မာံအသး
ကၠာဟွံစိုပ် ပေါဲရုဲမာဲ ၂၀၁၀ အလဵုအသဳတံကၠောန်သ္ပဏီဂှ် ရဲအယုက် ၁၈ သၞာံပေၚ်တုဲ လိက်စၟတ်ကောန်ဍုၚ်ဟၟဲတံကီု သီုကဵုရဲလိက်စၟတ်သမ္တီကောန်ဍုၚ်ကၠေံတံကီုဂှ် နူကဵုညးတာလျိုၚ်တံ ကၠောန်ကဵုၚုဟ်ဒးဒးရးရးရောၚ် ဂွံတီကေတ်ရ။
စနူသတ္တဟဏံတုဲ နကဵုညးတာလျိုၚ် အလဵုအသဳ မၞုံဒၟံၚ်ပ္ဍဲတွဵုရးဍုၚ်မန်တံ ဗက်စှေ်မံၚ် လၟေၚ်ကွာန်တုဲ သွက်သ္ဂောံစုတ်မာဲ သဂးတုဲ ကောန်ကွာန်အဝဲစိုပ်လိက်စၟတ်သမ္တီကောန်ဍုၚ် ဟၟဲတံဂှ် နူကဵုညးတံ ဗက်ကၠောန်ကဵုမံၚ်ၚုဟ်ဒးဒးရ။
“သွက်ရဲနွံမံၚ်ပ္ဍဲပွိုၚ်ဍုၚ်မုဟ်ဍုၚ်တံ ဂွံကၠောန်လိက်စၟတ်သမ္တီကောန်ဍုၚ်မွဲမွဲဂှ် ဟွံလောဲသွာပုဟ်၊ မုဟိုတ်ရောဟီုတှေ် နူကဵုရုၚ်ကၠောန်လိက်စၟတ် သၞာဲဒဴတံ ဟွံသ္ပဂရုရ၊ ယဝ်ရ ညးတံ ကၠောန်ကဵုလေဝ် လဆောဝ်တှေ် ဗၞုတ်ကိုဋ်ဒကေဝ် ဒးကဵုလေဝ်နွံ၊ လၟုဟ်တှေ် ကၠောန်ဂှ်လေဝ်လောဲ ၚုဟ်ဂှ်လေဝ် ဒးရး အိုတ်ၜိုတ် ၁ ဠက်၊ ဂၠိုၚ်အိုတ်တှေ် ၁၅၀၀၀ ဒကေဝ်ရ ဒးကဵုရောၚ်” သာ်ဝွံ ညးဗြဴးကြပ်ကဵု ရဲကၠောန်လိက်စၟတ်သမ္တီကောန်ဍုၚ်မွဲတၠ ဟီုရ။
သွက်ဂွံစုတ်အာမာဲ ပ္ဍဲပေါဲရုဲမာဲ ၂၀၁၀ ဂှ် နူကဵုဌာနကၠောန်လိက်စၟတ်ကောန်ဍုၚ်တံ ဗက်စှေ်မံၚ်လေၟၚ်ကွာန်ရးတုဲ ညးဍုၚ်ကွာန်လိက်စၟတ်ကောန်ဍုၚ်ဟၟဲတံဂှ် နူစဂိတုဏံတုဲ ညးတံ ဗက်ကၠောန်ကဵုမံၚ်ရ သာ်ဝွံ ရဲဍုၚ်မုဟ်ဍုၚ်မွဲတၠ ဟီုရ။
“ကၠောန်ကဵုမံၚ်ဗီုဗီုဏံဂှ် သွက်ရဲလိက်စၟတ်သမ္တီကောန်ဍုၚ်ဟွံမွဲတံ ခိုဟ်ဟီုကၠာလေဝ် ပေါဲရုဲမာဲ ၂၀၁၀ တေံတှေ် ဒးစုတ်မာဲကဵုအလဵုအသဳပၞာန်ဍေံတံရောၚ် ဍေံတံဟီုလဝ်ရ” သာ်ဏံ ညးဆက်ဟီုရ။
တုပ်တဴသာ်ဂှ်ကီု ကွာန်မန်မၞုံဒၟံၚ်ပ္ဍဲတွဵုရးကရေၚ်၊ ပွိုၚ်တိုက် ထဝ်ပၠၚ် မပ္တံကဵု ထဝ်ပၠၚ်၊ ကြုၚ်ဘာ၊ ကအ်လမု၊ ခယျးပ္ဍဲ၊ ခယျးမ္ၚး၊ ကအ်ယက္ခကေုာံ သာံလှေဝ် တံတေံလေဝ် နူညးတာလျိုၚ်တံ သွက်ဂွံစှေ်ကၠောန်ကဵု လိက်စၟတ်သမ္တီကောန်ဍုၚ်ဂှ် ရန်လဝ်နွံရ။
ညးဍုၚ်ကွာန် မၞုံဒၟံၚ်ပ္ဍဲကွာန်ဓမံက်လဝ်လ္တူဏံဖအိုတ်ဂှ်ှ်မ္ဂး ဗွဲမဂၠိုၚ် သွက်ဗော်ကၟိန်ပ္ဍဲသ္ၚိဂှ် တိတ်အာကၠောန်စ ဍုၚ်သၟာၚ်ဂၠိုၚ်တုဲ ယဝ်ခါရ နကဵုမၞိဟ်မွဲမွဲ စဴကၠုၚ်နူဍုၚ်သၟာၚ်ကဵုဒှ်၊ မၞိဟ်ဓမ္မတာမွဲကဵုဒှ် ပၟိက်မိက်သ္ဂောံကၠောန်လိက်စၟတ်သမ္တီကောန်ဍုၚ်မ္ဂး ဒးအာကၠောန်ပ္ဍဲရုၚ် လိက်စၟတ်သမ္တီကောန်ဍုၚ် ပ္ဍဲဍုၚ်ဘာအၚ်တေံရောၚ် သာ်ဏံ ရဲကွာန်ခယျးမွဲတၠ ဟီုရ။
“ပိုဲကၠောန်လိက်စၟတ်သမ္တီကောန်ဍုၚ်ဂှ် အိုတ်အာ ၂၂၀၀၀ ဒကေဝ်ပြၚ်ၚ်၊ ဗပေၚ် form ဂှ် ဍေံကေတ် ၄၀၀၀ ဒကေဝ်၊ တက်ဗီုဂှ် ၁၀၀၀၊ စမ်ဆီဂှ် ရ၀၀၊ ညးကေတ်ကဵုတာလျိုၚ်ဂှ် ဒးကဵု ၁၅၀၀၀ ရ၊ ဟွံကဵုတှေ် ဇကုကၠောန်လဝ်ဂှ် ဍေံတံ ဟွံပ္တိတ်ကဵုပုဟ်၊ အိုတ်တၟာဂလိုၚ်ရ၊ ဆဂး ညးကေတ်လဝ်တာလျိုၚ်ဂှ် ညးဗပေၚ်ကဵု form ဒဵုကဵု ဂွံ လိက်စၟတ်ဂှ် ဍေံတံကေတ်ကဵုတာလျိုၚ်ဖအိုတ်” သာ်ဏံ ညးအာကၠောန်လဝ် လိက်စၟတ်သမ္တီကောန်ဍုၚ် ပ္ဍဲရုၚ်ဘာအၚ်တေံမွဲတၠ ဟီုရ။
ကွးဘာတက္ကသဵုဘာအၚ်မွဲတၠလေဝ် “အဲအာကၠောန်လဝ်ကီုရ၊ ဆဂး အိုတ်အာ ၅၀၀၀ ဒကေဝ်ပြၚ်ၚ်ရ၊ ညးမွဲကဵုမွဲ အိုတ်ဟွံတုပ်ပုဟ်၊ လ္ၚဵုဂှ်အိုတ်ဂၠိုၚ်၊ လ္ၚဵုဂှ်အိုတ်အောန်ရ၊ ဆဂး ၜိုတ်ဂှ်လေဝ် အဲခယျဂၠိုၚ်မံၚ်ဖိုဟ်ရဏောၚ်” သာ်ဏံ ဟီုရ။
ယဝ်ခါရ က္လေၚ်ဂတရံၚ် သၞောဝ်သ္ဇိုၚ်ဥပဒေမူအပြောံ အလဵုအသဳပၞာန် ပ္ဍဲသၞာံ ၂၀၀၈ တေံလေဝ် ဗီုဍေံကၠောန်ဂှ် ဍေံကၠောန်တုဲ ၜိုန်ရ ဂွံလဝ် လိက်စၟတ်သမ္တီကောန်ဍုၚ်ဟီုကၠာလေဝ် အတိုၚ်ပၟိက်စိုတ်ဇကု မိက်သ္ဂောံစုတ်ဂှ် အခေါၚ်ရုဲဂွံစုတ်မာဲဟွံမွဲကၠုၚ်ရ သာ်ဏံ ကွးဘာတက္ကသိုလ်ဂှ်ဟီု နကဵုလညာတ်ညးတေံရ။
0 Comments