ဌာန်ပရိုၚ်ဗၠးၜးမန်၊ ဟိုတ်နူဖံက်ပတိတ်ထောံ ဍာ်ကၟိုန်ဝၚ်ဖနုၚ် မၞုံဇရေၚ် ကွာန်အၜေတ် ပွိုၚ်ဍုၚ်မုဟ်ဍုၚ်တုဲ ခံက်ဝါဗ္ၚဂမၠိုၚ် ဗၠိုက်အာဍာ်ဂှ်ရ ကၠောန်ဗ္ၚ တဵုသြောံဟွံဂွံ ဒှ်ဒၟံၚ်အခက်အခုဲ ဗွဲမလောန်ရောၚ် သၟာဗ္ၚမၞုံဒေသတံ ဟီုဂးရ။

“လၟုဟ်ဗြဲလေဝ် ဂူမံၚ်ဆက်က်တှေ် ဒၞာဲလ္ၚဵုဍ ာ်စိုပ်မံၚ်ဂၞိၚ်၊ ဒၞာဲလ္ၚဵု စိုပ်မံၚ်ဒဳ” သာ်ဝွံ ညးကၠောန်ဒၟံၚ်ဝါဗ္ၚ သၟဝ်ကၟိုန်ဍာ်ဝၚ်ဖနုၚ် နာဲဝေန် ဟီုရ။

တိဝါညးတေံ မၞုံၜိုတ် ၂၀ ဨကဟီုကီုလေဝ် ဗွဲမဂၠိုၚ် ဒးဒုၚ်ဗၠိုက်အာဍာ်တုဲ လၟုဟ် ဒၞာဲလပါ်တိကုန် သှေ်ဆၜိုတ် ၅ ဨကဟေၚ် ကၠောန်ဗ္ၚဂွံရောၚ် ညးတေံဟီုရ။

ကၠာဟွံဒက်ကၟိုန်ဏံဂှ် ကြုၚ်ဍောတ်မွဲ နွံကၠုၚ်ကီုလေဝ် လၟုဟ်ကြုၚ်ဂှ် ဒိုဟ်ကၟာတ်အာကီု၊ ဗရံၚ်ပတိတ်ဍာ်တံဂှ်လေဝ် ကၠောန်ဗဒှ်လဝ် ဗီုပြၚ်သၞောတ်ထ္ၜတ် ဟွံစှေ်တုဲ ဒလောဲပတိတ်ဍာ် ဟွံမာန်ကီုဂှ်ရ ဖံက်ပတိတ်ဍာ်ကၟိုန်ဇၞော်ဏံမ္ဂး ခံက်ဝါဗ္ၚဂမၠိုၚ် ဒးဒုၚ်ဗၠိုက်ဍာ်ရောၚ်။

ဟိုတ်နူခံက်ဝါ ဗၠိုက်အာဍာ်သာ်ဏံတုဲ ခံက်ဝါဗ္ၚ မၞုံသၟဝ်တမ်ကၟိုန်ဇၞော်ကွာန်ဇိုၚ်ဝုတ်ဒိုဟ် မပ္တံကဵု ကွာန်ထုၚ်မၚ်၊ ကွာန်ဂဗုဲ၊ ဆက်တောဲ၊ ဒဵုမာဲ၊ ကွာန်တၟိ ကေုာံ ကွာန်ကၠအ်သတ် ၜိုတ် ၂၀၀ ဨကပြၚ် လၟုဟ်တဵုသြောံ ဟွံမာန်ရောၚ်ဂှ် သၟာဗ္ၚတံ ဟီုရ။

အခိၚ်ဍာ် ကလေၚ်အောန်စှေ်အာပၠန်လေဝ် ဒၞာဲခံက်ဗၠိုက်လဝ်ဍာ် လၟုဟ်ဏံဂှ် ချောဲတီုတီုဂမၠိုၚ် မံက်တိုန်တုဲ ဟိုတ်နူဂွံဂစိုတ်ချောဲတံဏံ ဝါတ်ခါဲလောန်ဂှ်ရ သွက်ဂွံဆက်တဵုလွဳ တၞံသြောံ ဟွံလောဲသွာရောၚ်ဂှ် သၟာဗ္ၚဂမၠိုၚ် ဟီုရ။

သွက်ဂွံသောၚ်ကလးကဵု ပြသၞာပရေၚ်တံဏံတုဲ သၟာဗ္ၚ မၞုံတမ်ဇိုၚ်ကၟိုန် ၃၀ တၠပြၚ်တံ ပ္ဍဲဂိတုအေဗရာ လောန်ကၠုၚ်ဏံ ချူပတိုန်လိခ် ကုဇရေၚ် သ္ကိုပ်ဝန်ဇၞော် တွဵုရးဍုၚ်မန်၊ သ္ကိုပ်ဌာန်ပၞာန်ရးဒိုဟ်အဂၞဲ ကေုာံ ဝန်ဇၞော်ပရေၚ်တဵုလွဳတွဵုရး ဥူမျဵုညောအ်တံကီုလေဝ် ဖဵုတၟေၚ်မွဲသာ် ဟၟဲကၠုၚ်ရောၚ်ဂှ်သၟာဗ္ၚတံ ဟီုဂးရ။

“ဥူမျဵုညောအ် ကၠုၚ်လ္ၚတ် ပရေၚ်ဍာ်ကၟိုန်ဏံ ၜါအလန် တုဲအာရ၊ ဆဵုဂဗကဵု သၟာဗ္ၚပိုဲတုဲ ဗီုပြၚ်ဇကုကဵုဇကု ကံက်ပကောံကေတ် သြန်၊ ညံၚ်ဂွံကၠောန်ကေတ် ဗရံၚ်ဒလောဲဍာ်တုဲ သောၚ်ကလးအာ ကိစ္စဏံဂှ်  ဗ္ကန်လဝ်ကဵုပိုဲ” သာ်ဝွံ သၟာဗ္ၚ နူကွာန်ဂဗုဲမွဲတၠ ဟီုရ။

သွက်ဂွံတဵုသြောံကညၚ် ၄၅၀၀ ဨကကီု သွက်သ္ဂောံတဵု တၞံခၞေဝ်ကေဝ်နာနာ ၅၀၀၀ ဨကကီု ရန်လဝ်တုဲ ပ္ဍဲသၞာံ ၂၀၀၁ ဂှ် စကၠောန်ဗဒှ်ကၠုၚ် ကၟိုန်ဍာ်ဝၚ်ဖနုၚ်ရောၚ်ဂှ် လိခ်ပရိုၚ် အလဵုအသဳဗၟာတံ ချူပတိတ်လဝ် နွံရ။