နာဲမာန် – ပ္ဍဲကဵုဂိတုဂျူလာၚ်မံက်ဏံ ဟိုတ်နူၚုဟ်မခၜိုတ်ရာပါ သဝ်စှေ်အာကဝက်ပြၚ်ၚ်ဂှ် ရဲကၠောန်စပရေၚ်သွံရာန်ခၜိုတ်ရာပါတအ်လေဝ် ဒးဒုၚ်ကျဆောံအာသြန်နွံကၠုၚ်ဂၠိုၚ် သာ်ဝွံ ရဲကူသာန်သွံရာန်တံဟီုလဴရ။
လောန်ကၠုၚ်ဂိတုဂျောန်ဂှ် ရဲရာန်မခၜိုတ်ရာပါတံ နွံပၟိက်ဒးကေတ်မ ဂၠိုၚ်ကဵုစှော်နဂးတုဲ သၠုၚ်ၚုဟ်ရာန်လဝ်မွဲနမ္ဂး (၁၁၅၀၀) ဒကေဝ်ဂှ် လၟုဟ်ၚုဟ်မသဝ်စှေ်အာ (၈၀၀၀) ဒကေဝ်ဓဝ်ရ သာ်ဝွံ ညးကူသာန်သွံရာန်မခၜိုတ်ရာပါ နူပွိုၚ်ဍုၚ်ဇြပ်ဗု နာဲသာန်လှ ဟီုလဴရ။
“အခိၚ်တေံဂှ် ဒးကေတ်ပြဟ်ဟ်ဂးတုဲ ညးတအ်ရာန်မွဲနတှေ် (၁၁၅၀၀)၊ ပိုဲရာန်ပ္ဍဲညးကပှ်မတအ်ဂှ် (၈၀၀၀)၊ သွက်ပိုဲသှေ် ပ္ဍဲမွဲန(၃၅၀၀) ဒကေဝ်၊ အဃောတေံ တော်စကိတ်မံၚ်” သာ်ဝွံ နာဲသာန်လှ ဟီုလဴရ။
လၟုဟ် အခိၚ်မခၜိုတ်ရာဗါသဝ်စှေ်အာမွဲန (၈၀၀၀) ဒကေဝ်ဂှ် ရဲကပှ်မတအ်ဂွံအနှေန်မွဲန (၅၀၀၀) ဒကေဝ်ဓဝ် ဂွံတီရ။
“လၟုဟ်တ္ၚဲစကာတ်ဂွံၜါပိတ္ၚဲဓဝ်ဂှ် မရာပါထ္ကးဟတိုဟ်တိတ်ကေတ်တ်တုဲ ဟွံဒးၜှ်ကေတ်လ္တူတၞံရ၊ ကပှ်ကေတ်ဂွံလောဲလောဲ၊ ရဲကပှ်ဂှ်လေဝ်ဂၠိုၚ် ပၠံၚ်သွံညးကအ်ဂှ်ရ ၚုဟ်မရာပါမွဲဟစုတ်ဓဝ် စှေ်အာကဝက်ပြၚ်” သာ်ဏံ ညးသွံရာန်မရာပါဂှ် ထပ်လဴကဵုရ။
ၚုဟ်မရာပါတိုန်အာ မွဲန(၁၁၅၀၀)ဒကေဝ် အခိၚ်ဗြဲဂူဆက်ဒၟံၚ်ဂှ် မရာပါဂမၠိုၚ်လေဝ်ဟွံကှ်ဏီတုဲ ဒးတိုန်ၜှ်ကေတ်လ္တူတၞံ၊ ဒးၜုၚ်ကရေက်ကေတ်မှ ဂွံသွံရာန်မရာပါတအ်မာန်ရ။
လၟုဟ်အခိၚ်မခၜိုတ်ရာပါပြဟ်စှေ်ဒၟံၚ်ဏံမ္ဂး ကောန်ၚာ်သၟတ်မွဲ ပွိုၚ်မွဲတ္ၚဲကပှ်မဒဵုကဵု (၁၀) ကလတ်ဂွံမာန်တုဲ ရဲကပှ်သီုကၟိန်အိန်ထံၚ်မ္ဂး မွဲတ္ၚဲၜိုတ် (၂) နပြၚ် ကပှ်ဂွံမံၚ်ရောၚ်ဂှ် ရဲကပှ်သွံစမရာပါ နူပွိုၚ်ဍုၚ်ဇြပ်ဗု ရဲကွာန်ဝါခ္ဍးမွဲတၠ ဟီုလဴကဵုရ။
မရာပါနူကဵုတွဵုရးဍုၚ်မန်ဂှ် ဒယှ်တှ်ဒၟံၚ်ခၜိုတ်တိတ်ဂၠိုၚ်တုဲ သၟာကၠောန်ပရေၚ်ပိုန်ဒြပ်မရာပါ နူကဵုဒေသတွဵုရးတၞဟ်ဟ်တအ် ဇၟာပ်ပ်သၞာံကၠုၚ်ရာန်ကေတ်မံၚ်သေဲသေဲ ဂွံတီရ။
အခါလၟုဟ်မ္ဂး ပ္ဍဲကဵုတွဵုရးဍုၚ်မန်ကီု သီုဒေသတွဵုရးတၞဟ်ဟ်တံကီုဂှ် ညးတၠကၠအ်တဵုရာပါ တၞံမဆက်မတ်ဂၠိုၚ်တိုန်ကၠုၚ်တုဲ မရာပါဂှ်စလုပ်ကၠုၚ်ပရေၚ်ဗွဝ်ဖျာရ။
ဗီုသၞာံဏံ ရဲကၠောန်ကၠအ်ဂၠိုၚ်တိုန်ဂှ် ယျးသၞာံတေံလေဝ် ရဲကၠောန်ကၠအ်ဂၠိုၚ်ဒှ်မာန်တုဲ ၚုဟ်မရာပါတၞံဆက်မတ်ဂှ် ၚုဟ်ခိုဟ်တိုန်ပၠန်ရောၚ် သာ်ဝွံသၟာကၠောန်ပရေၚ်ပိုန်ဒြပ် ပလောမ်တၞံမဆက်မတ်တအ် သ္ၚဳဂၠိပ်လဝ်ဂွံတီရ။