သၟတ် (၃) တၠ အာဝေင်ဍာ် ကြပ်ကွာန်ဒဒန်ချေတ်၊ ပွိုင်ဍုင်ဇြပ်ဗု၊ တွဵုရးဍုင်မန်ဂှ်ဝွံ ပ္ဍဲကဵုဂၠံင်ဂြိုပ်မွဲဒၞာဲဂှ် ဒးဒုင်ပၠံင်ၜးဏာ ကွဳလိုန်ဓာတ် ကေုာံ ဖုင်နွံရောင် အတိုင်ညးစုက်လုက်ကဵု တၠခန္ဓတံ ဟီုဂးလဝ်ဂှ် ဂွံတီကေတ်ရ။
ပ္ဍဲဂိတုသေပ်တေမ်ဗာ စၟတ်တ္ၚဲ (၁၁) ၊ အခိင်သဝ်တ္ၚဲ ၜိုတ် (၃) နာဍဳ သၟတ် (၃) တၠ ဒဳဍိုက်ကၠုင်ကွဳလိုန်ဓာတ် နူကွာန်ပ္ၚဂှ် ညးတြုံ (၂) တၠ ထ္ၜးမြဇြေင်ကဵုဒေံါတုဲ ပၠံင်ၜးကေတ်ဏာ ကွဳလိုန်ဓာတ်ကဵု ဖုင်ရောင် ညးစုက်လုက်ကဵုသၟတ်ဂှ်မွဲတၠ ဟီုရ။
“ပ္ဍဲကဵုစိုပ်ဂၠံင်ဂြိုပ်ဒဒန်ချေတ်ဂှ် မၞိဟ်ၜါတၠဂှ် ရပ်လဝ်ဇြေင်သီုၜါတုဲ ပၠံင်ၜးကေတ်ဏာ ကွဳလိုန်ဓာတ်ကဵု ဖုင်ရ။ ဟီုဂှ်တှ်ေ ကွဳလိုန်ဓာတ်မွဲဖ္ဍိုက်ကဵု ဖုင်မွဲမဂှ်တှ်ေ ပါအာရ။ ကွဳလိုန်ဓာတ်ဂှ် ၜိုတ် (၆၀) ကိုဋ်နွံဏောင်။ သီုဖုင်ဟီုတှ်ေ ၜိုတ် (၁၀၀) ကိုဋ်နွံဏောင်။ ညးပၠံင်ၜးဂှ် ဗၟာတံဏောင် ဂးရ” သာ်ဝွံ ညးစုက်လုက်ကဵုသၟတ်ဂှ် ဟီုရ။
ညးပၠံင်ၜးကေတ်ဏာတံဂှ် ဗက်ရပ်ဟွံမာန်ဏီဂှ်ရ ကွဳလိုန်ဓာတ်ကဵု ဖုင်ဂှ်လေဝ် ဟွံက္လေင်ဂွံဏီ ဂးရ။
အပ္ဍဲကာလ ပရေင်ဂီုကၠီုဒေသဟွံမွဲ ဗီုလၟုဟ်ဏံဂှ် အခိင်ဗ္တံမ္ဂး စင်ခြင်အာကၠုင်ညိ၊ ပ္ဍဲကဵုဒၞာဲပြေလၟောင်၊ ၜိင်/ဝေင်ဍာ် မၞိဟ်ပိုတ်သ္ကုတ်တံဂှ် နကဵုညးမွဲတၠဓဝ် အာဟွံထေက်ရဂှ်လေဝ် ညးဒေသဇြပ်ဗုမွဲတၠဂှ် ဟီုရ။
“ဗီုကဵုကာလလၟုဟ်ဏံ သၟတ်တံ ၜိင်ဍာ်၊ ပြေလၟောင် ဂးတုဲ အာအတေံ အာအဏံ နွံရ။ ဒၞာဲကြပ်ကဵုပွဳဗွိုင်မၞိဟ်တံဂှ် ပြေပြံင်မာန်ကီုလေဝ် ကာလအာဒၞာဲသ္ၚောဲကဵုမၞိဟ်တှ်ေ အာနကဵုဂကောံဂှ် ခိုဟ်ရ။ တုဲတှ်ေ အာနကဵုညးမွဲဓဝ်ကီု၊ အခိင်သဝ်တ္ၚဲ လဇုဲတုဲမှ အာကီုဂှ် ဒှ်မာန်တှ်ေ ဝေင်ပဲါထေက်ရ” သာ်ဝွံ ညးဟီုရ။
ပ္ဍဲဂိတုအေဗရဴ၊ သၞာံ (၂၀၂၅) တုဲကၠုင်ဏံဂှ်လေဝ် ပ္ဍဲကဵုကၠအ်ထ္ၜိုတ် မၞိဟ်အာကၠုင်ပိုတ်သ္ကုတ် ကြပ်ကွာန်ဗဒိုပ်ဇၞော်၊ ပွိုင်ဍုင်ဇြပ်ဗုဂှ် ညးဓရိပ်ကွဳလိုန်ဓာတ်လာင်မွဲတၠ ဒးဒုင်ဂစိုတ်တုဲ ပရူဒဒှ် ဒးဒုင်ပၠံင်ၜးဏာ ကွဳလိုန်ဓာတ်ကဵု ဖုင် နွံကၠုင်လဝ်ကီုရ။
ဟိုတ်နူအကာဲအရာ ပရေင်ဍုင်ကွာန် ဗွဲကြဴနူဒပ်ပၞာန်သီအဝဵုဂှ်တုဲ ပရေင်ကမၠောန်ကၟိတ်အောန်ကီု၊ ပရေင်မံင်စံင်စသုင်ကြေပ်ဂြတ်ကီုဂှ်ရ အပ္ဍဲဒေသမန်ဝွံ သၟာင်နူထ္ၜးလွဟ် ပၠံင်ၜး၊ ကၠတ်ဂၠံက်ဂှ်မ္ဂး ကတဵုဒှ်ကၠုင် စဵုကဵုပရေင်ဒမၠဗ္တိုက်တုဲ ညးဒေသတံ ဒးမံင်တန်တဴကၠုင် နကဵုပရေင်ဂီုကၠီုဟွံမွဲရောင် ဂွံတီကေတ်ရ။