အခိၚ်ကာစန်ဒက်မာဲဏံ ကာတ်ကောန်ဍုၚ်ဂှ် လီုကီုဒှ် ယဝ်ကၠောန်တၟိကီုဒှ် ဟွံဒးကဵုၚုဟ်မးမွဲသာ် အခေါၚ်ကၠောန်/ပဠေဝ် နွံပေၚ်ပေၚ်ရောၚ် အလံၚ်အမာတ်လ္ၚဵုတအ် ဟီုလဝ်ကီုလေဝ် နူရုၚ် (လဝက) တအ် ကေတ်မံၚ်ၚုဟ်အတိုၚ်တြေံရရောၚ် ညးအာကၠောန် ကာဒ်ကောန်ဍုၚ် နူသကုတ်သၠုၚ်ကျာ ပွိုၚ်ဍုၚ်မုဟ်ဍုၚ်မွဲတၠ ဟီုရ။
“မိၚ်ပရိုၚ်နူအလံၚ်အမာတ် ဗော်ညဳသၟဟ်မန်ဟီုတုဲဂှ် ကာဒ်ကောန်ဍုၚ်အဲ ရုပ်လီုမံၚ်ဂှ် အာပလေဝ်ကၠောန်တၟိ၊ လအ်အာ ၜိုတ် ၁၅ တ္ၚဲ ကၠောန်ဂွံကွေံ၊ ဆဂး စရိတ်တေံ စရိတ်အဏံ ဖအိုတ်အိုတ်အာ အကြာ ၜိုတ် (၁) ကိုဋ်” သာ်ဝွံ ညးဟီုရ။
ညးဍုၚ်ကွာန်တအ် ကာဒ်ကောန်ဍုၚ်ဟွံမွဲတုဲ သွက်ဂွံတက်တၟိကီုဒှ်၊ တက်လဝ်ကာဒ်ကောန်ဍုၚ်တုဲ လီုအာ ကၠေံအာကီုဒှ် သွက်ဂွံကဵုမာဲဂှ် ကာဒ်ကောန်ဍုၚ်နွံမှ အခေါၚ်ကဵုမာဲနွံဂှ်ရ နူကဵုကမ္မေယှန်ပေါဲရုဲမာဲကၟိန်ဍုၚ် လစှေ်ကမ္မေယှန်ပၞာန်တအ် ပလံၚ်ဗစိုပ်လဝ်လိက် ကုဗော်ပရေၚ်ဍုၚ်ကွာန်ဂမၠိုၚ်တအ်ရ။
“ညးဍုၚ်ကွာန်မွဲမွဲ ကာဒ်ကောန်ဍုၚ် လီုအာဒှ်ဒှ်၊ ကၠေံအာဒှ်ဒှ်၊ ဟွံမွဲဏီ ကၠောန်တၟိဒှ်ဒှ် ပ္ဍဲအခိၚ်ပေါဲရုဲမာဲဏံ ဆက်စၠောံကဵု ဗော်ပရေၚ်ဍုၚ်ကွာန်လုပ်ပြိုၚ်ပေါဲရုဲမာဲတအ်တုဲ နူကဵုရုၚ် (လဝက) တအ် ဒးကၠောန်ကဵု သၟးသၟး (မးမး) ရောၚ် အလံၚ်အမာတ်မန်တအ် အခိၚ်စှေ်လဝ်ပရေၚ်စန်ဒက် အကြာညးဍုၚ်ကွာန်ဂှ် ဟီုလဝ်နွံ၊ ဆဂး အလံၚ်အမာတ်တအ် ဟီုဂှ်ဟီုရ ရဲကၠောန်တအ်ဂှ် ဗီုအခိုက်ညးတအ်ကဵုညးတအ်ရ ကၠောန်မံၚ်” သာ်ဝွံ သၟတ်တိုန်စိုပ်လဝ် ပေါဲစန်ဒက်မာဲ နူအလံၚ်အမာတ်မန် ပွိုၚ်ဍုၚ်မုဟ်ဍုၚ်မွဲတၠဂှ် ဟီုရ။
ကိစ္စကၠောန်ကာဒ်ကောန်ဍုၚ်ဂှ် ရုၚ် (လဝက) နူအဆံၚ်လတူတေံ ၜိုန်ရစၞောန်ပ္တိတ်လဝ်ပၟိၚ် သ္ဒးကၠောန်ကဵု မသက္ကုၚုဟ်မးကီုလေဝ် နကဵုညးဍုၚ်ကွာန်အဆံၚ်သၟဝ်ဏံဂှ် စရိတ်ရဲဘိုၚ်ရေၚ်တၠုၚ်၊ စရိတ်တၞးလိက်တေံအဏံ၊ စရိတ် ဍာ်လက်ဖက် ညးတာလျိုၚ်မဆက်စပ်နာနာသာ်ဂှ် ဒးအိုတ်မံၚ်ဩန်နွံရ။
ပရေၚ်ကၠောန်ကာဒ်ကောန်ဍုၚ်ဂှ် ယဝ်ကေတ်ဗွဲမပြဟ်ပြေဟ် အကြာပွိုၚ်မွဲသတ္တာဟမ္ဂး အကြာ (၃) ကိုဋ်ကဵု (၄) ကိုဋ် အိုတ်မံၚ်တုဲ ယဝ်ဟွံဃရေက် လအ်ပွိုၚ်ကဵုဂိတုမ္ဂး ဓမ္မတာ အကြာ (၆-၇) လက်အိုတ်မံၚ်ရောၚ် ညးကၠောန်တအ်ဟီုထ္ၜးရ။
နကဵုညးဍုၚ်ကွာန်တအ် အခေါၚ်ကဵုမာဲ ညံၚ်ဟွံဂွံဆောံလေၚ်အာဂှ် နကဵုဗော် ပရေၚ်ဍုၚ်ကွာန်ဂမၠိုၚ်တအ် ဘိုၚ်ဆဝ်ဗ္ၚုဟ်တုဲ ရေၚ်တၠုၚ်ဆက်စၠောံကဵု ဌာနမဆေၚ်စပ်တအ်ညိဂှ် ဂိတုဒဳဇြေမ်ဗာ စၟတ်တ္ၚဲ (၁၁) ဏံ ကမ္မေယှန်ပေါဲရုဲမာဲကၟိန်ဍုၚ် ကမ္မယှေန်ပၞာန်တအ် ပတိတ်လဝ်လိက်နွံဂှ် ဂွံတီကေတ်ရ။
