နာဲတၠလွဳ
နူဗော်ကရေၚ် ကေအေန်ယူတံ လလောၚ်တြးပ္တိတ်လိက် ကၟာတ်ဂြိပ်ဆု မွဲချိုန်ခဏတုဲ သၟာပရေၚ်ပိုန်ဂြပ်ကၠောန်ဆုတံ မၚ်စၟဳဒၟံၚ် ဆလအ်ညးတံ ကလေၚ်ပံက်ကဵုမွဲဝါပၠန်ရောၚ် ဂွံတီကေတ်ရ။
သၟာပရေၚ်ပိုန်ဂြပ်မကၠောန်ဒၟံၚ်ဆု အပ္ဍဲဂြိပ်မၞုံသၟဝ်တဲတိဍာ်ကရေၚ်ကေအေန်ယူတံဂှ် နူဒပ်ကရေၚ်တံ လလောၚ်ပတိတ်လဝ်လိက် ကၟာတ်ထောံ ပွမပတိတ်ဆု ပ္ဍဲဂိတုမေ ၁၅ ဂှ်ရောၚ် သၟာကၠောန်ဆု လ္တူဍုၚ်ကျာ်ပိတံ ဟီုရ။
နူကေအေန်ယူတံကၟာတ်ထောံပွမပတိတ်ဆုဂှ်တုဲ သၟာကၠောန်ဆု မပတိတ်ဒၟံၚ်ဆု နူဂြိပ်တံ ဟိုတ်နူ ဆုညးတံသှေ်ဒၟံၚ်ကီု ကပေါတ်စက်ညးတံ သှေ်သၟေဟ်ဒၟံၚ် အပ္ဍဲဂြိပ်ဆုတံဂှ်ကီုတုဲ ညံၚ်ဂွံကလေၚ်ပံက်ကဵုဂြိပ်ဆုမွဲဝါပၠန်ဂှ် နွံပၟိက်မံၚ်အိုတ်ရ။
“ပြဟ်ဟ်ဏံဂှ် ကေအေန်ယူတံ တိုန်သောၚ်ကလးမံၚ် စရၚ်ဆု ပွိုၚ်မွဲသၞာံ ပ္ဍဲဗဟဵုတေံဖိုဟ် ရဲဆုသှေ်မံၚ် ဇိုၚ်ၚ်ဂၠံၚ်ကွဳစက်တံဂှ်တှေ် သွက်ဂွံ ကလေၚ်ပံက်ကဵုနွံမံၚ်၊ ဆဂး ရဲဆုသှေ်မံၚ် လ္ပာ်အပ္ဍဲဂြိပ်တေံဂှ်တှေ် ဍေံတံဟွံကဵုအခေါၚ်ပတိတ်ရပုဟ်” သာ်ဝွံ သၟာကၠောန်ဒၟံၚ်ဆု လ္တူဍုၚ်ကျာ်ပိမွဲတၠ ဟီုရ။
တုဲပၠန် ရံၚ်ကဵုအကာဲအရာပရေၚ်ဍုၚ်ကွာန်ကီု၊ ဥတုရာသဳကီုတုဲ ကေအေန်ယူတံ သွက်ဂွံကၟာတ်ထောံဂြိပ်ဆုနွံရောၚ်ဂှ်လေဝ် ညးဆက်ဟီုရ။
“သၞာံဏံ ဟရိပ်ဂွံလဝ်ဆု (၃၀) လတုန်ပြၚ်ၚ်ဓဝ်ရ။ နုက်ထောံၚုဟ်အကံက်တုဲဒှ်အိုတ်တှေ် မွဲလတုန် ဂွံသြန် (၄၀၀၀၀) ၜါတ်ကီု၊ ဆဂး သွက်ကၠေၚ်ကွဳစက်ဂှ် (၁၀၀၀၀) ၜါတ်၊ ရဲဒဳကွဳစက်ဂှ် ဒးကဵု (၁၀၀၀၀) ၜါတ်၊ ပလေဝ်ပလေတ်ကွဳစက်နွံမံၚ်ဏီ ဖအိုတ်ဂှ်တှေ် သွက်ဇကု သှ်ၜေိုတ် (၁၀၀၀၀) ၜါတ်ရဒှ် ဆဂှ်သၟးဟွံသေၚ် သွက်ကောန်ကမၠောန် ပတိုန်ဆု၊ ဖျေံဆုတံလေဝ်နွံမံၚ်ဏီ” သာ်ဏံ သၟာကၠောန်ဆုဂှ် ဆက်ဟီုရ။
သွက်ရဲကၠောန်ဆုဗွဲမဂၠိုၚ်တံဂှ် ဆၜိုတ်ကၠောန်လဝ် မွဲလတုန် ၜါလတုန်ဓဝ်ဂှ် ဟွံတီကျပြဲပုဟ်၊ အတိုၚ်မွဲက္ညၚ် သရောပ်ထောံစရၚ်တုဲမှ ဂွံတီကေတ် ကျပြဲမာန်ရ။
သၟာကၠောန်ဆုလ္ၚဵု ဂွံကၠောန်ဆုဂှ် ဟိုတ်နူဒးကေတ်လဝ်သြန် နူညးတၞဟ်မွဲကဆံၚ်တုဲ ဒးဒုၚ် ကဵုဒၟံၚ်အိတ်သြန်ဇၟာပ်ပ်ဂိတုဂှ်ရ လဆောဝ်ကျနွံ။ အကြာဂှ် ၚုဟ်ဆုစှေ်ကီု၊ လတုန်ဟရိပ်ဆုအောန်စှေ်ကီု နွံမံၚ်တုဲ ဗဵုတုဲဒးကျဂၠိုၚ်ရ။
သၟာကၠောန်ဆုမွဲမွဲတၠ ယဝ်ကၠောန်နကဵုသြန်ဇကုဇကုမ္ဂး ပွိုၚ်မွဲမွဲသၞာံ ညးတံပရဲတိတ်ဒၟံၚ် (၃၀/၄၀) ကိုဋ် ဒှ်ဒၟံၚ်ရောၚ် ရဲကၠောန်ဆုတံ ဟီုရ။
သွက်အကံက်တံဂှ် ဆုကရောန် (တုလုံးသစ်) မွဲတာန်မ္ဂး (၈၀၀) ၜါတ်၊ ဆုဒိုက်ကာ မွဲတာန် (၂၀၀၀/၃၀၀၀) ၜါတ်၊ ဒးကဵုဒၟံၚ်အကံက် သၞေဟ်ကၚ် DKBA (၃) ဒၞာဲ၊ KNU (၂) ဒၞာဲ၊ NMSP (၁) ဒၞာဲ၊ သၞေဟ်ကၚ်အလဵုအသဳဗၟာ (၂) ဒၞာဲ ဒးကဵုဒၟံၚ်ရ။ ကွဳစက်ဖဍိုက်ဆုတံဂှ် မဒှ်ကွဳစက်သၠာစှ်တုဲ မွဲလတုန်မ္ဂး ဖဍိုက်ဒၟံၚ်ဆု (၁၂) တာန်ရ။
ပြဟ်ဟ်ဏံ ၚုဟ်ဆု (ဆုဒိုက်ကာ) မွဲတာန် (၂၀၀၀၀) ၜါတ်၊ ဆုကရောန် မဂၞန် (၁) ဂှ် မွဲတာန် (၁၁၀၀၀) ၜါတ်၊ မဂၞန် (၂) ဂှ် (၉၅၀၀) ၜါတ်၊ မဂၞန် (၃) ဂှ် (၈၅၀၀) ၜါတ်၊ မဂၞန် (၄) ဂှ်မ္ဂး (၈၀၀၀) ၜါတ် ပိုၚ်ခြာလဝ်ၚုဟ်မးဍေံရ။ ဆုပါကေခိုဟ်ဂှ်မ္ဂး မွဲတာန် (၂၅၀၀၀) ၜါတ်၊ ဍာ်ဒကေဝ်သဝ်ညိဂှ် (၂၃၀၀၀) ၜါတ် နွံရ။
သၞာံတုဲကၠုၚ်တေံဂှ် ၚုဟ်မးဆု ဆုဒိုက်ကာ မွဲတာန် (၂၅၀၀၀) ၜါတ်၊ ဆုကရောန်မွဲတာန် (၁၆၀၀၀) ၜါတ်၊ ပါကေမွဲတာန် (၃၀၀၀၀) ၜါတ် ၚုဟ်ခိုဟ်နူသၞာံဏံရ။
အတိုၚ်ရဲကၠောန်ဆုမွဲတၠဟီုဂှ်မ္ဂး ဟိုတ်နူဒးကဵုအကံက်ဂၠိုၚ်တုဲ သွက်ရဲကၠောန်ဆုတံ မုလေဝ်ဟွံသှေ်ရ။ ဆုမွဲကွဳစက် ဂွံစိုပ်ဒၞာဲဇကုဂှ်မ္ဂး မွဲလတုန် ဒးကဵုဒၟံၚ်အကံက် သွက် ဆုဒိုက်ကာဂှ် (၉၅၀၀၀) ၜါတ်၊ ဆုကရောန်ဂှ် (၅၀၀၀၀) ၜါတ် ဒးကဵုဒၟံၚ်အိုတ်ရ။
