ဒေသလှာဒကှ် မပါလုပ်ပ္ဍဲဒေသသ္ကုတ်သၟဝ်ကျာ၊ တိဍာ်ဗော်ဍုင်မန်တၟိ (ဗတိုက်သရိုဟ်တၠအဝဵုပၞာန်) NMSP-AD ထိင်ဒဝ်ဂှ်ဝွံ စၟတ်သမ္တီကေတ် နဒဒှ်ပွိုင်ဍုင်စဳပျးမွဲတုဲ ဓမံက်အာရုပ်ရဴ သၞောတ်ပရေင်အုပ်ဓုပ် မသ္ပသ္ဇိုင်ကုညးဍုင်ကွာန်ဒေသန္တရရောင် ဂွံတီကေတ်ရ။
“ပ္ဍဲကဵုဟီုစဳပျး (စံပြ) ဂှ်လေဝ် ဗီုကဵုစဳပျးအဆံင်ကၟိန်ဍုင်ဂှ် ဟွံသေင်ပုဟ်။ ဗီုပြင်သၞောတ်အုပ်ဓုပ်စဳပျး ကိတ်ညဳကဵု ညးဍုင်ကွာန် ဒေသပိုဲတံရ” သာ်ဝွံ ညးလျိုင်ကောပ်ကာဲ ဒေသသ္ကုတ်သၟဝ်ကျာ NMSP-AD နာဲသူရဌေ ဟီုရ။
ယင်သၞောတ်အုပ်ဓုပ်စဳပျး မသ္ပသ္ဇိုင်ကုညးဍုင်ကွာန်ဂှ်ဝွံ ပ္ဍဲသၞာံ (၂၀၂၇) တေံ စဓမံက်အာရုပ်ရဴ ပ္ဍဲကွာန်မန် မၞုံအပ္ဍဲပွိုင်ဍုင်လှာဒကှ်၊ ဗော်ဍုင်မန်တၟိ (ဗတိုက်သရိုဟ်တၠအဝဵုပၞာန်) NMSP-AD ထိင်ဒဝ်ဂှ်ရောင် အတိုင်ညးလျိုင်ကောပ်ကာဲ ဒေသသ္ကုတ်သၟဝ်ကျာ ဟီုဂးလဝ်ဂှ် ဂွံတီကေတ်ရ။
ညးတာလျိုင်အုပ်ဓုပ် အဆံင်ကွာန်၊ ပွိုင်တိုက် ကေုာံ ပွိုင်ဍုင် မပါလုပ်ကီု ပ္ဍဲကဏ္ဍဆေင်စပ်ကဵု ပရေင်စဳရေင်သၞောဝ်ဂှ် ညးတာလျိုင်အဆံင်ကွာန် ကေုာံ ပွိုင်တိုက်ဂှ် နအလဵုဇကုညးဍုင်ကွာန် ကဵုမာဲရုဲစှ်ပ္တိုန်အာရောင် ဂးရ။
တုဲပၠန် ဂကောံမနွံပၟိက် ညံင်ရဴဂကောံဗဂဵုလဟဵု၊ ဂကောံဖောအ်ဗြေဝ်ဒေသ ညးဍုင်ကွာန်တံ မပါလုပ်ဂှ်လေဝ် ဒက်ပ္တန်အာရောင် ဂွံတီကေတ်ရ။
“ပြဟ်ပြဟ်ဏံ ဂကောံဂီုကၠီုကွာန်၊ ဂကောံဂီုကၠီုပွိုင်တိုက်ဂှ်တှ်ေ ပ္ဍဲဒေသမဆေင်စပ်တံ လၟေင်ကမၠောန်ပရေင်ၜိုဟ်လလမ်၊ ပရေင်စဵုဒၞာ ညးဍုင်ကွာန်နွံပၟိက်ဂှ် ရေင်တၠုင်ဓမံက်မံင်ရုပ်ရဴနွံ” သာ်ဝွံ နာဲသူရဌေ ဟီုရ။
သၞောတ်ပရေင်အုပ်ဓုပ်စဳပျး မသ္ပသ္ဇိုင်ကုညးဍုင်ကွာန်ဒေသန္တရဏံ သ္ဂောံဇပ်ဍပ် (ချိုတ်ပၠိုတ်) ကၠုင်ဂှ် နကဵု NMSP-AD ဆဵုဂဗသဳကၠဳလဝ်ကဵု ညးဍုင်ကွာန်/ညးဒေသတံ ဟွံအောန်နူ (၈) ဝါ တုဲဒှ်ယျရောင် ဂွံတီကေတ်ရ။
ဗော်ဍုင်မန်တၟိ (ဗတိုက်သရိုဟ်တၠအဝဵုပၞာန်) NMSP-AD ဝွံ အပ္ဍဲဂိတုဖေဖဝ်ဝါရဳ၊ သၞာံ (၂၀၂၄) တုဲကၠုင်တေံဂှ် ပါ်တိတ်နူ ဗော်ဍုင်မန်တၟိ NMSP မထ္ပက်လဝ်စၟတ်တဲအေန်ဇြဳအေဂှ်တုဲ သွက်သ္ဂောံဒက်ပ္တန် ကၟိန်ဍုင်ဖေဝ်ဒရေဝ် မဍိုက်ပေင်ကဵု အခေါင်ကံကုသဵုဇကု ဇကုဖန်ဖက်ကေတ်ကေတ် ကေုာံ ပရေင်တုပ်သၟဟ်ဂကူဂှ် ပံင်တောဲကဵု ဂကောံဇြဟတ်ပၠန်ဂတး တမ်က္ညင်ဂမၠိုင်၊ ဂကောံပၠန်ဂတး ကောန်ဍုင်အရင်ဂမၠိုင်တုဲ လုပ်မံင်ပေဲါဗ္တိုက် ကုဒပ်ပၞာန်မသီအဝဵုတံရ။