ကွဳစက်ဖ္ဍိုက်ကပေါတ် ကေုာံ ကွဳစက်ဖ္ဍိုက်ညးအာတရဴ မဂြိပ်ဒၟံင် နူသ္ကုတ်ဂၠံင်မတ်မလီု – လှာဒကှ် ကေုာံ မုဟ်ဍုင် – အၜေတ် – လှာဒကှ် ဇရေင်ဍုင်ကျာ်ပိတေံဂှ် ဍာ်ၜဳဇမိ ဟွံယအ်စှ်ေဏီဂှ်ရ ဒးဒေံါဇူလဝ် ပရေင်ဂြိပ်ကွဳစက်ရောင် ဂွံတီကေတ်ရ။
ဟိုတ်နူဗြဲဂူဆက် ဍာ်ဒဵုလိုအ်စှ်ေဂှ်ရ ဍာ်ၜဳဇမိပေင်ကၟိုဟ် ဍာ်ဇွောဝ်ထတ်မံင်ဖိုဟ်တုဲ နူကဵုသၞေဟ်ဂဒိုအ်၊ (ရေလဲ၊ ဓနုံး) ၊ ဝေသာလဳ ကေုာံ သၞေဟ်ဗေဒါဇၞော်တံဂှ် တတ်ကၠောံအာကၠုင်ကဵုဖံင် ဟွံဂွံဏီရောင် ဂးရ။
ညးအာတရဴဂမၠိုင်ဂှ်ဝွံ နူကဵုသ္ကုတ်ဂၠံင် မုဟ်ဍုင် – လိုင်ကၞုဲ မွဲတဆံင်ဂှ် ပလံင်ဗ္စိုပ်နကဵုဂၠံင် အဆံင်ဆံင်တုဲ ညးအာကၠုင်နွံကီုလေဝ် ဒှ်မံင်တရဴသဝ်တ္ၚဲ / တိက်ဗ္တံရောင် ညးဒဳကွဳစက် နူမုဟ်ဍုင်မွဲတၠ ဟီုရ။
“သ္ကုတ်ဂၠံင်လဵုဂှ် အာကၠုင်ဟွံလောဲပုဟ်။ ဖံင်ဂှ် ဟွံကၠောံကဵုပုဟ်။ ဍာ်ဇွောဝ်ထတ်တုဲ ပြဟ်ပြဟ်ဏံ ဒးဇူလဝ်ရ။ ၜိုတ်ပိပန်တ္ၚဲ လအ်ဏောင်ထေင်ရ။ နူမုဟ်ဍုင် ၜိုတ်ဍိုက်ဂွံဂှ် ဍိုက်ကၠုင်တုဲ အာကဵုဂၠုင်အဆံင်ဆံင်ရ။ ပ္ဍဲကဵုလိုင်ကၞုဲဂှ် ကာတံ ဆိုအ်မံင်ဖိုဟ်။ ကပေါတ်ကဵု ကာ စွံလဝ်ဂှ်တုဲ မၞိဟ်ဂှ် တတ်ကဵုဂၠုင်ရ” သာ်ဝွံ ညးဟီုရ။
စနူဂိတုအဝ်ဂေတ် (၂၀) တုဲ အကြာလိုင်ကၞုဲကဵု ဒဵုထောင်ဂှ် ဟိုတ်နူဍာ်ဇၞော်ဍာ်ကလိုပ်ဂှ်ရ ကွဳစက်ဖ္ဍိုက်ကပေါတ်ဗၞိက် ဟွံအောန်နူ (၂၀) ဖ္ဍိုက် တၟာတ်ဆိုအ်မံင်ရောင် ဂွံတီကေတ်ရ။
သၟာင်နူဂၠံင်တရဴ လဇုဲလဇတုဲ ဟိုတ်နူဒးဍိုက်ဗက်အဆံင်ဆံင်ဂှ်ရ ဒးအိုတ်စရိတ်ဂၠိုင်မံင်ရောင် ညးအာတရဴမွဲတၠ ဟီုရ။
“နူကဵုလိုင်ကၞုဲ ဒဵုကဵုဒဵုထောင်ဂှ် ၚုဟ်ဍိုက်ဂၠုင် ညးမွဲတၠ (၈၀၀၀) ဒကေဝ်၊ နူဒဵုထောင် ဒးက္လေင်လိင်ကာ (၂) ကိုဋ်ရ။ စိုပ်ထဳပါတ်လာရ၊ နူဂှ် ဒဵုကဵု (ရေလယ်) ညးမွဲ (၁) ဠက်၊ ကပေါတ်ဂှ်တှ်ေ ပ္တိုန်ကဵုဂၠုင်ဟွံလောဲတုဲ ပ္တိုန်ဟွံဂွံပုဟ်၊ ပ္ဍဲကျာ်ပိလေဝ် ပ္တိုန်မံင်ကပေါတ်ရ” သာ်ဝွံ ညးဟီုရ။
အခိင်ပြဟ်ပြဟ်ဏံဝွံ ပရေင်ပၠောပ်ကပေါတ်ဗၞိက်သေံဂမၠိုင်ဂှ် ဒးဒေံါဇူလဝ်တုဲ ပ္ဍဲလ္ပာ်သ္ကုတ်ဂၠံင်ထီုမၠဵု (စံပယ်ဂူ) ဂှ်လေဝ် စၟဳစၟတ်တေင်ဂြတ်ဂှ်ရ ညးအာတရဴကဵု ကွဳစက်ဖ္ဍိုက်ကပေါတ်ဂမၠိုင်လေဝ် အာကၠုင်ဟွံမာန်ဏီ ဂးရ။
ဟိုတ်နူဒေံါဇူလဝ် ပရေင်ပလံင်ဗ္စိုပ်ကပေါတ်ဗၞိက်ဂှ်ရ ပရေင်ကပေါတ်ဗၞိက်ဇွောဝ်စှ်ေအာကၠုင် လ္ပာ်ကျာ်ပိတေံဂှ် ဟွံဒှ်လၟေင်ဍာံ (အတိုင်တြေံ) မွဲသာ်တုဲ သၟာင်နူကပေါတ်ဗၞိက်သှေ်သၟေဟ် ၚုဟ်သၠုင်တိုန်ကၠုင်မာန်ဂှ်မ္ဂး အကာဲအရာကပေါတ်ပိုတ်သ္ကုတ် ဒှ်ကၠုင်မာန်ရောင် သၟာကွဳစက်တံ ဟီုရ။
ပ္ဍဲသ္ကုတ်ဂၠံင်မုဟ်ဍုင် – အၜေတ် – ကျာ်ပိဂှ်ဝွံ ကွဳစက်ဖ္ဍိုက်ညးအာတရဴ ကေုာံ ကွဳစက်ဖ္ဍိုက်ကပေါတ်ဗၞိက် လၟိဟ်ကဵုကၠံ တတ်ကၠောံအာကၠုင်ဒၟံင် ဇၟာပ်တ္ၚဲတုဲ အပ္ဍဲအခိင်ကသီုဏံ ဟိုတ်နူဂၠံင်ကွဳစက်လီုလာ်ဂှ်ရ ဒးဆဵုဂဗဒၟံင်ပြဒ္ဒညာ ပရေင်အာကၠုင်ဇၟာပ်သၞာံရောင် ဂွံတီကေတ် နူညးဒေသတံရ။