မာံအဲ

အပ္ဍဲဂိတုဏံ ဗၠာဲသၟိၚ်ထိၚ်စက်ယာန်တအ် ဗက်ကံက်ကေတ်မံၚ်စရၚ်ကွဳလိုန်ဓာတ်လာၚ်ဇြေန်ဟွံမွဲ အကြာရဲအာကၠုၚ်တံ ညံၚ်ဂွံကဵုကၠောန်လာၚ်ဇြေန်ရ။

ကွဳလိုန်ဓာတ်ဟွံမွဲကဵုလာၚ်ဇြေန်တံ အပ္ဍဲပွိုၚ်ဂိတုဂျောန်ဏံ ညံၚ်ဂွံကၠောန်လိုၚ်ဇြေန်သီုဖအိုတ်တုဲ ဂိတုဂျူလာၚ်တေံမံက်မ္ဂး ကွဳလိုန်ဓာတ်ဟွံမွဲကဵုလာၚ်ဇြေန်တံဂှ် နူအလဵုအသဳတံ သီကေတ်ထောံဖအိုတ်ရောၚ် အပ္ဍဲဂျာနေဝ် weekly evleven ထမံက်ထ္ၜးလဝ်ရ။

“လၟုဟ်တှေ် ကွဳအာကၠုၚ်မံၚ် ဟွံမွဲကဵုလာၚ်ဇြေန်တံဂှ်တှေ် ဗၠာဲသၟိၚ်တံ ဗဒေါံတုဲတှေ် ဍေံတံကေတ်လဝ်စရၚ် တုဲတှေ် ညံၚ်ဂွံအာကၠောန်ထောံ လာၚ်ဇြေန်ဂှ်လေဝ် ဍေံတံဟီု ယဝ်ဟွံကၠောန်တှေ် ဂိတုဂတဏံ ဍေံတံစသီကွဳဟွံမွဲကဵုလာၚ်ဇြေန်တံဂှ်ဏောၚ်” ညးဒဒုၚ်စၟဳတ်လဝ်ကဵု ဗၠာဲသၟိၚ်မွဲတၠ ဟီုရ။

လာၚ်ဇြေန်ကွဳလိုန်ဓာတ် ကၠောန်ကဵုဒၟံၚ်လၟုဟ်ဏံဂှ် ဟိုတ်နူကဵု ၚုဟ်မးသၠုၚ်လောန်အာတုဲ ညးဒေသတံ ဟွံမိက်ကၠောန်အိုတ်ရ။ အလုံဍုၚ်ဗၟာမွဲဂှ် တွဵုရးညးကဵုညး ပွိုၚ်ဍုၚ်ညးကဵုညးဂှ် အလဵုအသဳတံ ဗက်ကၠောန်ကဵုဒၟံၚ်ရ။ ဂကူလာၚ်ဇြေန်ကွဳဂှ် 17/ယ ကော်ဂးတုဲ အလုံဍုၚ်ဗၟာမွဲ အာကၠုၚ်ဂွံရောၚ် တၠကွဳလိုန်ဓာတ်တံ ဟီုမံၚ်အိုတ်ရ။

“လာၚ်ဇြေန်ဍေံတအ်ကၠောန်ကဵုတၟိဏအ်ဂှ် 17/ယ ကော်စ၊ ၚုဟ်ကၠောန်ဍေံဂှ် ထပှ်ကိုဋ်ပြၚ် ဒစာံကိုဋ်အိုတ်ဏောၚ်၊ ညးမွဲလေဝ်ကၠောန်ဟွံစှေ်ပုဟ်၊ လောန်ကၠုၚ်လတုန်တုဲတေံလေဝ် ညးမွဲလေဝ်ဟွံကၠောန်ပုဟ်၊ ဟိုတ်နူၚုဟ်သၠုၚ်လောန်အာ၊ ဆဂး လၟုဟ်ဍေံတံ ထပ်ပတေၚ်မွဲအလန်ပၠန် ယဝ်ဟွံကၠောန်တှေ် သီဏောၚ်ဂး ဆဂး ညးမွဲလေဝ် မၞိဟ်ကၠောန်ဟွံမွဲဏီဖိုဟ်” သာ်ဝွံ ရဲဍုၚ်မြဝတဳမွဲတၠ ဟီုရ။

အပ္ဍဲတွဵုရးဍုၚ်မန်ဝွံ ဗွဲမဂၠိုၚ် ညးဍုၚ်ကွာန်တအ် သုၚ်စောဲမံၚ် ကွဳလိုန်ဓာတ်ဟွံမွဲကဵု လာၚ်ဇြေန်တံသၟးဂၠိုၚ်ရောၚ် ဂွံတီကေတ်ရ။ ၜိုန်ရအလဵုအသဳတံ ဓရတ်မံၚ် သွက်ဂွံကၠောန်လာၚ်ဇြေန်ဒှ်ကၠာလေဝ် ညးဒေသတံဗွဲမဂၠိုၚ် စိုတ်ဟွံလုပ်စအိုတ်ပုဟ်ရောၚ်ဂှ် ရဲဍိုက်ကွဳလိုန်ဓာတ်ဟွံမွဲကဵုလာၚ်ဇြေန်တံ ဟီုမံၚ်အိုတ်ရ။

“လၟုဟ်ဂှ်ဗၠာဲသၟိၚ်ထိၚ်စက်ယာန် (အဓုပ်ဗု) တအ် စၟဳစၟတ်မံၚ်ကွဳလိုန်ဓာတ်လာၚ်ဇြေန်ဟွံမွဲ ပဵုတိုန်နူကဵု အခိၚ်တုဲကၠုၚ်တေံဏီ၊ ဂိတုဂတဏအ် အစဳဇန်သွက်ဂွံ ဗက်သီကွဳလိုန်ဓာတ်ဟွံမွဲကဵုလာၚ်ဇြေန်တံနွံမံၚ် ဍေံတံဂးဟဂှ်” သာ်ဏအ် တၠကွဳလိုန်ဓာတ်မွဲတၠ ဟီုရ။

လာၚ်ဇြေန်တၟိ ၁၇/ယ ဝွံ အလဵုအသဳတံ စကၠောန်ဒၟံၚ်ကဵု သၞာံ ၂၀၀၉ ဂိတုဒဳဇြေန်ပါတေံတုဲ ဟိုတ်နူကဵု ၚုဟ်မးကၠောန်က္ဍၚ်ဂှ်ရ တၠကွဳတံဟွံမိက်ကၠောန်အိုတ်ရ။ ဆဂး အခိၚ်တေံဂှ် ဟွံကၠောန်မ္ဂး သီဏောၚ်ဂှ် ဟွံဟီုလဝ်မွဲသာ်ကၠာလေဝ် ဂိတုဂျောန်ဏံအိုတ်တုဲ ဂိတုဂျူလာၚ်တေံမံက်မ္ဂး ကွဳဟွံမွဲကဵုလာၚ်ဇြေန်တံဖအိုတ်ဂှ် နဒဒှ် ကၟိန်ဍုၚ်ပိုၚ်ဂးတုဲ သီုထောံဖအိုတ်ဏောၚ်ဂှ် အလဵုအသဳတံဟီုရ။