ပ္ဍဲပွိုင်ဍုင်ကအ်ကြိက်၊ တွဵုရးကရေင်ဝွံ အကြာကွာန်ကအ်ခိုက်ကဵု “နွားခြံကုန်” ဍာ်ဇၞော်ဍာ်ကလိုပ်ဒၟံင်ဂှ် ဂၠုင်စက်ဗ္ကပ်အာတုဲ အ္စာၝောံမွဲတၠ ဗၠိုက်ဍာ်ချိုတ်အာလဝ်ရောင် ဂွံတီကေတ် နူတမ်ရိုဟ်ပရိုင်အပ္ဍဲဒေသရ။
ဂိတုအဝ်ဂေတ် (၂၄) ၊ နူတနေံဏံ အခိင်နူဂယး ၜိုတ် (၁၁) နာဍဳဂှ် ဂၠုင်စက်ဖ္ဍိုက်နင် မၞိဟ် (၈) တၠ၊ ကွဳလိုန်ဓာတ် (၂) ဖ္ဍိုက် ကေုာံ ကပေါတ်ဗၞိက်မွဲဖ္ဍိုက်ဂှ် စက်ယောင်ယာအာတုဲ ဖ္ဍိုက်လဝ်လျိုင်လောန်ၜက်ဂှ်ရ ဗ္ကပ်အာရ။
ဗွဲကြဴနူဂၠုင်စက်ဗ္ကပ်တုဲဂှ် ညးဒေသတံ ကၠုင်စိုပ်ဟံင်ပြာ်ကီုလေဝ် ဟွံဆဵုအ္စာၝောံဂှ်ရ ဗွဲမဂတာပ်အခိင်ဟံင်ပြာ်ဟွံမာန်တုဲ ဒးချိုတ်အာရဂှ် ဂွံတီကေတ်ရ။
“ၜိင်ဍာ်လေဝ် ဟွံလေပ်ပုဟ်။ ညးကၠုင်ဟံင်ပြာ်တံလေဝ် ထေင်ကေတ် (၃) တၠဟေင်ရ။ ညးဟွံမံက်ကၠုင် ဟိုတ်နူပဠောံညးဟာ ဟွံတီပုဟ်။ ညးဟံင်ပြာ်တံစဴတုဲမှ မၞိဟ်ဟွံပေင်ဂးတုဲတှ်ေ က္လေင်ကၠုင်ဟံင်ပြာ်ဂှ် လအ်အာမွဲနာဍဳ၊ ၜါနာဍဳရတှ်ေ လမျီုအိုတ်အာရ” သာ်ဝွံ ညးစုက်လုက်ကဵု မၞိဟ်ချိုတ်အာ မွဲတၠဂှ် ဟီုရ။
ဇွအ္စာၝောံဂှ်ဝွံ အခိင်သဝ်တ္ၚဲ (၃) နာဍဳပြင်ဂှ် က္လေင်ဂၠာဲဆဵုတုဲ ကွဳလိုန်ဓာတ် (၂) ဖ္ဍိုက်၊ ဖ္ဍိုက်နင်လ္တူဂၠံင်စက်ဂှ်လေဝ် ဗၠိုက်အာဍာ်ရ။
အ္စာၝောံ မဒးချိုတ်အာဂှ်ဝွံ ယိုက်ဂၠေင်မံင်တာလျိုင် ပ္ဍဲဘာတန်လဒေါဝ်၊ ကွာန် (နွားခြံကုန်း) ဂှ်တုဲ အဃောက္လေင်စဴနူရာန်ကပေါတ်ဘာ မွဲကရောံကဵု သ္ကံရဲကၠောန်ကမၠောန်မွဲစွံ (၃) တၠဂှ် ဍိုက်ကၠုင်ဂၠုင်စက် နူကွာန်ကအ်ခိုက်ရ။
သၟာင်နူလယိုင်ဂၠိက်ယာတ်တုဲ ၜိင်ဍာ်ဟွံလေပ်ဂှ်ရ အခိင်ဂၠုင်ဗ္ကပ်ဂှ် ဗၠိုက်ဍာ်တုဲ မဒးချိုတ်အာရောင် ညးဒေသတံ ထေင်ခယျမံင်ရ။
စနူဂိတုအဝ်ဂေတ် သတ္တဟဒုတိယတုဲ ပ္ဍဲကွာန် (နွားခြံကုန်း) ဂှ် ဍာ်ဇၞော်ဍာ်ကလိုပ်တုဲ ဒးအာကၠုင်ဒၟံင် ဇရေင်ကွာန်ကအ်ခိုက် နကဵုဂၠုင်စက်ရောင် ဂွံတီကေတ်ရ။
ဟိုတ်နူဗြဲဇၞော်ကဵု ဍာ်ဒဵုလိုအ်စှ်ေတုဲ ဍာ်ၜဳ (သောင်းရင်း၊ ဇမိ၊ လှိုင်းဘွဲ) အပ္ဍဲတွဵုရးကရေင် ဇၞော်တိုန်ဂှ်ရ အပ္ဍဲပွိုင်ဍုင်ကအ်ကြိက်၊ ကြုင်ဒဵု၊ (လှိုင်းဘွဲ႕) ကေုာံ ပွိုင်ဍုင်လှာဒကှ်ဂှ် ဍာ်ဇၞော်ဍာ်ကလိုပ်မံင်ဖိုဟ်ရ။
ဂိတုအဝ်ဂေတ် စၟတ်တ္ၚဲ (၂၁) တုဲကၠုင်ဏံဂှ်လေဝ် ပ္ဍဲၜဳဇမိ၊ ကြပ်ကွာန်လိုင်ကၞုဲ၊ ပွိုင်ဍုင်လှာဒကှ်ဂှ် ဂၠုင်စက်ဖ္ဍိုက်နင်ညးအာတရဴ (၁၁) တၠမွဲဖ္ဍိုက် ဗ္ကပ်အာကီုလေဝ် ဟံင်ပြာ်ရီုဂွံလမျီု ညးအာတရဴတံသီုဖအိုတ်မာန်ကီုရ။