ဂျူရဳဆာဲ – ပ္ဍဲဂိတုဖဝ်ရဂိုဏ် ၅ မံက် (ဂိတုမာတ်ချ် ၉) အခိၚ်ဗတံသဂါဂှ် ပ္ဍဲဍုၚ်ခေါဇာ ရေဝ်သၠုၚ်ကျာ အလန်ကၠာအိုတ် ဗမ်ဗတိုဟ်အာရောၚ် ကောန်ဍုၚ်ခေါဇာတံ ဟီုရ။
အဃောကၠောန်သ္ပမံၚ် သဘၚ်ကျာ် လဒေါဝ်ကွာန်(ဍုၚ်) ဗမ်ဗတိုဟ်အာ လက္ကရဴစၚ်ပေဲါ သ္ၚောဲၜိုတ် ၁၈ ဟတ်တုဲ ညးမွဲလေဝ် ဟွံဒးဘဲဝပ်ရ။ ၜိုန်ဂှ်လေဝ် ဟိုတ်နူရမျာၚ်ဗမ် ထတ်ကာတ်တုဲ ရဲဗဵုပေဲါတံ ရုသံၚ်အာအိုတ်ရောၚ် ညးဗြဴဆဵုညာတ်နမတ်မွဲတၠ ဟီုရ။
“ယဝ်ရဗတိုဟ် အဒေါဝ်ပေဲါတှေ် ချိုတ်ဟွံသာပုဟ်၊ ဣဏံဂှ် ဒှ်မံၚ်လက္ကရဴစၚ်ပေဲါတှေ် မုလေဝ် ဟွံဒှ်မွဲသာ်၊ ဆဂးသဘၚ်ကျာ်ဂှ် တုဲဒှ်အာ မွဲဗတမ်ဓဝ်ရဏောၚ်။” သာ်ဝွံ ညးဗြဴဂှ် ဟီုရ။
သဘၚ်ကျာ်လဒေါဝ်ကွာန် ဍုၚ်ခေါဇာဝွံ ဇၟာပ်ဇၟာပ်သၞာံ ကၠောန်သ္ပကၠုၚ် ပိဗတံကီုလေဝ် ဟိုတ်နူဗမ်ဗတိုဟ်အာ ပ္ဍဲဗတံကၠာအိုတ်ဂှ်ရ ဒပ်ပၞာန်တံ ကၟာတ်ထောံ အခေါၚ်ဗဒှ်ပေဲါသဘၚ် သှေ်မံၚ် ၂ ဗတံရ။
ဗမ်ဗတိုဟ်အာဂှ် ဒှ်ဂကူဗမ်လဵုတုဲ နူဂကောံလဵု ခတိုဟ်ဏာဂှ် ဟွံတီကေတ်ဏီရ။ ဟိုတ်နူမိၚ်ရမျာၚ်ဗမ်ဗတိုဟ်တုဲ ဒပ်ပၞာန်ဖျေံသဇိုၚ် ဍုၚ်ခေါဇာကေုာံ ဒပ်ဗၠာဲသၟိၚ်တံ ပန်ဖံက်ဏာလွဟ်ဇၞော် လွဟ်ဍောတ် ၜိုတ် ၁၅ မိနေတ်ရောၚ် ညးဗြဴဆဵုညာတ်ဂှ် ဟီုရ။
ပ္ဍဲဒေသရေဝ်သၠုၚ်ကျာဂှ် ဗော်ကလေၚ်ဒက်ပ္တန်ဍုၚ်မန် နာဲပါန်ညောအ် က္ဍိုက်က္ဍိုပ် ကေုာံ ဂကောံပါ်တိတ် က္ဍိုပ်နာဲဆာန်ဍုၚ်တံ ချဳဒရာၚ်မံၚ်တုဲ ဒှ်မံၚ်ပေဲါဗတိုက်ကဵု ဒပ်ပၞာန်ဗၟာ မွဲနှေံမွဲနှေံရ။ ညးဍုၚ်ကွာန်တံဂှ် အကြာဒပ်ပၞာန်ၜါလပါ်ဂှ် ဒးဒုၚ်ကရေပ်ဓရတ် ဒးဒုၚ်ဖံက်ဖကဝ်မံၚ် အခေါၚ်အရာမၞိဟ် နာနာသာ်ရောၚ် ဂွံတီကေတ်ရ။
0 Comments