ပ္ဍဲကဵုကွာန်၊ လ္တူဍုင်၊ တွဵုရးဍုင်မန်ဝွံ ဒးဂွိင်မံင်ကဵု ပရေင်ရပ်ပဝ်တာဂှ်ရ အခိင်ဗ္တံမ္ဂး ညးဒေသတံ အာကၠုင်တိတ်မ္ၚးအောန်စှ်ေတုဲ ပ္ဍဲကဵုဂၠံင်ဍာန်ဂှ် သ္ၚိတ်ဇြဒၟံင်ရောင် ညးဒေသဂမၠိုင်တံ ဟီုရ။
နူကၠာအခိင်စၟတ်လဝ် အမိင်တိတ်ဗ္တံဟွံဂွံဏီဂှ်ရ ဒပ်ပၞာန် ကေုာံ ဂကောံဒပ်ဗၠာဲသၟိင်ဒေသတံ ဂေတ်မံင်ကင်ကဵုကွဳစက်တုဲ ရပ်ကော်ဏာမံင်သၟတ်တံနွံရောင် ညးဒေသပံင်မွဲတၠ ဟီုရ။
“ကာဗၠာဲသၟိင်တံ ၜိုတ် (၅) မ ရေင်တုဲ ဂေတ်မံင်ရ။ (၁၁) နာဍဳတုဲ ဆဵုတှ်ေ ရပ်ရ။ ဂွံၜိုတ်မွဲအဒိုတ်ယျ။ ဆေင်တံလေဝ် ကၟာတ်လဝ်ရ။ စတမ်နူဆေင်ဍာ်လက်ဖက်ပအ်၊ သၟတ်သၟးဟွံသေင်ပုဟ်၊ ညးလဵုလေဝ် ဟွံဂံင်တိတ်မ္ၚးပုဟ်။ ၜိုတ် (၇) နာဍဳဟီုဂှ် သ္ၚိတ်ဇြမံင်အိုတ်ရ။ ကွဳလိုန်ဓာတ်တံ သောင်မံင်ဟဂှ်ရ” သာ်ဝွံ ညးဟီုရ။
တုပ်သာ်ဝွံကီု ပ္ဍဲဍုင်ဇြပ်ဗုဂှ်လေဝ် အခိင်ကၠာတေံမ္ဂး စဵုကဵု (၉) နာဍဳဂှ် ညးအာကၠုင်ပ္ဍဲဂၠံင်ဍာန်နွံကီုလေဝ် အပ္ဍဲတ္ၚဲအကြာတဏံဝွံ အခိင်ဗ္တံမ္ဂး အကာဲအရာလ္တူဍုင် သ္ၚိတ်ဇြဂၠိုင်ကၠုင်ရောင် ညးဗြဴဒေသလ္တူဍုင်မွဲတၠ ဟီုရ။
“ဆေင်ကွာင်လ္တူဍုင်ဂှ် ကၟာတ်ပြဟ်ကွေံရ။ မၞိဟ်သောင်မံင်ပ္ဍဲဂၠံင်ဍာန်ဂှ် ဂွံၜိုတ်ပိပန်တ္ၚဲရ။ ဒဵုကဵု (၉) နာဍဳဂှ်တှ်ေ ဂွံဆဵုမံင်မၞိဟ်ဏီရ။ ညးအာကၠုင်တရဴဂှ် ဟွံဆဵုပုဟ်။ ကိစ္စဇၞော်လေဝ် ဟွံဂံင်တိတ်ပုဟ်။ ဣညအ်ဂှ် အခိင်ပံက်ထ္ၜိုတ်ဟွံသေင်ဏီ၊ အခိင်ဂှ်တှ်ေ ညးခွါတ်ထ္ၜိုတ်ဟေင် ဒးဒုင်ရပ်ဟာ၊ ဒးဒုင်ပလံင်ကွဳလိုန်ဓာတ်ဟာ၊ ပလုက်တံလေဝ် ပတှ်ေဂွံ ဟွံသေင်ပုဟ်” သာ်ဝွံ ညးဟီုရ။
တုဲပၠန် ပ္ဍဲကဵုသ္ကုတ်ဂၠံင်ဍာန်မၞိဟ်ပိုတ်တံဂှ် အာကၠုင်အခိင်တ္ၚဲလေဝ် ဒးဂွိင်မံင်ရောင် သၟာကၠောန်ကၠအ် နူဍုင်ကၟာဝက်မွဲတၠ ဟီုရ။
“စနူအာအလောန် ဟွံဂံင်အာပုဟ်။ ကၠအ်ပိုဲဂှ် ဒးတတ်လ္ပာ် (၇) ကဝး မုဟ်ဍုင်တှ်ေ သွက်ဂွံဗာ်ချောဲ ပသောင်ကၠအ်ဂှ် စနူအခိင်တ္ၚဲ ဟွံဂံင်အာပုဟ်။ ဒှ်မံင်သ္ကုတ်ဂၠံင် မၞိဟ်ပိုတ်တှ်ေ” သာ်ဝွံ ဟီုရ။
ဒၞာဲမသ္ၚောဲကဵုဗဒိုပ်ဗၠာဲသၟိင်ဂှ်ဝွံ ဂကောံပၞာန်ကွာန်တံ မင်ရပ်ဂှ်ရ ပ္ညဳကဵုသြန်တုဲ ညးက္လေင်ဗၠးကၠုင်နွံကီု၊ အဃောကံက်သြန်စရိတ်ယိုက်ဂၠေင်ပၞာန်ဂှ်မ္ဂး ညးကဵုသြန်ဟွံမာန်တံဂှ် က္လေင်သွံကဵုသ္ကိုပ်အုပ်ဓုပ်နွံမံင်ရောင် ညးဒေသပံင်ဂှ် ဟီုရ။
ဇြဟတ်ညးယိုက်ဂၠေင်ပၞာန် သ္ဂောံဍိုက်ပေင်ဂှ်မ္ဂး ပွမရပ်စပ် ပကောံပကေဝ်သၟတ်ကီု၊ နူပွမရပ်စပ်ဂှ်မွဲတဆံင် အာတ်မံင်သြန်ကီုဂှ်ရ သၟတ်တံ အာကၠုင်စွံသတိတုဲ လ္ပအာကၠုင်အခိင်ဗ္တံညိဂှ် နအလဵုဇကု သ္ကိုပ်အုပ်ဓုပ်ကွာန်/အရာပ် မဆေင်စပ်တံ ဟီုဂးကဵုလဝ်သတိရ။
ပ္ဍဲပေဲါကောံဓရီုကၠတ်တွဵုရးဍုင်မန်ဝွံ ကာလကော်ညးယိုက်ဂၠေင်ပၞာန်မ္ဂး အတိုင်သၞောဝ်ဥပဒေဟွံသေင်မွဲသာ် ရပ်ညးအာကၠုင်အကြာဂၠံင်ဍာန်တုဲ အာတ်ကေတ်မံင်သြန်ဂှ် ကေတ်အာအရေဝ်ရောင် ပ္ဍဲဂိတုဂျောန် (၁၉) တုဲကၠုင်တေံ ဂကောံအလဵုအသဳတွဵုရးဍုင်မန် ဟီုဂးလဝ်ကီုလေဝ် ကၠောန်သ္ပနတဲဟွံမွဲဣရဂှ် ဂွံဆဵုကေတ် ပ္ဍဲဗလးတိ ကၠးကၠးဖ္ဍးဖ္ဍးရ။
ပ္ဍဲတွဵုရးဍုင်မန်ဝွံ တန်ဗ္တောန်ယိုက်ဂၠေင်ပၞာန် သွက်လၟေင် (၂၈) တုဲကၠုင်ဏံဂှ် သၟတ် (၂၂၂) တၠ ဒးဒုင်ပကောံလဝ်နွံရ။ ဗွဲမဂၠိုင်တံဂှ် ထ္ၜးဟိုတ်ကဵု ဖံက်ပလီုအမိင်ဒေသန္တရတုဲ ဒးဒုင်ရပ်ကီု၊ ညးဒးဒုင်ရပ်ပဝ်တာဗွဲအဓမ္မတံကီု ပါလုပ်မံင်ရ။