သွက်ဘာခၟဳသင်မန် ကေုာံ ညးဍုင်ကွာန် ဒးလဝ်ဘဲဒဏ်တိချဳ ဒေသရးအင်ဝကဵု နေပျဳဒဝ်ဂှ် ဂကောံပရဟိတဂမၠိုင် ဗက်ဒုင်ဒၟံင်ဒါန်ဩန်တုဲ ပလံင်ဗစိုပ်ဒၟံင် မဒါန်နွံရောင် ဂွံတီကေတ် ပရိုင် နူညးက္ဍိုက်ပ်ဂကောံဆဝ်ဗ္ၚုဟ်မဒါန်တံရ။

သွက်ဂွံရီုဗင်ထံက်ပင် ကုဘာခၟဳသင်မန် ကေုာံ ညးဍုင်ကွာန်မန် ဒှ်ဒဒိုက်ဘဲဒဏ်တိချဳဂှ် မပ္တံကဵု ဂကောံရာမညပရဟိတကီု၊ ဂကောံတိုင်ခဳရီုဗင်ဘဲပၞာန်ကီု၊ ဂကောံပရဟိတ ရီုဗင်ထံက်ပင်မှာဇန်ဂမၠိုင်ကီု ဆဝ်ဗ္ၚုဟ်ဒုင်မံင်ဒါန်နွံ ဂွံတီကေတ်ရ။

“သွက်ဘာခၟဳသင်မန် (၁၀) ဘာ ကဵု သ္ၚိညးဍုင်ကွာန်မန်ပိုဲ ၜိုတ် (၁၀၀) မပြင်ပြင် ဒးလဝ်ဘဲသဘာဝတိချဳဂှ်တှ်ေ လၟုဟ် သွာင်ခၟဳသင်ပိုဲကီု၊ လ္ပာ်ခရှ်တံကီု ဂကောံပရဟိတညးကဵုညးဂှ် ဗက်ဆဝ်ဗ္ၚုဟ် ဒုင်မံင်ဒါန်လေဝ်နွံ၊ ဩန်ဒါန်ဂွံတုဲကၠုင်ဂှ်လေဝ် စပလံင်မံင်လေဝ်နွံ၊ နူကဵုသွာင်ရာမညပရဟိတကီု၊ နူကဵုတိုင်ခဳကီုဂှ် ဂွံလဝ်ၜိုတ်ဒးရးနွံ” သာ်ဝွံ ကျာ်ဇၞော်အ္စာ နူဂကောံရာမညပရဟိတမွဲဇကု ဟီုမြော်ထ္ၜးရ။

အဃောဂကောံပရဟိတဂမၠိုင်တံ ဆဝ်ဗ္ၚုဟ်ဒုင်မံင်ဒါန်သွက်ဘဲဒဏ်တိချဳ ဒေသရးအင်ဝ နေပျဳဒဝ်ဂှ်ဝွံ ပ္ဍဲဒေသမန်၊ ကရေင်ဂှ် ပ္ဍဲအခိင်သဘင်အတးတုဲကၠုင်ဏံ ပ္ဍဲကွာန်ကအ်ဗိုတ် ဘာခၟဳသင်မွဲဘာ ကေုာံ ညးဍုင်ကွာန်ဂမၠိုင် အာစိုပ်ဒဒိုက်ဘဲပၞာန်ပၠန်တုဲ မဩန်ဒါန်ကလိဂွံလဝ်ဂှ် ပါ်ပရအ်အာ သီုၜါသွာင်နွံရောင် ကျာ်ဇၞော်အ္စာဂှ် ထပ်ဟီုမြော်ရ။

တုဲကၠုင်ဂိတုမာတ် (၂၈) ဂှ် အလုံမွဲကၟိန်ဍုင်ဗၟာ တိချဳဇၞော်ကဵုဇြဟတ်တုဲ ပ္ဍဲရးအင်ဝဂှ် ဘာခၟဳသင်မန် (၆) ဘာ၊ နေပျဳဒဝ် (၂) ဘာကဵု ဇြပ်သဳလ ပ္ဍဲရးသေတ်ကိုင် (၁) ဘာ သီုဖအိုတ် (၉) ဘာ လီုလာ်သရိုဟ်အာ ဘဲဒဏ်တိချဳဂှ်တုဲ သ္ၚိညးဍုင်ကွာန်မန် ပ္ဍဲဒေသရးအၚ်ဝ ဗၞတ် (၁၀၀) သ္ၚိပြင်ပြင် လီုလာ်သရိုဟ်အာနွံဂှ် ဂွံတီကေတ်ရ။