“အတိုၚ်စၟဳစၟတ်လဝ်ဂှ်တှေ် ညးဂှ် ဒှ်မၞိဟ်လိၚ်ပၠုပ်စဟေၚ်ရ။ အလန်ဏံဂှ် ဒှ်အလန်ဒုတိယဏောဝ် ညးဟီုရ။ တုဲတှေ် ကောန်ဂကောံဍေံတံလေဝ် နွံမံၚ်ဏီရောၚ်” သာ်ဝွံ ညးလဴထ္ၜးရ။
ရပ်ဂွံညးပၠုပ်ဂဥုဲချေံဗက်ဂှ် ညးမၞုံတာလျိုၚ်သေံတံ ပလံၚ်ဏာ ရုၚ်ခရိုၚ်ကမ္မရဳတေံရောၚ် သ္ဂောံတီကေတ်ရ။
ညးမပၠုပ်နၚ်ဂဥုဲဂှ် မၞုံယၟု နာဲမေတ် မၞုံအာယုက် (၃၄) သၞာံ ဒှ်ကောန်ဂကူကရေၚ် မသ္ပဒတဴ ပ္ဍဲဍုၚ်ကျာ်ပိတုဲ ရပ်လဝ်လိက်စၟတ်သမ္တီကောန်ဍုၚ်သေံ ပတောံရောၚ် သ္ဂောံတီကေတ်ရ။
“ညးဟီုဂှ် လိၚ်ပၠုပ်ဂဥုဲ မွဲလတုန်တှေ် ဂွံသြန်သေံ တြဴလက်ဘာ် ၝာတ်” သာ်ဝွံ ညးဆက်လဴထ္ၜးရ။
အဃောပ္ဍိုက်နၚ်ကဵု ကွဳလိုန်ဓါတ်ဂှ် အလဵုအသဳသေံတံ ရပ်ဂွံတုဲ လၟုဟ်သီလဝ် သီုကွဳလိုန်ဓါတ် ဂကူ WAVE 100 ဂၞန် (ဃဝ်ဃဝ်ဂဝ်) ၅၁၄ ဂှ်ရ။
အတိုၚ်ဂၠံၚ်ဇၞော် ကျာ်ပိ-ကမ္မရဳ ဃောပ္ဍိုက်ပၠုပ်ဏာဂှ် ရပ်ဂွံညးမပၠုပ်ဂဥုဲချေံ နာဲမေတ် ပ္ဍဲသၞၚ်ကၚ်စၟဳစၟတ်ပံၚ်ကောံ ဒဒန်ဗု ကြုၚ်ဇၞော်လာန်တဳရ။
ပ္ဍဲသၞေဟ်ကၚ်စၟဳစၟတ် ဒဒန်ဗု ကြုၚ်လာန်တဳဂှ်မ္ဂး မပ္တံကဵု ဂကောံစၟဳစၟတ် တတ်ကၠောံဍုၚ်၊ ဗၠာဲသၟိၚ်၊ ဒပ်ပၞာန်၊ ပၞာန်မၚ်ကွာန်တံ ပံၚ်ကောံတုဲ ပွိုၚ် (၂၄) နာဍဳ ဖျေံကၚ် မၚ်စၟဳစၟတ်မံၚ်လၟိုန်ရ။
ပၞောဝ်ကဵုရပ်ဂွံဂဥုဲချေံ ပ္ဍဲပွိုၚ်ဍုၚ်သၚ်္ခလပူရဳသၞာံဏံဂှ် ပွမရပ်ဂွံအလန်ဏံဝွံ ဒှ်လၟိဟ်ဂဥုဲချေံဂၠိုၚ်အိုတ်ရောၚ် ညးမၞုံတာလျိုၚ်သေံတံ ဟီုရ။
ဂဥုဲချေံရပ်ဂွံလဝ် အလန်ဏံဂှ် လုပ်ကၠုၚ်နူဍုၚ်ကျာ်ပိတုဲ ဆက်စပ်မံၚ်ကဵု ဂကောံဒေံါပန်ပှော်ကရေၚ်လ္ၚဵုတံရောၚ် အလဵုအသဳသေံတံ ပတှေ်ကေတ်လဝ်အိုတ်ရ။