ညးဒးဒုၚ် ၜုက်တက်တအ်ဂှ်ဝွံ ညးအုပ်ကာကွာန် နာဲကျဝ်ၜဳ (ၜဳ)၊ နာဲဟာန်ကျဳ၊ နာဲအံၚ်ထောန်၊ နာဲမေန်၊ နာဲသဝ်မန်၊ နာဲပျေအ်၊ နာဲအံၚ်သာန်၊ နာဲဏ၊ နာဲကျဳဝေန်၊ နာဲအံၚ်သုၚ်ကဵု မိဟဍေဝ် ညးဗြဴမွဲ တၠလေဝ်ပါရ။
မၞိဟ်တြုံတအ်ဂှ်မ္ဂး အတိုၚ်သီုမၞိဟ် (၁၀) တၠဂှ် ၜုက်တက်ပျဲပျာံလဝ် ဟွံသက်သာတုဲ သှေ်မၞိဟ်ဗြဴမွဲတၠဂှ် ၜိုန်ဟွံၜုက်တက်ကီုလေဝ် အကြာပ်ဇၞော်မျေအ်သာန်ဂှ် ဟၚေပ် နကဵုဒုၚ်ကရေက်၊ သီုကဵု ပၠောကဵု မကံလွဟ် ဒးဒုၚ်ဟွံသာပုဟ် ညးဆဵုမွဲတၠ လဴရ။
ဟိုတ်ဖဵု ဒပ် (၃၁) တအ် ဂွံၜုက်တက်ဂှ် ရဲကွာန်တအ်ဟီုမ္ဂး “ၝညးတအ်ကေတ်ဂှ် ပိုဲဖန်ကဵု ဟွံဂွိုအ် တုဲတှေ် ညးတအ်ၜုက်တက်ပျဲပျာံပိုဲ ဗီုဏံ ပိုဲကောန်ဍုၚ်ကွာန်တအ် ဒးဒုၚ်မံၚ်တွဵု” သာ်ဏံ ညးဒေသကွာန် ကအ်မၚ်ဂၠန်မွဲတၠ လဴကဵုတုဲ “မုဒုဟ် ပ္ဍဲကောန်ကွာန်တအ် ဍေံစောဲဂှ် မုလေဝ် ဍေံဟွံဟီုပုဟ် ဍေံကၠုၚ်လုပ်စိုပ်ကွာန်ဂှ် ဍေံကော်ဏာတုဲတှေ် ဍေံၜုက်တက်ဟဂှ်ရ” သာ်ဏံ ညးပဲါ ဓလေတ်ဒၟံၚ် မွဲတၠ ထပ်ဟီုလဴကဵုပၠန်ရ။
ပ္ဍဲကဵုကွာန်မိတလှာဇၞော်ဂှ်ဝွံ ဗိုလ်ပၞာန်ဒပ် (၃၁) တအ် ဗ္ကန်လဝ်ဆု သွက်ညးတအ် နွံ (၃) တာန်ရ။ ဒပ်နူကဵုဓဝဲါ (၂၇၃) ဂှ် စိုပ်ကၠုၚ်ကၠာတုဲ ဆုသွက်ဂွံကဵု ဒပ် (၃၁) ဂှ် ဒပ် (၂၇၃) ဂွံဏာကၠာရ။ ဒပ် (၃၁) ဂှ် ဟိုတ်နူဟွံဂွံဆု (၃) တာန်ဂှ်တုဲ ဍေံဟွံဂွိုအ်တုဲတှေ် ဍေံထေဲဟာ ဟွံသေၚ်တှေ် က္ဍိုပ်မန်ပါ်တိတ်တအ် တံၚ်ဏာဂၠုၚ်ကရဲကွာန်တအ်ဂှ် (ရှယ်ယာ) ဗိုလ်ပၞာန် ဒပ် (၃၁) တအ်လေဝ်ပါမံၚ်ကီုတှေ် ဍေံဗက်က္ဍိုပ်မန်ပါ်တိတ်တအ် ဟွံဂွိုအ်တှေ် ဍေံထေဲဟာဂှ် ပိုဲလေဝ် ဟွံတီချိုတ်တ်ပၠိုတ်တ် သာ်ဏံ ရဲကွာန်ကအ်မၚ်ဂၠန် မွဲတၠ ဟီုလဴထ္ၜးရ။
ကြဴဏံ ဂျူလာၚ် (၁၁) ပၠန်ဂှ် ဒပ် (၃၁) တအ် ကလေၚ်စိုပ်ကွာန်မိတလှာဇၞော်တုဲ ထပ်ကော်ဏာ ကောန်ကွာန် (၄) တၠ ပ္ဍဲကွာန်မိတလှာဍောတ် ဗ္တံ (၈) နာဍဳရ။ ညးပန်တၠဂှ် နာဲဟာန်ကျဳ၊ နာဲအံၚ်ထောန်၊ နာဲဏ၊ နာဲကျဳဝေန်တအ်ရ။ ညးတအ်ပန်တၠ ဒပ်ပၞာန်ဗၟာတအ် ဂွံဗလးကဵုဂှ် ရဲကွာန်တအ် ဒးဂၠာဲညးဒုၚ်လျိုၚ်တုဲ ကဵုနုက်သြန်မၞိဟ်မွဲ (၂) ကိုဋ်ရ။ မုထ္ၜးဟိုတ်သာ်လဵုတုဲ တပ်ဒဏ်သြန်ဂှ် ကောန်ကွာန်တအ် ဟွံတီရ။ ညးတအ်ဟီုဂှ် ဖေက်ဍေံတအ် စောတ်စောဲ ဆက်ဆောံကဵု ရဲမန်ပါ်တိတ်တအ်တုဲတှေ် ဖေက်ဍေံတအ် သ္ပဆဆဵုတုဲ ဗီုဍေံတအ်ကေတ်ဂှ် ဒးဖန်ကဵုဍေံ ဂးသာ်ဏံရ။
ပ္ဍဲကဵုမၞိဟ် (၄) တၠဂှ် နာဲမေန်မွဲ ကဵုသြန်ဟွံမာန်တုဲ ဂြိပ်ဗၠးတိတ်အာရ။ ၜိုန်ဂှ်လေဝ် သ္ၚိကၟိန် နာဲမေန် ဂွံမံၚ်ပ္ဍဲကွာန်ဂွံဂှ် သ္ကိုပ်ဗိုလ် ကျဝ်တေန်ညုၚ် ကေတ်သြန် (၃) ကိုဋ်ပၠန်ရ။ ဂျူလာၚ် (၂၇) ဂှ် သ္ၚိကၟိန်အိန်ထံၚ် နာဲမေန် ကဵုဂွံသြန် (၂) ကိုဋ်တုဲ သှေ်နူဂှ် ဆလအ်ကဵုဂှ် ဟွံတီဏီရ။
ပ္ဍဲကဵု ဒးဒုၚ်ရပ်လဝ်မၞိဟ် (၄) တၠဂှ် သ္ကိုပ်ဗိုလ် ကျဝ်တေန်ညုၚ် နူကဵုဒပ် (၃၁) ဂှ် ထပ်အာတ်မွဲကိုဋ်၊ ပြဟ်ပြဟ်ဂှ် ကဵုဂွံ (၆) လက်တုဲ သှေ်ဂှ် ကဵုကီု ဟွံဂွံကဵုဏီကီုဂှ် လ္ၚတ်ဟွံဂွံဏီရ။
ညးဍုၚ်ကွာန်ဒေသရေဝ်သၠုၚ်ကျာ မွဲဒမြိပ် ဍုၚ်ပါ်ခေါဇာတအ်ဝွံ မွဲအခိၚ်ကၠာ ဗော်ဍုၚ်မန်တၟိဟွံ ဂွံဒိုအ်ပန်ပှော်ဏီတေံဂှ် ညးဍုၚ်ကွာန်တအ် ဓမ္မတာ မံၚ်သၠဲလးနွံတၟာဂလိုၚ်တုဲ ကြဴနူဗော်ဍုၚ်မန်တၟိ ကေတ် ဓဝ်ပလိုဟ်ဒေံါပန်ပှော်တုဲဂှ် ညးဍုၚ်ကွာန်သ္ကုတ်ဒေသတအ် ဒးဒုၚ်ကရေပ်ဓရတ် တေၚ်ကၠုၚ်မံၚ်ဂှ် ဗော်ပရေၚ်ဍုၚ်ကွာန်မန်တအ် တီညာတ်လေဝ် ရီုဗၚ်ထ္ၜလဘာ်ကဵု ဘဝညးတအ်ဟွံမာန်ဂှ် ဒှ်တၚ်အကာဲအရာ ပရေံမွဲသာ်ကီုရောၚ် သၟာသ္ၚဳဂၠိပ်ပရေၚ်ဍုၚ်ကွာန်တအ် အခါတ်အကာဲဂွံရ။
