အပ္ဍဲခရိုင်ထဝဲါ ကေုာံ ရးဒေသဇၞော်တၞင်သဳ အဃောဒးဆဵုဂဗဒၟံင် ဘဲဍာ်ဇၞော် ဍာ်ကလိုပ်၊ တိလာ်ဂှ် ဟိုတ်နူဒပ်ကမ္မယှေန်ပၞာန်တံ ထ္ပက်ကရောင်ပၞာန်၊ ပန်ပှော်ကဵုလွဟ်ဇၞော်တုဲ ညးဒေသတံ ဒးထပ်ဂြိပ်ပဲါဒဴဘဲပၞာန်ပၠန်ရောင် အတိုင်ဂကောံဒပ်ပၠန်ဂတးဗလးတိတံ ဟီုဂးလဝ်ဂှ် ဂွံတီကေတ်ရ။
အဃောကၠောန်သ္ပရေင်တၠုင်ဒၟံင် ပရေင်ကမၠောန်ဟံင်ပြာ်ဂှ် ကေတ်အခေါင်ခိုဟ်တုဲ သွက်သ္ဂောံက္လေင်ထိင်ဒဝ်တိဍာ် ဂကောံဒပ်ပၠန်ဂတးတံ အုပ်ဓလီုလဝ်ဂှ် လုပ်စိုပ်ထ္ပက်ကရောင်ပၞာန်ရ။
စပ္တံနူဂိတုအံက်တဝ်ဗာ စၟတ်တ္ၚဲ (၃) ဏံတုဲ ဒပ်ကမ္မယှေန်ပၞာန်တံ သၟာင်နူလုပ်စိုပ်ထ္ပက်ကရောင်ပၞာန် အပ္ဍဲပွိုင်ဍုင်လံင်လုင်ကဵု တယျက်ချံင်ဂှ်မ္ဂး ပန်ပှော်မံင်ကဵုလွဟ်ဇၞော်၊ လွဟ်ဍောတ်ဆဆဵုရောင် သ္ဂံင်သဝ်ဒါကိုဝ် နူနဲဗျူဟာ (၃၃) ဂှ် ဟီုရ။
“ပ္ဍဲတယျက်ချံင်ဂှ်တှ်ေ ဒေံါမံင် ပရေင်ထ္ပက်ကရောင်ပၞာန်ရ။ ဆဂး ပန်မံင် သီုလွဟ်ဇၞော်၊ လွဟ်ဍောတ်ရ။ လ္ပာ်လံင်လုင်ဂှ်တှ်ေ ထ္ပက်မံင်ကရောင်ပၞာန် လ္ပာ်ကွာန် (ကဒက်ၚယ်) ဂှ် ဇြဟတ် ၜိုတ် (၂၀၀) ရ။ လ္ပာ်တိဍာ် ဂကောံဒပ်ပၠန်ဂတးတံ အုပ်ဓလီုလဝ်ဂှ်တှ်ေ ဗက်ဂကောံဟံင်ပြာ်တုဲ ထ္ပက်မံင်ကရာင်ပၞာန်ရ။ ဍေံတံ ထ္ၜးဟိုတ်ကဵုဘဲဒဏ်ဍာ်တုဲ သွက်ဂွံပသောင်တိဍာ်ဂှ် စဳဇန်မံင်ရ” သာ်ဝွံ ညးဟီုရ။
ဟိုတ်ဂှ်ရ ပၞောဝ်ကဵုကွာန် မဒးဆဵုဗဂမံင်ဘဲဒဏ် ဍာ်ဇၞော်၊ တိလာ် (၁၂၀) ကွာန်ပြင်ဂှ် ကွာန် (၁၀) ကွာန်ပြင်တံ ဒးထပ်ဂြိပ်ဒၟံင်ဘဲပၞာန်ရောင် ဂွံတီကေတ်ရ။
အခိင်လၟုဟ်ဏံဝွံ ညးဒးဘဲဒဏ်ဍာ်လ္ၚဵုတံ စိုပ်ဒၟံင် ပ္ဍဲကွာန်ဗလးဘဲ ကေုာံ လ္ပာ်ဂြိုပ်ကၠအ်ဂူတေံ နွံရဂှ်လေဝ် ဂွံတီကေတ်ရ။
အကြာဒပ်ကမ္မယှေန်ပၞာန် ထ္ပက်ကၠုင်ကရောင်ပၞာန်ကဵု ဂကောံဒပ်မၞုံသၟဝ်ကောပ်ကာဲ နဲဗျူဟာ (၃၃) ကေုာံ ဂကောံဒပ်ပံင်ကောံတံ ညံင်ဟွံဂွံဒှ်ပေဲါဗ္တိုက်ၜါလ္ပာ်ဂှ် ဆုတ်လဝ်ဒပ်ဗွဲယာယဳရ။
ထ္ၜးဟိုတ်ကဵုဘဲဒဏ်ဍာ်တုဲ ထ္ပက်မံင်ကရောင်ပၞာန်ဏံဂှ် ဒှ်အထံက်အပင် သွက်ညးဍုင်ကွာန်တံ ဟွံသေင်မွဲသာ် အကာဲအရာသကဵုပရေံဂၠိုင်အာရောင် သ္ဂံင်သဝ်ဒါကိုဝ် ဟီုရ။
“အခိင်ကၠောန်မံင် ပရေင်ဟံင်ပြာ်ရီုဗင်ဏံ ဍေံတံ ကေတ် (ကာဗာ) နူလက္ကရဴတုဲ ဗက်ကၠုင်မံင်ရ။ ကၠောန်မံင်ဗီုဏံဂှ်တှ်ေ ညးဍုင်ကွာန်တံရ ဂိ။ ကွာန်ဂကောံဟံင်ပြာ်တံ ဟွံစိုပ်ဏီဂှ်လေဝ် သှေ်မံင်ဗွဲမဂၠိုင်ဏီရ။ ဗီုကမ္မယှေန်ပၞာန်တံ ကၠောန်မံင်လၟုဟ်ဏံဂှ်တှ်ေ သွက်ညးဍုင်ကွာန်တံ မုဟွံဒှ်ထံက်ပင်ပုဟ်။ ကၠောန်သ္ပမံင် ဗီုကဵုအကာဲအရာ ပဵုပရေံဂၠိုင်ရ” သာ်ဝွံ ညးဟီုရ။
အခိင်နွံပၟိက်ဒၟံင် ပရေင်ဟံင်ပြာ်ရီုဗင်ဏံ ဂကောံဒပ်ပၠန်ဂတးကဵု ဒပ်ကမ္မယှေန်ပၞာန်တံ သွက်ဂွံဒေံါပန်ပှော်ဂှ် ကမ္မတဳဗဗေင် ချဳဓရာင်ပရေင်ဒဳမဝ်ကရေဇြဳ (DDMSC) တံ အာတ်မိက်လလောင်ပ္တိတ်လဝ် ပ္ဍဲဂိတုအံက်တဝ်ဗာ (၁) ဏံရ။
အပ္ဍဲဒေသထဝဲါဂှ်ဝွံ သၟာင်နူဂကောံဟံင်ပြာ်ရီုဗင်မၞိဟ်တုဲ ဂကောံဟံင်ပြာ်ရီုဗင်မၞိဟ် နူအလုံဍုင်တံလေဝ် စဵုကဵုတ္ၚဲဏံ ကၠောန်သ္ပရေင်တၠုင်ဒၟံင် ကမၠောန်ဟံင်ပြာ်ရီုဗင်ဖိုဟ်တုဲ ကွာန်ဟွံဂွံရီုဗင်ဏီဂှ်လေဝ် သှေ်မံင်ဗွဲမဂၠိုင်ဏီရ။
အပ္ဍဲခရိုင်ထဝဲါ၊ ရးဒေသဇၞော်တၞင်သဳဝွံ ဟိုတ်နူဍာ်ဇၞော်၊ တိလာ်ဂှ်ရ ညးဒေသဟွံအောန်နူ (၃၀) တၠ ဒးချိုတ်လဝ်တုဲ သ္ၚိဒၟံင် ကေုာံ စမြိုင် (၃၀၀) ပြင် လီုလာ်အာနွံရ။ ဟိုတ်ဂှ်ရ သွက်ညးဍုင်ကွာန် ဒးဘဲဒဏ်ဍာ်ဂမၠိုင်တံ မနွံပၟိက်ဒၟံင် ဍာ်စကာ/ဍာ်သုင် ကေုာံ စၞစဇွောံမဖိုဟ်ရောင် ဂွံတီကေတ်ရ။