မိစၠန်ထဝ် ..

ဂကောံမန်ပါ်တိတ် က္ဍိုပ်ဆာန်ဍုၚ်တံ တံၚ်ရပ်ဏာ ကောန်ကွာန်အံၚ်ဇၞးကဵု ကောန်ကွာန်ဍာ်ဂီုတဴ ပွိုၚ်ဍုၚ်ဍာ်ဗု ရးတၞၚ်သဳတံ သွက်ဂွံအာတ်လှုဲဂှ် ကလေၚ်စဴစိုပ်ကွာန်အိုတ်ရရောၚ် ဂွံတီကေတ်ရ။

မၞိဟ်ကလေၚ်စဴစိုပ်ကၠုၚ်တံဂှ် နူဒပ်ပၞာန် ခမရ ၂၈၂ ဖျေံလဝ်သဇိုၚ် ပွိုၚ်ဍုၚ်ဍာ်ဗုတံ ကော်သၟာန်လဝ်ရောၚ် ရဲဒေသဂှ် မွဲတၠ ဟီုရ။

“ရဲကွာန်ပိုဲ ၅ တၠ စိုပ်ကၠုၚ်ရ၊ သှေ်မံၚ် ၂ တၠဂှ် ၜက်မံၚ်ပ္ဍဲကွာန်ဍာ်ဂီုတဴတေံ၊ မၞိဟ်စိုပ်ကၠုၚ်ဂှ် ဒပ်ပၞာန် ခမရ ၂၈၂ ကော်သၟာန်လဝ် က္ဍိုပ်ဆာန်ဍုၚ်တံ မုကဵုကၠောန်၊ ကော်ဏာဒၞာဲလဵု၊ အာတ်လှုဲကီုဟာ၊ မဗ္တံဗီုဂှ် ဍေံတံသၟာန်လဝ်နွံ၊ ဆဂး ရဲကွာန်တံဟီုဂှ် လှုဲမုစိလေဝ် ဟွံဒးကဵုပုဟ်ဂှ် ဟီုကဵု ပၞာန်ဗၟာတံ” သာ်ဝွံ ကောန်ကွာန်အံၚ်ဇၞးမွဲတၠ ဟီုရ။

လောန်ကၠုၚ် ဂိတုမေ ၅ တေံ ဂကောံမန်ပါ်တိတ် က္ဍိုပ်ဆာန်ဍုၚ်တံ ကော်ဏာရဲကွာန်အံၚ်ဇၞးကဵု ကောန်ကွာန်ဍာ်ဂီုတဴ ၜိုတ်၂၂ တၠတုဲ သီုကဵုအာတ်လဝ်လှုဲ မၞိဟ်မွဲ ၜါစှော်ကိုဋ်တုဲ လၟုဟ်ဝွံ ရဲကွာန်တံ ကလေၚ်ဗၠးကၠုၚ်အိုတ်ရ။

“ရဲကွာန် အံၚ်ဇၞးတံဂှ် စိုပ်အိုတ်ယျ၊ ဆဂး ရဲကွာန်ဍာ်ဂီုတဴတံဂှ်ရ စိုပ်ဟာ ဟွံစိုပ်ဟာဂှ် ဟွံတီဏီပုဟ်” သာ်ဝွံ ကောန်ကွာန်အံၚ်ဇၞးမွဲတၠ ဟီုရ။

က္ဍိုပ်ဆာန်ဍုၚ်တံဝွံ ပဲါနူကော်ဏာမၞိဟ်တုဲ အာတ်မိက်လှုဲသၟးဟွံက ပွမအာတ်မိက်လှုဲ နူညးဇၞော်ကွာန် နူကောန်ကွာန်တံဂှ်လေဝ် မွဲနှမွဲနှ ကတဵုဒှ်ဒၟံၚ်ရ။

က္ဍိုပ်နာဲဆာန်ဍုၚ်တံဂှ်ဝွံ ကောန်ဂကောံ မၞုံအကြာ ၂၀ တၠကဵု ၃၀ တၠဒှ်တုဲ ချဳဒရာၚ်ဒၟံၚ် လ္ပာ်ဒေသ ရေဝ်သၠုၚ်ကျာ ဗ္ဒဴပွိုၚ်ဍုၚ်ဍာ်ဗုတေံရ။