ဒှ် ကၞောတ်တဲ ဓမံက်ရုပ်ရဴ ပရေင်ပၞာန်နတဲဟွံမာန်ဏီကဵုဒှ်ကၠာရ ပရေင်ဒုင်စဳရေင် သောင်ကလး ညံင် ညးဍုင်ကွာန်၊ ညံင်ဇြဟတ်ပူဗိုင်ဇကု ဂွံသောင်ကလး လတူပရေင်ကမၠောန်ဇကုဂှ် ဒးသောင်ကလးဒုင်စဳရေင်ရ။ ပ္ဍဲကဵု အခန်သောင်ကလးဒုင်စဳရေင်ဏံဂှ်လေဝ် ဗီုပြင်နဲကဲဇဳသာ်နွံပၠန်ရ။
အခိင်ပၠန်ဂတးမ္ဂး သတ်ပၟတ်ဇဝ်ပ္ကဴပၠန်ဂတး ညံင်ညးဍုင်ကွာန်တံဂွံဒုင်စသၟူ၊ ကာလပၠန်ဂတးမ္ဂး အလုံဂကူ ညံင်စိုတ်ဓာတ်ပၠန်ဂတးဂွံဇာပ်လုပ်ပ္ဍဲဖျုန်ဂြိုဟ်ဂှ် ညးအာဂတပၠတရဴတံ ဒးဖန်ဇန်လေပ်မှလေဝ် ပၠန်ဂတးမန် ဟွံလ္ၚု အာရောင် ပ္တိုန်ထ္ၜးဏာရ။
0 Comments