မိလျးထဝ် – ဟိုတ်နူဗြဲကျာ ဟွံသေၚ်ကဵုအခိၚ်အခါတုဲ ပ္ဍဲဍုၚ်သေံ ခရိုၚ်ကာန်ချနပူရဳဂှ် သ္ၚိ (၁၀၀) မပြၚ် မဒးလီုလာ်အာရ။
ပ္ဍဲဂိတုမာတ်ချ် ၄ တ္ၚဲဗြဴဗတိ အခိၚ် ၆ နာဍဳကဝါ် သဝ်တ္ၚဲဂှ် သီုဗြဲသီုလဗိုတ်ကျာ ဂူကပိုက်ကၠုၚ် ပွိုၚ်မွဲနာဍဳပြၚ်တုဲ မ္ဒးလီုလာ်အာရောၚ်။
“နူဗ္တံဏံဂှ် ပ္ဍဲကဵုဍုၚ်ကာန်ပူရဳဏံ ဒးလဗိုတ်ကျာ။ သ္ၚိလ္ၚဵုဂှ် သရိုဟ်အာ၊ လ္ၚဵုဂှ် ကၟဳလီုအာလေဝ် နွံ” သာ်ဝွံ ရဲဍုၚ်ကာန်ပူရဳ (ဍုၚ်ကမ္မရဳ) မွဲတၠ ဟီုလဴထ္ၜးကဵုရ။
ပ္ဍဲကွာန်ဝၚ်္ကလေဝ် ဟိုတ်နူလဗိုတ်ကျာ တၞံဆုအကြာကွာန် ဗွဲမဂၠိုၚ် ဒေံါကဝ်ပိုတ်မံၚ်တုဲ သ္ၚိလ္ၚဵုတံ လီုလာ်အာဂှ်လေဝ် ဂွံဆဵုကေတ်ကီုရ။
“သီုလဗိုတ်ကျာ သီုဗြဲဂူ က္တဵုဒှ်ကၠုၚ်ဒၟံၚ်ဗီုဗီုဏံဂှ် မွဲလှေ်လေဝ် ဟွံကေၚ်ဆဵုကၠုၚ်လဝ်ပုဟ်၊ ကၟဳသ္ၚိပိုဲ သလိုက်အာ ပါအာကဵု လဗိုတ်ကျာဂှ်ရ၊ တ္ၚဲဂတနူဏံ ဂွိၚ်ဖေက်ဒှ်ကၠုၚ် ဗီုဏံပၠန်” သာ်ဝွံ ရဲကွာန်ဝၚ်္က နူသ္ၚိကၟဳသလိုက်အာမွဲတၠ ဟီုရ။
ဂတဏံ ပိပန်တ္ၚဲပၠန်မ္ဂး လ္ပာ်ခရိုၚ်ကာန်ချနပူရဳ ဗြဲကီုလဗိုတ်ကျာကီု သွက်ဂွံက္တဵုဒှ်ကၠုၚ်ဂှ် နွံမံၚ်ရောၚ် နူကဵုဌာနပရိုၚ်သေံတံ လလောၚ်ပတိတ်လဝ်တုဲ ကောန်ကွာန်ဝၚ်္ကဗွဲမဂၠိုၚ် ဖေက်လကိုတ်မံၚ်အိုတ်ရ။