ပ္ဍဲဍုၚ်မန်ဝွံ ၚုဟ်ကၠေၚ်စှေ်အာကီုလေဝ် ပ္ဍဲဆေၚ်သွံကၠေၚ်တအ်ဂှ် ကၠေၚ်အိုတ်ပိုတ်ဒၟံၚ် ဂွံပိတ္ၚဲတုဲဣရရောၚ် တၠဆေၚ်သွံကၠေၚ်ဂမၠိုၚ်တအ် ဟီုရ။
အတိုၚ်လိက်ၚုဟ်ကၠေၚ် နူကဵုကမ္မတဳကောပ်ကာဲတြးခြိုၚ်ကၠေၚ် (စက်သုံးဆီတၚ်သွၚ်းသိုလှောၚ်ဖြန်႕ဖြူခြၚ်းလုပ်ၚန်း ကြီးကြပ်ရေးကော်မတီ) တအ် ပ္တိတ်လဝ် တ္ၚဲဏံ (ဂျူလာၚ် ၁၇) မ္ဂး ၚုဟ်ကၠေၚ်ဍုၚ်မန်ဂှ် ထပ်စှေ်အာကီုလေဝ် ပ္ဍဲ ဆေၚ်သွံကၠေၚ်ဂမၠိုၚ်တအ် ကၠေၚ်ပိုတ်ဒၟံၚ် ဂွံပွိုၚ်ပိတ္ၚဲတုဲအာရ။
“ဍုၚ်မန်ပိုဲဏံ ကၠေၚ်ပိုတ်ဒၟံၚ် ဂွံပိတ္ၚဲတုဲရ၊ ဆေၚ်ကၠေၚ်တအ်ဂှ် ဟွံကၟာတ်လဝ်ပုဟ်၊ ဆဂး လုပ်အာရာန်ကၠေၚ်တှေ် ကၠေၚ်ပိုတ်ဒၟံၚ် တၠဆေၚ်တအ်ဟီုဗီုဂှ်၊ အာဆေၚ်တၞဟ်လေဝ် တၠရဲသွံကၠေၚ်တအ် ဟီုဗီုဂှ်ပၠန်၊ ဆေၚ်ဗွဲမဂၠိုၚ်ဂှ် ကၠေၚ်ဟွံမွဲဂးတုဲ ဟွံသွံကဵုကၠေၚ်ပုဟ်” သာ်ဝွံ တၠကွဳစက် ပရဵုဗံက် ဒမြိပ်လာၚ် မတ်မလီု-ဇြပ်ဗု မွဲတၠ ဟီုရ။
အတိုၚ်လိက်ၚုဟ်ကၠေၚ် နူကဵုကမ္မတဳကောပ်ကာဲတြးခြိုၚ်ကၠေၚ် ပတိတ်လဝ်ဂှ်မ္ဂး ကၠေၚ်ဓာတ် (၉၂) မွဲလဳတာဂှ် (၃၄၃၅) ဒ္ကေဝ်တုဲ တၟော်ကဵုၚုဟ်ကၠေၚ်တုဲကၠုၚ်ဂှ်မ္ဂး ၚုဟ်အောန်စှေ်အာ (၄၅) ဒ္ကေဝ်ကီု၊ ကၠေၚ်ဓာတ် (၉၅) မွဲလဳတာဂှ် (၃၅၀၀) ဒ္ကေဝ်တုဲ တၟော်ကဵုၚုဟ်တုဲကၠုၚ်ဂှ်မ္ဂး အောန်စှေ်အာ (၄၅) ဒ္ကေဝ်ကီုရ။
တုပ်သာ်ဂှ်ကီု ကၠေၚ်ဒဳဇြေဝ်ဓမ္မတာ မွဲလဳတာဂှ် (၃၆၆၅) ဒ္ကေဝ်တုဲ ၚုဟ်အောန်စှေ်အာ နူကဵုတုဲကၠုၚ်တေံ (၁၁၅) ဒ္ကေဝ်ရ။ ကၠေၚ်ဒဳဇြေဝ် (ပရဳမဳယာန်) မွဲလဳတာဂှ် (၄၁၄၅) ဒ္ကေဝ်တုဲ ၚုဟ်အောန်စှေ် (၁၃၀) ဒ္ကေဝ်ကီုရ။ ၜိုန်ဂှ်ကီုလေဝ် ပ္ဍဲဆေၚ်သွံကၠေၚ်တအ်ဂှ် ကၠေၚ်ဂွံသွံဟွံမွဲတုဲ ညးဍုၚ်ကွာန်ဒးသုၚ်စောဲကၠေၚ်ဇၟာပ်တ္ၚဲတအ် ဒှ်ဒၟံၚ်ခက်ခုဲအိုတ်ရ။
“ရဲရုၚ်ကမၠောန်တအ် ရဲဒဳကွဳစက်လိၚ် (တေက်သဳ) တအ် ကေတ်ကၠေၚ်ဟွံဂွံတုဲ ဒှ်မံၚ်ဒဒိုက်ဖအိုတ်၊ လ္ၚဵုဂှ် ရဲလိၚ်အာတရဴသ္ၚောဲလေဝ် ဟွံဂွံအာပုဟ်၊ အကြာဏံ ဒးပလံၚ်မၞိဟ်ယဲရ ဒှ်ဒဒိုက်ဂၠိုၚ်၊ ဒးပလံၚ်မၞိဟ်ယဲ ကၠေၚ်လေဝ်ဟွံမွဲ ဒှ်ဒဒိုက်ဇၞော်ရ၊ ဍုၚ်ပိုဲဏံဂှ် သံသာဂေတ်မံၚ်ကဵု ကၠေၚ်အတိုၚ်ဏံရဟာဟွံတီ” သာ်ဝွံ တၠဒမြိပ်လိၚ် ကွဳသၠာပိ (အိုဝေ) နူဇြပ်ဗုမွဲပၠန်ဂှ် ဟီုရ။
ပ္ဍဲဆေၚ်သွံကၠေၚ်စက်ဂမၠိုၚ်တအ်ဂှ် ဟိုတ်နူညးဍုၚ်ကွာန်တအ် ရာန်ကၠေၚ်ဟွံဂွံတုဲ ကမၠောန်ဒးသုၚ်စောဲကၠေၚ် လၟေၚ်တ္ၚဲဗွဲမဂၠိုၚ်တအ်ဂှ် ဒှ်ဒၟံၚ်ခက်ခုဲနွံတုဲ ကိစ္စပရေၚ်ဂိယဲ ချိုတ်ဂၠိုၚ် အကြာဒေသကွာန်တအ်ဂှ် သာတုဲ ဒှ်ခက်ခုဲဂၠိုၚ်ရ။
နူကဵုကၟိန်ဍုၚ်ဝွံ သွက်ညးဍုၚ်ကွာန်ဂမၠိုၚ်တအ် ဂွံသုၚ်စောဲကၠေၚ်ဂှ် ဖန်ဇန်လဝ် ရုမ်ဂပ်ဒၟံၚ်ရောၚ် နူကဵုကမ္မတဳကောပ်ကာဲတြးခြိုၚ်ကၠေၚ် (စက်သုံးဆီတၚ်သွၚ်းသို လှောၚ်ဖြန်႕ဖြူခြၚ်းလုပ်ၚန်း ကြီးကြပ်ရေးကော်မတီ) ဟီုဓမံက်ဒၟံၚ် အဆက်ဆက်ကီုလေဝ် ကွေံကွေံဂှ်မ္ဂး ပ္ဍဲဆေၚ်သွံကၠေၚ်တအ် ကၠေၚ်ပိုတ်ဒၟံၚ် ဂွံပွိုၚ်ပိတ္ၚဲတုဲဣရရောၚ် ဂွံတီကေတ်ရ။