ကွးဘာမန် ဂွံလာဘ်ပ္ဍဲဘာသေံ တ္ၚဲမိအနန္တ ၁၁-၈-၂၅၅၃
ဌာန်ပရိုၚ်ဗၠးၜးမန် – ရန်ကဵုတ္ၚဲမိအနန္တ (တ္ၚဲဂၞကျာ် ဨကရာဇ်သေံ ကတဵုဒှ်မၞိဟ်) တုဲ ပ္ဍဲအရာကၠောန်ဗဒှ် ပေဲါပြိုၚ်ချူလိက်ပရေၚ် ဘာသာသေံ ကေုာံ ပေဲါပြိုၚ်ချူဓဇက်ရုပ်ဂှ် ကောန်ကွးဘာ ဂကူမန် မိမဉ္ဇူဆာန် ဟံသာ ကလိဂွံအာ လာဘ်တၟေၚ် သီုၜါဒၞာဲရ။
ကွးဘာ နူတန်မူလ စဵုစိုပ်တန်နဝမ လုပ်ပြိုၚ်မာန်တုဲ ပၞောဝ်ကဵုညးလုပ်ပြိုၚ် ကွးဘာ (၆၇၆) တၠဂှ် မိမဉ္ဇူဆာန် ဟံသာ ကလိဂွံ လာဘ်ပထမ ပ္ဍဲပေဲါပြိုၚ်ချူလိက်ပရေၚ်တုဲ ပ္ဍဲပြိုၚ်ချူရုပ်ဂှ် ကလိဂွံ လာဘ်ဒုတိယ ရ။ ပ္ဍဲပေဲါပြိုၚ် ချူဓဇက်ရုပ် ကဆံၚ်တွဵုရးဂှ်လေဝ် ကေၚ်ဂွံလဝ် လာဘ်ပထမရောၚ် ဂွံတီကေတ်ရ။
ပေဲါပြိုၚ်ဂှ်ဝွံ ကၠောန်ဗဒှ် ပ္ဍဲဘာဗ္တောန်လိခ် ကွာန်နာဲလံက်၊ ပွိုၚ်တိုက်ဓံၚ်မံၚ်ဃောန်၊ ပွိုၚ်ဍုၚ်ၜၚ်သဘာန်၊ ခရိုၚ်ပြဇွောပ်ခဳရဳဃာန် ပ္ဍဲဂိတုအဝ်ဂါတ် (၁၁) ဏံတုဲ ကွးဘာ နူပွိုၚ်တိုက်ဓံၚ်မံၚ်ဃောန် (၁၀) ကွာန်တံ လုပ်ပြိုၚ်ပကာန်အိုတ်ရ။
“အကြာကောန်သေံ ဂလိုၚ်ဂလိုၚ်ဏံ ကောန်မန်ဇကု ဂွံဂွံလာဘ် ဗီုဗီုဏံဂှ် ဝါတ်ကွေံကွေံဏောဝ်၊ နကဵုမအံက်မွဲ ကောန်ဇကု ဂွံလာဘ်ဗီုဏံဂှ် မိပ်စိုတ်ဗွဲမလောန်ရ၊ တုဲတှေ် ကေတ်ဂုဏ်စရာဲ သွက်ကောန်ဂကူမန်ကွေံကွေံ” သာ်ဝွံ မအံက်ကောန်ၚာ်ဂှ် ဟီုရ။
မိမဉ္ဇူဆာန် ဟံသာဝွံ သ္ပပတံနူမံၚ်ဘာ တန်ကောန်ၚာ် စဵုစိုပ်တန်ပဥ္စမလၟုဟ် ကေၚ်ဂွံကၠုၚ်မံၚ် လာဘ်ပထမ ဇၟာပ်ဇၟာပ်သၞာံတုဲ ပ္ဍဲပေဲါပြိုၚ်ချူရုပ် ကဆံၚ်ပွိုၚ်တိုက်၊ ကဆံၚ်ပွိုၚ်ဍုၚ်၊ ကဆံၚ်ခရိုၚ်တံလေဝ် ကေၚ်ဂွံလဝ် လာဘ်တၟေၚ်ရ။
ပ္ဍဲဂိတုဂျုန် (၆) ဏံဂှ် နဒဒှ်ညးစၞး ခရိုၚ်ပြဇွောပ်ခဳရဳဃာန် လုပ်ပြိုၚ် ပ္ဍဲကဆံၚ်တွဵုရးတုဲ ကေၚ်ဂွံကၠုၚ်လဝ် လာဘ်ပထမရောၚ်၊ သွက်သ္ဂောံလုပ်ပြိုၚ် ကဆံၚ်အလုံကၟိန်ဍုၚ်သေံဂှ်လေဝ် ဃောပလေဝ်ပလေတ်မံၚ်ရောၚ်ဂှ် မအံက် နာဲပစ္ဆ လ္ဂန်အိန် ဟီုရ။
မိမဉ္ဇူဆာန် ဟံသာဝွံ မဒှ်ကွးဘာ တန်ပဥ္စမ မၞုံအာယုက် (၁၁) သၞာံ၊ မဒှ်ကောန် မအံက် နာဲပစ္ဆ လ္ဂန်အိန် ကေုာံ မိအံက် မိသဳရိဘဏ်တုဲ သ္ပဒတဴမံၚ် ပ္ဍဲကွာန်နာဲလံက်၊ ပွိုၚ်တိုက်ဓံၚ်မံၚ်ဃောန်၊ ပွိုၚ်ဍုၚ်ၜၚ်သဘာန်၊ ခရိုၚ်ပြဇွောပ်ခဳရဳဃာန်ဂှ်ရ။
မအံက် နာဲပစ္ဆ လ္ဂန်အိန်ဂှ်ဝွံ မဒှ်ဇာတိ ကွာန်ပြဳ ပွိုၚ်ဍုၚ်ဇြပ်ဗုတုဲ နူသၞာံ (၁၉၈၀) တေံ ဒှ်ကၠုၚ်အာစာဘာ ဘာကောန်ဂကူမန်ရ။ ဟိုတ်နူဒးဒုၚ်ကရေပ်ဓရတ်ကဵု အလဵုအသဳပၞာန်တံတုဲ သ္ပပတံနူသၞာံ (၁၉၉၇) ဂှ် လုပ်စိုပ်ကၠုၚ် ဍုၚ်သေံရ။ လၟုဟ်ဂယိုၚ်တဴမံၚ် လမျီု နကဵုကမၠောန်ကွာတ်ထၜိုတ်ရ။
