ဌာန်ပရိုၚ်ဗၠးၜးမန် – ရဲဂကောံအုပ်ဓုပ် ဍုၚ်ကျာ်ပိတံ အာတ်မိက်လဝ် သြန်ထံက်ပၚ် ပရေၚ်ပညာ နူသၟာပရေၚ်ပိုန်ဒြပ် လတူဍုၚ်ကျာ်ပိတံရောၚ် ဂွံတီကေတ် နူသၟာပရေၚ်ပိုန်ဒြပ်တံရ။
ဗီု - Eleven Media Group
ပ္ဍဲဂိတုမေ ၂၃ လောန်ကၠုၚ်တေံဂှ် သ္ကိုပ်အုပ်ဓုပ်ဍုၚ် ဥူမျဵုကျဳ ကော်ဘိက် သ္ပကောံဓရီု ကုတၠဆေၚ်ထဝ်၊ တၠကုမ္ပဏဳ၊ တၠဆေၚ်စသုၚ်၊ တၠဆေၚ်ဍာ်လက်ဖက် ကေုာံ တၠကမၠောန်နာနာ မၞုံလတူဍုၚ်ကျာ်ပိ ၂၀၀ ပြၚ်တံဂှ်တုဲ အာတ်မိက်လဝ် သြန်ထံက်ပၚ် ပရေၚ်ပညာ သွက်သၞာံဗတောန်ပညာ ၂၀၁၁ – ၁၂ ဏံရ။
“ဆေၚ်ထဝ်၊ ဆေၚ်လက်ဖက်တံဂှ် ဟိုတ်နူသြန်လုပ်အောန်မံၚ် ဂးတှေ် ၅၀၀၀-ၜါတ်၊ တၠကုမ္ပဏဳ ရဲကမၠောန်ဇၞော်ဇၞော်တံဂှ် စနူ ၆၀၀၀ ၜါတ် ဒဵုကဵုမွဲဠက်ၜါတ် အာတ်မိက်လဝ်” သာ်ဝွံ ရဲဍုၚ်ကျာ်ပိ ကြပ်ကဵုသၟာပရေၚ်ပိုန်ဒြပ်မွဲတၠ ဟီုလဴရ။
အာတ်မိက် သြန်ထံက်ပၚ် ပရေၚ်ပညာ လတူဍုၚ်ကျာ်ပိ သာ်ဏံဂှ် ဒှ်အလန်ကၠာအိုတ်တုဲ အတိုၚ်အာတ်မိက်လဝ်ဂှ် ကဵုပေၚ်ပေၚ် ဟွံမာန်ရောၚ်ဂှ် သၟာပရေၚ်ပိုန်ဒြပ်တံ ဟီုအိုတ်ရ။
“အာတ်ကေတ်ကဵု စေတနာတှေ် သွက်ဂွံကဵုဂှ် ဆန္ဒပိုဲ နွံမံၚ်ပေၚ်ပေၚ်ရ၊ ဆဂး ဗီုဗီုဏံ ခုတ်စုတ်လဝ် လၟိဟ်သြန်တုဲတုဲတှေ် ညးလဵုမှ စေတနာ ဟွံမွဲပုဟ်” သာ်ဝွံ တၠဆေၚ်ဖျာဍာ်လက်ဖက်မွဲတၠ ဟီုရ။
“ကဵုဟွံမာန်ပုဟ်ဂှ် ညးဂမၠိုၚ် စာန်စးမံၚ် ပ္ဍဲကောံဓရီုဂှ်တုဲ ဟွံကဵုတှေ် ကေတ်အရေဝ်ဏောၚ် ဥူမျဵုကျဳ ဘပဠလဝ်ပိုဲ၊ ဆဂး ဗီုလဵုကေတ်အရေဝ်ဂှ် ဟွံတီဏီပုဟ်” သာ်ဝွံ ညးတေံ ဆက်ဟီုရ။
ဝန်ဇၞော်ကၟိန်ဍုၚ် ဌာနပရေၚ်ပညာ ဒံက်တာမျဨဂှ် ပ္ဍဲဂိတုမေ ၁၉ လောန်ကၠုၚ်ဏံ အဃောဆဵုဂဗလဝ်ကဵု သ္ကိုပ်ဌာနပရေၚ်ပညာ ရးဇၞော် ကေုာံ တွဵုရးဂမၠိုၚ်ဂှ် “ကာလပံက်ဘာ ၂၀၁၁ ဏံမ္ဂး သွက်ကွးဘာ သ္ဇိုၚ်တန်မူလတံ သီုဖအိုတ် ညံၚ်ဟွံကေတ် ၚုဟ်မးလိခ်အုပ်ဂှ် ဟီုဂးလဝ် နွံရောၚ်” လိခ်ပရိုၚ်အလဵုအသဳဗၟာတံ ချူပတိတ်လဝ်ရ။
“သၞောတ် တန်မူလ ဟွံဒးအိုတ်သြန်ဂှ် ဟီုလဝ်ရ၊ ဆဂးသြန်အပ်ဘာ သၞာံဏံဂှ် အိုတ်ဂၠိုၚ် နူသၞာံအာတေံဏီ” သာ်ဝွံ မိမကွးဘာမွဲတၠ ဟီုရ။
ကဆံၚ်ကွးဘာ တန်မူလမွဲ အာပအပ်ဘာ ပ္ဍဲဍုၚ်ကျာ်ပိမ္ဂး၊ ၚုဟ်အပ်ဘာ ၚုဟ်လိခ်အုပ် သြန်သေံ ၂၇၅ ၜါတ် ကေုာံ ခရိတ်တခဳချူလိခ် ၂၀ ၜါတ် ဒးကဵုတုဲ ကွးဘာ ၄ တန်မွဲမ္ဂး ၚုဟ်အပ်ဘာ၊ ၚုဟ်မးလိခ်အုပ် ၆၇၀ ၜါတ် ကေုာံ ခရိတ်တခဳချူလိခ် ၂၀ ၜါတ် ဒးကဵုမံၚ်ရောၚ် မိမကွးဘာမွဲတၠ ဟီုလဴရ။
