အသေအဟာန် စၟတ်သမ္တီ တ္ၚဲပၠန်ဂတးမန် မရနုက်ကဵု (၇၉) ဝါဏံဝွံ ဟိုတ်နူကၠောန်ဗဒှ် ဒၞာဲဗဟဵုမွဲဒၞာဲဓဝ် ဟွံမာန်ဂှ်ရ ပ္ဍဲကဵုဒၞာဲဂိုဟ်ဒလာင်ဇုတ်အာဇာနဲ မကြပ်ကဵုဇကုတံဂှ် အာစိုပ်ကၠောန်ဗဒှ်ညိ နူဝှဝ်ရာမ်သၟတ်မန် (MYF) ဖ္တိုက်ဖၟောဝ် လလောင်ပ္တိတ်လဝ် ပ္ဍဲဂိတုအဝ်ဂေတ် (၂၅) ၊ တ္ၚဲဏံရ။
တ္ၚဲပၠန်ဂတးမန် မရနုက်ကဵု (၇၉) ဝါ၊ ပ္ဍဲဂိတုအဝ်ဂေတ် (၂၈) ဏံဝွံ ဟိုတ်နူအကာဲအရာ ပရေင်ဆက်စၠောံဂၠံင်ဍာန်ဝါတ်ဂါတ်ကီု၊ အကာဲအရာပကတိဍုင်လၟုဟ်ဏံကီုတုဲ သွက်ဂွံက္ဍိုက်က္ဍိုပ်ပံင်ကောံ ကၠောန်ဗဒှ်ရေင်သ္ကံမွဲဒၞာဲဓဝ်ဂှ် ဟွံလောဲသွာရောင် ဂးရ။
ၜိုန်ဂှ်ကီုလေဝ် သ္ဂောံသ္ပဂါရဝဗှ်ဗၞုဟ် က္ဍိုပ်သ္ကိုပ်ပၠန်ဂတးမန် မပူဇဴလဝ်လမျီု သွက်ကောန်ဂကူမန်ကီု၊ ဆဳဇာတိမာန်ဇာတိ သ္ဂောံၚုဟ်ကတဵုကီု၊ သ္ဂောံတီပရူဒဒှ်ဝင်ပၠန်ဂတးမန်ကီုတုဲ နကဵုမိမညးဍုင်ကွာန် ကေုာံ သၟတ်မန်တံ သွက်သ္ဂောံဆက်ယိုက်ဂၠေင်အာ ဖဵုကောန်ဂကူမာန်ဂှ်မ္ဂး ဒၞာဲစၟတ်သမ္တီလဝ် ဂိုဟ်ဒလာင်ဇုတ်၊ ဗီုရုပ်အာဇာနဲ ပ္ဍဲလၟေင်ပွိုင်ဍုင်တံဂှ် ကၠောန်ဗဒှ်အာ အစဳဇန် ဗှ်ဗၞုဟ်ညိ နူ MYF ဖ္တိုက်ဖၟောဝ်လဝ်ရ။
အသေအဟာန် ဆေင်စပ်ကဵု ပရေင်ကောန်ဂကူ၊ ပရေင်ဍုင်ကွာန်ဂှ် ဒးဒုင်သၞောတ်ဗ္ၜတ်လဝ်တုဲ ပွမဒးကၠောန်ဗဒှ် ဗွဲသရောပ် (ဗွဲခမ္ဍန်) ဂှ် ရှ်သာဟွံမွဲရဂှ်လေဝ် ညးက္ဍိုက်က္ဍိုပ်ကေင်ကာသၟတ်မန်မွဲတၠ ဟီုကဵုဌာန်ပရိုင်ဗၠးၜးမန် IMNA ရ။
“ကၠာတေံတှ်ေ မုအသေအဟာန်ဒှ်ဒှ် အခေါင်ကၠောန်နွံရ။ အရေဝ်မိက်ဂွံဟီုကဵုသၟတ်တံ၊ ခန်လ္ၚတ်တံဂှ် ဒဵုကဵုလုပ်စိုပ်ဂြိုဟ် ဟီုဂွံမံင်ရ။ ဆဂး လၟုဟ်ဏံ ကၠောန်ဗဒှ် အသေအဟာန် ဆေင်စပ်ကဵု ကောန်ဂကူ၊ ပရေင်ဍုင်ကွာန်တှ်ေ ဒးဒုင်ကၟာတ်၊ ဒးဒုင်သၞောတ်ဗ္ၜတ်မံင်ရ။ ဟိုတ်ဂှ်ရ မုအသေအဟာန်ဒှ်ဒှ် ဒးကၠောန်မံင် ဗွဲခမ္ဍန်ရ။ လအ်ခ္ဍင် အကာဲအရာ ပရေံကၠုင်ခ္ဍင်” သာ်ဝွံ က္ဍိုပ်သ္ကိုပ်သၟတ်ဂှ် ဟီုရ။
အခိင်ကၠာဒပ်ပၞာန်ဟွံဂွံသီအဝဵုဂှ်မ္ဂး အသေအဟာန် တ္ၚဲပၠန်ဂတးမန်ဂှ် နကဵုဝှဝ်ရာမ်သၟတ်မန် (MYF) က္ဍိုက်က္ဍိုပ် ကၠောန်ဗဒှ် ဒၞာဲဂိုဟ်ဒလာင်ဇုတ်အာဇာနဲမန် ပ္ဍဲဘာဝင်စိင်၊ ပွိုင်ဍုင်မုဟ်ဍုင်တုဲ သၟတ်၊ ညးဇၞော်၊ ခၟဳသင် နူဌာန်သ္ၚောဲဌာန်ကြပ်နာနာတံ ပါလုပ်ကောံကောံကလောံကလောံရ။
အသေအဟာန်တ္ၚဲပၠန်ဂတးမန်ဝွံ ဒှ်တ္ၚဲညးဍုင်ကွာန်မန်တံ ဗှ်ဗၞုဟ်ပ္တိုန်ဂုန်စရာဲ ကုအာဇာနဲ မပြဟ်လလုဲလဝ် အပ္ဍဲကာလပၠန်ဂတး ကေုာံ ညးမလုပ်ပေဲါဗ္တိုက်ပူဇဴလမျီု သွက်ပရေင်ကောန်ဂကူမန်တံရ။
ဟိုတ်ဂှ်ရ ဒၞာဲဂိုဟ်ဒလာင်ဇုတ်အာဇာနဲနွံသၟးဟွံက သီုဒၞာဲဒေသကောန်ဂကူမန် ဒၟံင်တန်တဴဂမၠိုင်ဂှ်ကဵု မန်မစိုပ်ဍုင်သၟာင်ဂမၠိုင်တံလေဝ် ဇၟာပ်သၞာံ ကၠောန်ဗဒှ်ဒၟံင် အသေအဟာန်တ္ၚဲပၠန်ဂတးမန် ပ္ဍဲဘာလကျာ်၊ ဒၞာဲဂိုဟ်ဒလာင်ဇုတ် ကေုာံ ပ္ဍဲခရိုင်ဗော်ဍုင်မန်တၟိဂမၠိုင်ဂှ်ကီုရောင် ဂွံတီကေတ်ရ။