အာကာ။  ။ရုၚ်ကၠောန်စၟတ်တဲကၠောံဍုၚ် ပံက်လဝ် ပ္ဍဲဍုၚ်ကအ်သံၚ်ဂှ် သ္ပပတံနူဂိတုဂျူလာၚ်မံက်တုဲ ပြံၚ်ဏာလပါ်သေံ ဍုၚ်ရနံၚ်ရ။

အတိုၚ်အလဵုအသဳၜါလပါ် တုပ်လဝ်စိုတ် ပွိုၚ်ဥတုဗြဲ ပိဂိတု နူဂိတုဂျုလာၚ် ၁ စဵုကဵု ဂိတုသေပ်တေမ်ပါ ၃၀ ပြံၚ်ဆုဲ မွဲချိုန်ခဏရောၚ် သ္ဂောံတီကေတ်ရ။

သွက်သၟာကမၠောန် ကောန်ဍုၚ်ဗၟာ စိုပ်မံၚ်ဍုၚ်သေံ မကၠောန်လိက်စၟတ်တဲကၠောံဍုၚ်တံ အာတရဴ ညံၚ်သ္ဂောံကလိတ်ကလောတ်၊ ညံၚ်သ္ဂောံဗၠးဘဲအန္တရာဲ ပ္ဍဲအခိၚ်ကသီုတုဲ မ္ဒးပြံၚ်ဆုဲသာ်ဏံရောၚ်ဂှ် ကောန်ရုၚ် မကၠောန်လိက်စၟတ်တဲကၠောံဍုၚ် မၞုံပ္ဍဲရနံၚ်မွဲတၠ ဟီုရ။

“ပြံၚ်ဆုဲ ဗီုဏံတှေ် သွက်သၟာကမၠောန်တံ ပြေပြံၚ်ဂၠိုၚ်၊ အခိၚ်လေဝ် အိုတ်သာ၊ ခရိတ်လေဝ် အိုတ်သာ၊ တုဲပၠန် အန္တရာဲဂၠံၚ်တရဴဍာ်လေဝ် ဟွံဒးဂွိၚ်” သာ်ဝွံ ညးဟီုရ။

ကောန်ရုၚ်ၜိုတ် ၁၅ တၠ ပြံၚ်စိုပ်ကၠုၚ် လပါ်ဍုၚ်ရနံၚ်တုဲရောၚ်၊ ပ္ဍဲတ္ၚဲ စပံက်ရုၚ်လေဝ် ကၠောန်ကဵုလိက် သွက်သၟာကမၠောန် ၜိုတ် ၁၀၀ တၠတုဲရောၚ်ဂှ် ညးဆက်လဴထ္ၜးရ။

အခိၚ်ကာလ ကၠောန်လိက်စၟတ်တဲကၠောံဍုၚ် ပ္ဍဲဍုၚ်ကအ်သံၚ်ဂှ် မွဲတ္ၚဲ ကၠောန်ကဵုသၟာကမၠောန် ၜိုတ် ၄၀၀ တၠမာန်တုဲ ကၠောန်ပ္ဍဲရနံၚ်မ္ဂး ၜိုတ် မွဲလ္ၚီတၠ ကၠောန်ကဵုမာန်ရောၚ်ဂှ် ညးမရေၚ်တၠုၚ် ပရေၚ်ကိစ္စအာတရဴ ကုသၟာကမၠောန် မကၠောန်လိက်စၟတ်တဲကၠောံဍုၚ်မွဲတၠ ဟီုရ။

သွက်သၟာကမၠောန် မကၠောန်လိက်တံ သ္ဂောံအာတရဴ ကလိတ်ကလောတ်ဂှ် ပ္ဍဲဍုၚ်သေံ ကုမ္ပဏဳရေၚ်တၠုၚ်ဖဵု မၞုံ ၁၄ ရ။

ညးမရပ်စၟတ်တဲကၠောံဍုၚ်တံဂှ် အလုံမွဲဍုၚ်သေံ အာကၠုၚ်မာန်တုဲ လုပ်တိတ်ဍုၚ်ဗၟာလေဝ် မာန်ရ။ သအာၚ်နူဂှ်ပၠန် ညံၚ်ရဴကောန်ဍုၚ်သေံမွဲ ကလိဂွံအခေါၚ်အရာတုဲ ပရေၚ်ထတ်ယုက် ယုတ်ဒေက်ကီု ဒးဒုၚ်ဖံက်အခေါၚ်အရာမၞိဟ်ကီု ကတဵုဒှ်ကၠုၚ်မ္ဂး အာတေၚ် ပ္ဍဲရုၚ်ကမၠောန် မဆေၚ်စပ်၊ ပ္ဍဲရုၚ်ဌာနအခေါၚ်အရာမၞိဟ်တံမာန်ရ။

အာယုက်ကၠောန် စၟတ်တဲကၠောံဍုၚ် သွက်သၟာကမၠောန် ကောန်ဍုၚ်ဗၟာတံဂှ် သ္ဂုတ်သွာတ်လဝ် ဂိတုဖေဖဝ်ဝါရဳ ၂၈၊ သၞာံ ၂၀၁၀ ကီုလေဝ် အလဵုအသဳသေံ ထပ်ဗပဵုကဵုလဝ် အာယုက် ပွိုၚ် ၂ သၞာံပၠန်ရ။

ပ္ဍဲပယျဵုသေံ-ဗၟာ ရုၚ်ပတိတ်ကၠောန်ကဵု လိက်စၟတ်တဲကၠောံဍုၚ် မၞုံပ္ဍဲဍုၚ်ကအ်သံၚ်၊ ဍုၚ်ဗြဝတဳ၊ ဍုၚ်တာချဳလုက် ပိဌာနတုဲ စဵုကဵုဂိတုမေ ၂၆၊ သၞာံ ၂၀၁၀ ဏံ နူကဵုဌာနပိဏံ ပတိတ်ကဵုလဝ် လိက်အုပ် ၉၀၉၁၈ အုပ်တုဲရောၚ် သ္ဂောံတီကေတ်ရ။

အပ္ဍဲဍုၚ်သေံ သၟာကမၠောန်ကောန်ဍုၚ်ဗၟာ မၞုံၜိုတ် ၂ ပြကောဋိကိုဋ်ရောၚ်ဂှ် ဂကောံသၟာကမၠောန်တံ ဆိၚ်ဆလဝ်ရ။