ဗွဲကြဴနူကဵု ဒပ်မင်ပယျဵု (BGF) ကရေင်တအ် ပြံင်စိုပ်ကၠုင် ဒေသမန်ဗွိုင်ဍုင်ကၟာဝက်ဂှ်တုဲ သၟတ်တအ် ဒးဒုင်ရပ်ဏာ ကြပ် (၁၀) တၠဒှ်ရရောင် ညးဒေသမွဲတၠ ဟီုထ္ၜးရ။
တုဲကၠုင်ဗၞတ်ၜိုတ်ၜါဂိတုဂှ် ဒပ်မင်ပယျဵု (BGF) ကရေင်တအ်မွဲဂကောံ လုပ်စိုပ်ဖျေံသ္ဇိုင် ဗွိုင်ဍုင်ကၟာဝက်တုဲဂှ် ဂကောံအုပ်ဓုပ်တအ် ပတိတ်ကၠုင်စၞောန်ပၟိင် မွဲကွဳလိုန်ဓာတ် ဍိုက်မၞိဟ်ၜါဟွံဂွံ နွံကၠုင်ရ။
ကြဴနူပတိတ်ကၠုင်စၞောန်ပၟိင် ဍိုက်ကွဳလိုန်ဓာတ်မၞိဟ်ၜါဟွံဂွံတုဲဂှ် သၟတ်နူဗွိုင်ဍုင်ကၟာဝက်တအ် ဒးဒုင်ရပ်ကၠုင် ကြပ် (၁၀) တၠဒှ်တုဲ လ္ၚဵုဂှ် နုက်ကဵုဩန်တုဲ ဗၠးတိတ်ကၠုင်နွံ၊ လ္ၚဵုဂှ် ဒးဒုင်ပလံင်ဏာ ကုဒပ်ပၞာန်နွံရောင် ညးဒေသဍုင်ကၟာဝက်မွဲတၠ ဟီုရ။
“နူကဵုဂကောံဒပ်မင်ပယျဵု (BGF) ဂကောံသဝ်ချေတ်တူတအ် စိုပ်ကၠုင်ဒေသဏံတုဲဂှ် သၟတ်တအ် အကြာ ၜိုတ် (၇၊ ၈) တၠ ဒးရပ်ဏာတုဲရ၊ လ္ၚဵုဂှ် နုက်ကဵုဩန်တုဲ ဗၠးတိတ်ကၠုင်၊ လ္ၚဵုဂှ် နုက်ဟွံဂတာပ် စိုပ်အာ ဒပ်ပၞာန်ဗၟာ ဒၞာဲပကောံပၞာန်တၟိတေံနွံ ဂွံပရိုင်ဗီုဂှ်” သာ်ဝွံ ညးဟီုရ။
ပ္ဍဲကဵုဗွိုင်ဍုင်ကၟာဝက်ဂှ် တမ်ဒပ် (၂၀၉) နွံတုဲ ဂိတုတုဲကၠုင်တေံ ဂကောံဒပ်မင်ပယျဵု (BGF) နူလ္ပာ်ပွိုင်ဍုင်ကအ်ကြိက်တအ် လုပ်ဖျေံလဝ်သဇိုင် ပ္ဍဲတမ်ဒပ် (၂၀၉) မွဲဂကောံနွံရ။
နူကဵုဒပ်မင်ပယျဵု (BGF) တအ် စိုပ်ကၠုင်တုဲဂှ် ညးတာလျိုင်သွာင်အုပ်ဓုပ်တအ် ပတိတ်ကၠုင်စၞောန်ပၟိင် ဗွိုင်ဍုင်ကၟာဝက်ဂှ် မွဲကွဳလိုန်ဓာတ်မၞိဟ်ၜါဍိုက်အာကၠုင်ဟွံဂွံဂှ်တုဲ ဂကောံဒပ်မင်ပယျဵုတအ် မင်ရပ်ဒၟံင်သၟတ်တအ် မွဲဒမြိပ်ဂၠံင်ဇၞော်ဂှ်ရ။
ဆက်တုဲညးဟီုပၠန်ဂှ် “ပ္ဍဲကွာန်ဂှ် ဍေံတအ်ဟွံလုပ်ရပ်ပုဟ်၊ အခိင်ဗတမ် ၜိုတ် (၉) နာဍဳကဝက် ဂၠုညိတှ်ေဍေံတအ် မင်ကြတ်ရပ်မံင် အကြာဂၠံင်ဇၞော်တေံ၊ ပှော်တိတ်အာ အခိင်ဂၠုအာညိတှ်ေဒးရ၊ ပိုဲထေင်ကေတ်တှ်ေဂကောံဒပ်မင်ပယျဵု (BGF) တအ် ကၠောန်စဩန်ကီု၊ တုဲတှ်ေနူလ္ပာ်ဒပ်ပၞာန်ဗၟာတအ်လေဝ် ဗလးလဝ် ရပ်ဂွံသၟတ်တအ်တှ်ေသွက်ဂွံပလံင်သ္ပကောန်ပၞာန်တၟိ ဗီုဏံ ဖျေံလဝ်အစဳဇန်နွံမံင် ပိုဲထေင်ဗီုဂှ်” သာ်ဝွံ ဂးရ။
အခိင်တ္ၚဲမ္ဂး ပ္ဍဲဗွိုင်ဍုင်ကၟာဝက်ကီု၊ ဗွိုင်မွဲဒမြိပ်ဂၠံင်ကွဳစက်ဇၞော်ဂှ်ကီု မွဲကွဳလိုန်ဓာတ်မၞိဟ်ၜါဂှ် နူကဵုကွာန်ဒေသတၞဟ်တၞဟ်တအ် အာကၠုင်ဒၟံင်အတိုင်ပကတိတြေံနွံတုဲ ကာလအခိင်ဗတမ် (၉) နာဍဳပြင်အာမ္ဂး ဒပ်ပၞာန်ဗၟာကဵု ဂကောံဒပ်မင်ပယျဵု (BGF) တအ် မင်ရပ်ဒၟံင်သၟတ်တအ် အကြာဂၠံင်ရ။
သၟတ်ဒးဒုင်ရပ်ဒၟံင်တအ်ဂှ် ပြဟ်ဂွံပရိုင်တုဲ ဗက်နုက်ကဵုဩန် ဗၠးတိတ်ကၠုင်လေဝ်နွံ၊ နုက်ဟွံဂတာပ်တုဲ ဒးဒုင်ပလံင်ဏာ ပ္ဍဲကဵုတမ်ဒပ်ပကောံကောန်ပၞာန်တၟိတေံ နွံရောင်ဂှ်လေဝ် ဂွံတီကေတ်ရ။