ဂျူရဳဆာဲ။ ။ဒေသရေဝ်သၠုၚ်ကျာ အပ္ဍဲပွိုၚ်ဍုၚ်လ္ၚဵုတံဂှ် ပ္ဍဲအကြာဏံ ရယကတံ ဗက်ကံက်ကေတ်ဒၟံၚ်စရၚ် ညးပေၚ်အယုက် ၁၈ သၞာံ သွက်ဂွံတီလၟိဟ်မၞိဟ် ဂွံစုတ်မာဲရ။
ပွိုၚ်ဍုၚ်ရေဝ်၊ အပ္ဍဲကဵုပွိုၚ်ဍုၚ်ပါ်လၟိုၚ် ကွာန်ဗွဲမဂၠိုၚ်တံဂှ် မၞိဟ်ပေၚ်အယုက် ၁၈ သၞာံကဵု ၁၈ သၞာံလ္ပါ်လ္တူတံဂှ် နူကဵုအလဵုအသဳတံ စုတ်မာဲမာန်မံၚ်ဏေါၚ်ဂးတုဲ ဗက်ကံက်ကေတ်ဒၟံၚ် လၟိဟ်မၞိဟ် အပ္ဍဲစရၚ်သ္ၚိရ။
“အလဵုအသဳပၞာန်တံဂှ် ဗီုဍေံဒးစိုတ်ဂှ် ဍေံကၠောန်ဂွံမံၚ်၊ ပ္ဍဲကဵုပေါဲရုဲမာဲဏံလေဝ် ဍေံတံရမာန်လေဝ်၊ ဆ္ဂး မုဒှ်ဒှ်ရ ယဝ်ရဒးစုတ်မာဲတှေ် စုတ်လ္ပါ်ဗော်မန်ဇကုတွဵုရ” ဂှ် ရဲကွာန်တၟံကနေၚ်မွဲတၠ ဟီုရ။
တုပ်သာ်ဂှ်ကီု အပ္ဍဲလ္တူဍုၚ်လၟိုၚ်လေဝ် ဇၟာပ်အရာပ်ဂှ် ဗက်ကံက်ကေတ်ဒၟံၚ်စရၚ် မၞိဟ်ပေၚ်အယုက် ၁၈ တံဂှ်ရ။
ကၠာတေံ ကံက်စရၚ်လၟိဟ်မၞိဟ်မ္ဂး ဒးကဵုသီုစရိတ်တုဲ လၟုဟ်ဗက်ကံက်ဒၟံၚ်ဂှ်မ္ဂး ဟွံဒးကဵုစရိတ်မွဲသာ်ဂှ် ရဲလ္တူဍုၚ်လၟိုၚ်မွဲတၠ ဟီုရ။
“မၞိဟ်ကၠုၚ်ဗက်စရၚ်ဂှ်တှေ် ပ္ဍဲသ္ၚိဇကု မၞိဟ်ပေၚ်အယုက် ၁၈ တုဲ နွံမူစိ၊ နွံဒၟံၚ်ဍုၚ်တၞဟ် မုစိဂှ် ဍေံတံသၟာန်ရ” သာ်ဝွံ ညးလ္တူဍုၚ်ဂှ် ဟီုရ။
ဍေံသၟာန်ရဲအယုက်ပေၚ်တုဲ ဍေံခရက်ပတီလဝ်ပ္ဍဲ စရၚ်သ္ၚိဂှ်၊ ရဲနွံဒၟံၚ် ဍုၚ်မ္ၚးတံဂှ်လေဝ် ဍေံသမ္တီလဝ်ကီုဂှ် ညးဆက်ဟီုရ။
ပ္ဍဲကဵုဍုၚ်ရေဝ်ဂှ် လောန်ကၠုၚ်အခိၚ်ကညၚ်ေတံ ဗက်ကံက်ကေတ်လဝ် မွဲအလန်တုဲကီုလေဝ် လၟုဟ်မူဟိုတ် ဂွံကလေၚ်ဗက်မွဲအလန်ပၠန် ဟွံတီပုဟ်ဂှ် ရဲဍုၚ်ရေဝ်မွဲတၠ ဟီုရ။
တုဲကၠုၚ် သၞာံ ၂၀၀၉ ဂိတုဒဳဇြေန်ဘာဂှ် ဇၟာပ်ပွိုၚ်ဍုၚ် နူကဵုအလဵုအသဳတံ ဗက်ကံက်ကေတ်လဝ်စရၚ်သ္ၚိနွံရ။
တွဵုရးဍုၚ်မန်ဝွံ ပွိုၚ်ဍုၚ် မၞုံ ၁၀ ပွိုၚ်ဍုၚ်တုဲ အပံၚ်လၟိဟ်မၞိဟ် နွံဒၟံၚ် ၂ ပြကာဋိကိုဋ်ကဵု ၉ ကိုဋ်ပြၚ်ဒၟံၚ်ရောၚ်ဂှ် နူကဵုဌာန ကိုန်အစဳအဇန်မၞိဟ်ကဵု ဌာနဝန်ဇၞော်ပရေၚ်ပိုန်ဒြပ်တံ ထမံက်ပတိတ်လဝ်နွံရ။
ပ္ဍဲကၟိန်ဍုၚ်ဗၟာဝွံ လၟိဟ်မၞိဟ်စုတ်မာဲ အတိုၚ်ဗက်ကံက်ကေတ်ဂွံလဝ်စရၚ်ဂှ်မ္ဂး လၟိဟ် ၃၀ ပြကာဋိကိုဋ်ပြၚ် နွံရောၚ် ထမံက်ထ္ၜးလဝ် ပ္ဍဲကဵုဂျာနေယ် Weekly Eleven ရ။