ညးလဵုမွဲဟွံဟီု ယဝ်ရကၠောန်သ္ပတဴ ပရေင်သွံ၊ ရာန် ကေုာံ စကာသုင်ၜံက်ဓါတ် မကော်ဂး ဣဳ-ဇြဳကရိတ်၊ Vape တအ်မ္ဂး ရပ်စပ်ကေတ်အာအရေဝ်ဏောင် ဌာနဝန်ဇၞော်ပရေင်ထတ်ယုက် ကမ္မယှေန်ပၞာန် လလောင်ပ္တိတ်လဝ်အမိင် ပ္ဍဲဂိတုဖေဖဝ်ဝါရဳ စၟတ်တ္ရဲ (၁၈) ရ။

စက်ဇြောတ်၊ ဍာ်ဓါတ် ကေုာံ ကပေါတ်မဆက်စပ်ကဵု ၜံက်ဓါတ် ဣဳ-ဇြဳိကရိတ်၊ Vape တအ်သီုဖ္အိုတ်ဂှ် ပၠောပ်ပ္တိတ် သွံ၊ ရာန်ဟွံဂွံတုဲ (ဇြောတ်) သုင်ကီု ဂိုင်ဒေပ် ခြိုင်စွံလဝ်ကပေါတ်တအ်ဂှ်ကီု ကၠောန်သ္ပဟွံဂွံ ဌာနထတ်ယုက် ကမ္မယှေန်ပၞာန် ဟီုဂးလဝ်ရ။

လ္တူလိက်အမိင်ဏအ် ဟွံဒ္ဂေတ်ဗက်မွဲသာ် ရပ်စပ်ဂွံအာမ္ဂး သီုဒဏ်သြန် သီုဒဏ်ထံင်နူ (၆) ဂိတု စဵုကဵု (၃) သၞာံ ဖျေံမာန်ရောင် ဂွံတီကေတ်ရ။

ဣဳ-ဇြဳကရိတ်ဂှ် ဒှ်စက်ထပိုတ်ၜံက်မွဲ ဟီုဂးမံင်အိုတ်ရ။ တုဲပၠန် ဓါတ်ယက်ဂှ် မၞုံကဵုရှ်သာ သတ်ဆုသတ်ဒုန်ဂမၠိုင်တုဲ သၟုဟ်လေဝ်မောဝ်ဇောတ်ဒၟံင် ဟွံတုပ်ကဵုၜံက်ဓမ္မတာကီုဂှ်ရ ဗွဲတၟေင် ညးအဝဲသၟတ်ဂမၠိုင် (ဇြောတ်) သုင်တဴဂၠိုင်ရ။

ပွမဒုင်စရှ်သာ ဇြောတ်သၟုဟ်ယက်ဓါတ် ဣဳ-ဇြဳကရိတ်၊ Vape တအ်ဂှ် သၟဟ်ညံင်ရဴမသုင်၊ မဇြောတ်ၜံက်ဓမ္မတာဝွံက်ီု မၞုံကဵုအန္တရာယ်ယဲကေန်ဇြာသၟးဟွံက သွက်ညးအဝဲသၟတ်တအ်မ္ဂး ဗဒှ်ကဵုပရေင်ဇီုကပိုက် ပ္ဍဲအရာဖောအ်ဗြေဝ် ကၠေင်က္ဍဟ် ကေုာံ ပ္ဍဲအရာတန်ပဋိသန္ဓိတအ်ကီုရောင် အ္စာသဝ်ဂကောံဂၠးကဝ် (WHO) တအ် ဟီုထံက်ထ္ၜးလဝ်နွံရ။

ပရေင်သွံ၊ ရာန် ကေုာံ သုင်ၜံက်ဓါတ် ဣဳ-ဇြဳကရိတ်၊ Vape ပ္ဍဲဍုင်ဗၟာဝွံ စမံက်ဒှ်ကၠုင် နူအကြာသၞာံ ၂၀၁၄-၂၀၁၅ တေံတုဲ အဝဲသၟတ် ၂၅ သၞာံလ္ပာ်သၟဝ်တအ် စကာဂၠိုင်အိုတ်ရေားင် ဂွံတီကေတ်ရ။

ပ္ဍဲကဵုဍုင်အိန္ဒိယ၊ ခမေန်၊ သေံ၊ သကႅာပေါဝ်စတမ်တအ်လေဝ် ကၟာတ်ကၠေံလဝ်အခေါင်သွံ၊ ရာန် ကေုာံ သုင်ၜံက် ဣဳ-ဇြဳကရိတ်၊ Vape ကီုရ။