စၠန်ထဝ် – ဟိုတ်နူမၞိဟ်တက်ဖကဝ်အလာံ တ္ၚဲကောန်ဂကူမန် ဒးဒုၚ်ၜုၚ်တက်ကဵု ကောန်ကွာန်တံတုဲ ချိုတ်အာဂှ်ရ ကောန်ကွာန်ဒစိတ်တိုၚ် ၅ တၠ ဒးဒုၚ်ရပ်ကဵု ဗၠာဲသၟိၚ်ဍုၚ်ရေဝ် နကဵုအမှုမၞိဟ်ချိုတ်ရ။
သဘၚ်ကၞာ တ္ၚဲကောန်ဂကူမန် မရနုက်ကဵု ၆၄ ဝါ ဗဟဵု မကၠောန်ဗဒှ် ပ္ဍဲဍုၚ်ဇြပ်ဗု (ဗီု- ဌာန်ပရိုၚ်ဗၠးၜးမန်)
မၞိဟ်ချိုတ်အာဂှ် မၞုံယၟု သဝ်အေဝ်ဝါ မၞုံအာယုက် ၃၀ သၞာံပြၚ် မဒှ်ဇာတိ လပါ်ပွိုၚ်ဍုၚ်ပံၚ်တေံတုဲ ပ္ဍဲညးမဒးဒုၚ်ရပ် ၅ တၠတံဂှ် မဒှ်ကောန်ကွာန်ဒစိတ်တိုၚ် ပွိုၚ်ဍုၚ်ရေဝ် မပ္တံကဵု နာဲပေန်၊ နာဲတူတံ ပါလုပ်ရ။ု
ဟိုတ်နူမၞိဟ်ဒးဒုၚ်တက် ချိုတ်အာတုဲ ကောန်ကွာန်တံ ပဲါဓလေဝ်မံၚ်ဂှ်ရ ပ္ဍဲဂိတုဖေဖဝ်ဝါရဳ ၂၀ ဂှ် ကမ္မတဳကၠောန်ဗဒှ် တ္ၚဲကောန်ဂကူမန် ၄ တၠ ကေုာံ ဒကာဘာမွဲတၠ ဒးဒုၚ်ရပ်တုဲ ကလေၚ်ဗလးကဵု ဒကာဘာမွဲတၠဂှ်ရောၚ် ဒုဥက္ကဌ ကမ္မတဳကၠောန်ဗဒှ် တ္ၚဲကောန်ဂကူမန် ဗဟဵု အာစာသဝ် နာဲစောန်တၟး ကော် ဒံက်တာမာံသဵုလေန် ဟီုရ။
ပ္ဍဲဂိတုဖေဖဝ်ဝါရီ ၁၇ အခိၚ်ဗတံ ၜိုတ် ၁၁ နာဍဳဂှ် သဝ်အေဝ်ဝါ တက်ဖကဝ်ထောံ အလာံတ္ၚဲကောန်ဂကူ ၆ တၞုၚ် မဗစူစွံလဝ် ပ္ဍဲကွာန်ဒစိတ်တိုၚ်တုဲ ညးမကေတ်လဝ်ဂီုကၠီု သဘၚ်ကၞာ တ္ၚဲကောန်ဂကူမန် ကေုာံ ကောန်ကွာန်တံ ကောံတုဲ တက်ထောံရောၚ် ကောန်ကွာန်ဒစိတ်တိုၚ် မဆဵုညာတ် နမတ်မွဲတၠ ဟီုရ။
“ဍေံ ဒးဒုၚ်တက်တုဲ ဍေံဟီု ဍေံနူဂကောံ ဒဳကေဗဳအေ။ ဒဳကေဗဳအေ ကၠုၚ်ရံၚ်၊ မၞိဟ်ဍေံ ဟွံသေၚ် ဟီုတုဲ ဍေံထပ်တက်ပၠန်” သာ်ဝွံ ညးဟီုရ။
ကမ္မတဳ ကၠောန်ဗဒှ် တ္ၚဲကောန်ဂကူမန် ကွာန်ဒစိတ်တိုၚ်တံဂှ် ပ္ဍဲဂိတုဖေဖဝ်ဝါရဳ ၁၈ ပလံၚ်ဏာ သဝ်အေဝ်ဝါ ဗဒိုပ်ဗၠာဲသၟိၚ် ဍုၚ်ရေဝ်တုဲ ဟိုတ်နူဒးလဝ်ဘဲဝပ် သကာတ်မြဟ်မံၚ်ဂှ်ရ ပ္ဍဲတ္ၚဲဂှ်ဟေၚ် ပလံၚ်ဏာ ရုၚ်ဂဥုဲဍုၚ်ရေဝ်တုဲ နူရုၚ်ဂဥုဲဍုၚ်ရေဝ် ဃောပလံၚ်ဏာ ရုၚ်ဂဥုဲဍုၚ်မတ်မလီုဂှ် ချိုတ်အာ ပ္ဍဲအကြာဂၠံၚ် ဇရေၚ်ကွာန်ကလိုၚ်ဗဒဝ် ပွိုၚ်ဍုၚ်ဇြပ်ဗုရောၚ် ကမ္မတဳ ကၠောန်ဗဒှ် တ္ၚဲကောန်ဂကူမန် ပွိုၚ်ဍုၚ်ရေဝ် မွဲတၠ ဟီုရ။
လၟုဟ် နူဗဒိုပ်ဗၠာဲသၟိၚ် ဍုၚ်ရေဝ် စောဲလဝ်အမှု ကုမၞိဟ်ဒးဒုၚ်ရပ် ၄ တၠ နကဵုအမှု မၞိဟ်ချိုတ်တုဲ ကမ္မတဳ ကၠောန်ဗဒှ် တ္ၚဲကောန်ဂကူမန် ပွိုၚ်ဍုၚ်ရေဝ်တံ ဘိုၚ်ရေၚ်တၠုၚ်မံၚ် အမှုဂှ်ရောၚ် အာစာသဝ် နာဲစောန်တၟး ဟီုရ။
