ဌာန်ပရိုၚ်ဗၠးၜးမန်

ဟို်တ်နူဗြဲစိုပ်တိတုဲ မွဲဂိတုကဵု မွဲဂိတု ရဲလ္ၚောဝ်ကျာ် လ္တူကျာ်လဂုၚ် ကောန်ဍုၚ်မ္ၚးတအ် အောန်စှေ်ဒၟံၚ်ရောၚ် ဂကောံဂေါပကတအ် လဴထ္ၜးရ။

“အရိုဟ်ဟ်သၞာံရ ဗြဲစဂူတှေ် ရဲလ္ၚောဝ်ကျာ်ကောန်ဍုၚ်မ္ၚးတအ် ကြဳစှေ် ကြဳစှေ်မံၚ်ဏေါဝ်” သာ်ဏံဂကောံဂေါပကကျာ်လ္ဂုၚ်မွဲတၠ ဟီုလဴကဵုရ။

အတိုၚ်စရၚ်ဂကောံဂေါပက ကၟုဲနူဍုၚ်မ္ၚး သၞာံ (၂၀၁၀) ဏံဂှ် ဂိတုဂျာန်နဝါရဳဂှ် ကၟုဲ (၂၀၃၆၄) တၠ၊ ဂိတုဖေဖဝ်ဝါရဳဂှ် (၁၉၁၄၀) တၠ၊ ဂိတုမာတ်ချ်ဂှ် (၁၅၉၄၃) တၠတုဲ ဂိတုဧပြဳဂှ် (၁၀၂၅၄) တၠအောန်စှေ်သိုက်က်ရ။ ကၟုဲကောန်ဍုၚ်မ္ၚးမွဲတၠမ္ဂး စရိတ်ကၟုဲ (၅) ဒဝ်ဠာ ဟွံသေၚ်မ္ဂး (5 FEC) ကံက်ကေတ်ဒၟံၚ်ရ။

“ကောန်ဍုၚ်မ္ၚးတအ် အောန်တှေ်အောန်ရ ယဝ်ရသေံတံတှေ် မွဲမွဲဂကောံၜိုတ် (၃၀) တၠ၊ ပိုဲဆဵုမံၚ် မွဲဏှေအ် မွဲဏှေအ်” သာ်ဏံ ကောန်ကွးမွဲတၠ ဟီုရ။

ကောန်ဍုၚ်မ္ၚး လ္ၚောဝ်ကျာ်ဂၠိုၚ်အိုတ် ပ္ဍဲဂိတုဧပြဳဂှ် ဒှ်ကောန်ဍုၚ်သေံတံတုဲ လၟိဟ် (၂၅၉၁) တၠမဒှ်ရ။ ကောန်ဍုၚ်ကြုက်ဂှ် (၂၅၁၆) တၠ၊ ပြၚ်သေတ်ဂှ် (၉၂၄) တၠ၊ ဂျပါန်ဂှ် (၅၂၁) တၠ၊ ဂျာမနဳဂှ် (၄၄၉) တၠ၊ ကောန်ဍုၚ်အမေရိကာန်ဂှ် (၃၄၇) တၠ၊ ကောန်ဍုၚ်သေတ်သလာန်ဂှ် (၂၇၅) တၠဒှ်တုဲ ကောန် ဍုၚ်အဳတလဳဂှ် (၂၂၇) တၠ ကၠုၚ်စိုပ်လဝ်ရောၚ် ဂွံတီကေတ်နူစရၚ် ဂေါပကတံရ။

ကောန်ဍုၚ်မ္ၚးတအ် ကၠုၚ်လ္ၚောဝ်ကျာ်လ္ဂုၚ် သၞာံ (၂၀၀၉) တုဲကၠုၚ်ဂိတုဂျာန်နဝါရဳဂှ်(၁၀၉၀၉)တၠ၊ ဖေဖဝ်ဝါရဳဂှ် (၁၀၃၈၁) တၠ၊ ဂိတုမာတ်ချ်ဂှ် (၉၈၂၃) တၠ၊ ဂိတုဧပြဳဂှ် (၆၁၆၇) တၠတုဲ ရဲကၠုၚ်လ္ၚောဝ်ကျာ်သၞာံဏံ ဂၠိုၚ်နူသၞာံတုဲကၠုၚ်ဂှ်ဏီရောၚ် ဂကောံဂေါပကတအ် လဴထ္ၜးကဵုရ။