စၠန်ထဝ်၊ ဌာန်ပရိုၚ်ဗၠးၜးမန် – ဗော်ဒဳမဵုကရေဇြဳ အလုံရးမန်ဂှ် ဒက်ပတိုန်ကၠုၚ်ဗော် ပေၚ်ကၠုၚ် မွဲသၞာံကီုလေဝ် အခက်အခုဲ ပရေၚ်ဘဏ္ဍာ ဟွံပြေပြံၚ်ဏီရောၚ် က္ဍိုပ်သ္ကိုပ်ဗော် ဟီုရ။
“မၞိဟ်ထံက်ပၚ်ကဵုသြန် ဟွံမွဲပုဟ်၊ ဒးအာတ်မံၚ်သြန် ပ္ဍဲသ္ၚိရဏောၚ်၊ ပွိုၚ်ဍုၚ်ညးကဵုညး ပံက်လဝ်ရုၚ်ဂှ်လေဝ် သြန်ညးကဵုညးဖအိုတ်ရ” သာ်ဝွံ ဥက္ကဌ ဗော်ဒဳမဵုကရေဇြဳ အလုံရးမန် နာဲၚိုဲတိၚ် ကော် နာဲဇၞူမန် ဟီုရ။
ဗော်ဂွံတန်တဴအာ ဍာ်ဇမၠိၚ်မာန်တုဲ အမာတ်ကေုာံ ဝန်ဇၞော်တံ ကလိဂွံနၚ် သြန်ဂိတုမ္ဂး နူသြန်ဂိတုဂှ် ဒးထံက်ပၚ်ကဵုဗော် ၁၀ က္ဍိုပ်ကၠံရောၚ် ဖျေံလဝ်သ္ဂုတ်သွာတ် ပ္ဍဲကောံဓရီုနွံရ။
“(သိန်းစိန်) ဟီုဂှ် ဍုၚ်ကွာန် ဝါတ်ဂါတ်မံၚ်၊ သြန်ဂိတုဂှ် ယှအ်ဖျေံဂး၊ ဍေံဂှ် ယှအ်ဂွံလေဝ် ပေၚ်မံၚ်တုဲတုဲရတှေ်၊ ဝန်ဇၞော်မွဲ ဍေံကဵု ၄ ကိုဋ်၊ အမာတ်ဂှ် ဂွံ ၂ ကိုဋ်တှေ် မုပဂွံရော၊ လၟုဟ် သြန်ဂအုံ သွက်ဗော်ပိုဲဂှ် အမာတ်ဖအိုတ်ပံၚ်မှ ဂွံ ၃/၄ ကိုဋ်ဓဝ်ရဏောၚ်၊ ကၠာတေံချပ်လဝ် မွဲဂိတု ၜိုတ် ၁၀ ကိုဋ် အောန်အိုတ် ဂွံဏောၚ်၊ ချပ်လဝ် ဟွံဒးကေတ် အရီုအဗၚ် ညးတၞဟ်ရပုဟ်၊ လၟုဟ်ဂှ် ပိုဲဒးအာတ်ကေတ် ပ္ဍဲညးလှုဲနွံတံ၊ ညးဂှ် စေတနာနွံ လတူဗော်ပိုဲဂှ် ဟဍံက်ကေတ်ရ၊ ဂွံစ မွဲၜါကိုဋ်လေဝ် ခိုဟ်ဂှ်ရ” သာ်ဝွံ ဥက္ကဌဗော် နာဲၚိုဲတိၚ် ဟီုရ။
ကိုပ်ကၠာတေံဂှ် ဝန်ဇၞော် တွဵုရးမွဲတၠ ဂွံသြန်ဂိတု ၂၀ ကိုဋ်ရောၚ် ပရိုၚ်တိတ်မံၚ်ကီုလေဝ် လၟုဟ် ဂွံမံၚ်မွဲတၠ ၄ ကိုဋ်ဟေၚ်ရ။ အမာတ်ကၠတ်ထဝ် ကောန်ဂကူ အမာတ်ကၠတ်ထဝ် ညးဍုၚ်ကွာန်တံဂှ် ဂွံအထံက်အပၚ် သြန်ဂိတု မွဲတၠ ၃ ကိုဋ်၊ အမာတ်ကၠတ်ထဝ်တွဵုရးတံဂှ် ဂွံအထံက်အပၚ် သြန်ဂိတု မွဲတၠ ၂ ကိုဋ်အိုတ်ရ။
ရုၚ်ဗော်မန် မၞံုပ္ဍဲပွိုၚ်ဍုၚ်နာနာတံဂှ်လေဝ် ရုၚ်ညးကဵုညး အခက်အခုဲ ပရေၚ်သြန် နွံမံၚ်ဖအိုတ်ရ။ ဟိုတ်နူ သြန်အထံက်အပၚ် ဟွံမွဲတုဲ သွက်သ္ဂောံလေဲခတှ်ဂှ် ဒးသွံထောံ ဖုၚ်ရောၚ် ညးအုပ်ကာ ရုၚ်ပွိုၚ်ဍုၚ်ဇြပ်ဗု ဗော်ဒဳမဵုကရေဇြဳ အလုံရးမန် နာဲတာန်ယှိုဲ ဟီုရ။
“အခိၚ်စှေ်ပရေၚ်စန္ဒက်တေံ အလဵုအသဳ ကဵုလဝ်ဖုၚ် CDMA ဂှ် သွံထောံ ဍေံတုဲမှ လေဲခတှ် ဂွံပြေအာ၊ လၟုဟ် ဂွံဂွံဖုၚ်တၟိပၠန်ဂှ် ပတိုန်လဝ်ဖိုဟ်ရ၊ ဂွံဂွံသြန်ထံက်ပၚ် ပ္ဍဲသေဌဳမန်တံဂှ် ဂွံအာစန္ဒက်ညးတံဂှ်လေဝ် သ္ၚောဲမံၚ်ပၠန်၊ သေဌဳဍုၚ်မန်ပိုဲဂှ် စၟဳစလေဝ် ဟွံဂွံပုဟ်” သာ်ဝွံ နာဲတာန်ယိှဲု ဟီုရ။
သအာၚ်နူဂှ်ပၠန် ပ္ဍဲရုၚ်ဍုၚ်မုဟ်ဍုၚ်လေဝ် ဒးချဳဒရာၚ်မံၚ် နကဵုသြန်ဇကုကဵုဇကုတုဲ အာဂတတေံမ္ဂး သွက်ဂွံဒှ်အာ အခက်အခုဲ နွံမံၚ်ရောၚ် ညးအုပ်ကာ ရုၚ်ဍုၚ်မုဟ်ဍုၚ် နာဲဟံၚ်မန် ဟီုရ။
“ချဳဒရာၚ်မံၚ် ဖအိုတ်ဂှ် ပတိတ်လှုဲ နူကဵုသ္ၚိဇကုဏောၚ်၊ အဓာန်ဂတ ဂွံအာဍာ်ဇမၠိၚ်မာန်ဂှ် ကေတ်ဟွံဒးဏီပုဟ်” သာ်ဝွံ ညးဟီုရ။
အမာတ်နွံမံၚ် ပ္ဍဲနေဗျဳဒဝ် (အမာတ်ကၠတ်ထဝ် ကောန်ဂကူ၊ ကၠတ်ထဝ် ညးဍုၚ်ကွာန်) တေံဂှ် ယဝ်တိုန်ကောံဓရီုမ္ဂး အလဵုအသဳတၟိ ကဵုမွဲတ္ၚဲ မွဲလက်ဒကေဝ်တုဲ ခရိတ်အာကၠုၚ် ခရိတ်မံၚ်စံၚ်တံလေဝ် ဂွံမံၚ်ကလိဂွံမံၚ်ရောၚ် ဂွံတီကေတ်ရ။
အမာတ်မွဲတၠ ညံၚ်သ္ဂောံဂွံ သြန်ဂိတု ၁၀ ကိုဋ်ဂှ် နကဵုဗော်ဒီမဵုကရေဇြဳ အလုံရးမန် သွက်သ္ဂောံကလေၚ်အာတ်မိက် ပ္ဍဲအလဵုအသဳတၟိ စဳဇန်လဝ်နွံရ။
ညးမလုပ်ဒုၚ်ရုဲစှ် ပ္ဍဲကဵုပေဲါရုဲမာဲ သၞာံ ၂၀၁၀ တုဲကၠုၚ်တေံဂှ် မၞိဟ်မွဲတၠမ္ဂး သုၚ်စောဲလဝ်သြန် အောန်အိုတ် ၁၀ ကိုဋ်နွံတုဲ ဂၠိုၚ်အိုတ်ဂှ် ၜိုတ် ၁၅ ကိုဋ်နွံရ။